തദ്ദേശ തിരഞ്ഞെടുപ്പ് ഒരുക്കങ്ങൾ വേഗത്തിൽ: ബാലറ്റ് പേപ്പറുകളിൽ തമിഴ് കന്നട ഭാഷകളും

തിരുവനന്തപുരം: (KVARTHA) തദ്ദേശ സ്ഥാപനങ്ങളിലേക്കുള്ള പൊതുതിരഞ്ഞെടുപ്പിനായുള്ള ഒരുക്കങ്ങൾ പുരോഗമിക്കുന്നതിനിടെ പോസ്റ്റൽ ബാലറ്റ് പേപ്പറുകളുടെയും വോട്ടിംഗ് യന്ത്രങ്ങളിൽ പതിപ്പിക്കുന്ന ബാലറ്റ് ലേബലുകളുടെയും അച്ചടി ആരംഭിച്ചു. വിവിധ സർക്കാർ പ്രസ്സുകളിലായാണ് അച്ചടി ജോലികൾ നടക്കുന്നത്. സംസ്ഥാന തിരഞ്ഞെടുപ്പ് കമ്മീഷണർ എ ഷാജഹാൻ ആണ് ഇക്കാര്യം അറിയിച്ചത്.

തദ്ദേശ സ്ഥാപനങ്ങളുടെ ഘടന അനുസരിച്ച് വ്യത്യസ്ത നിറങ്ങളിലാണ് ബാലറ്റ് പേപ്പറുകളും ബാലറ്റ് ലേബലുകളും അച്ചടിക്കുന്നത്. ഗ്രാമപഞ്ചായത്തുകൾ, മുൻസിപ്പാലിറ്റികൾ, കോർപ്പറേഷനുകൾ എന്നിവിടങ്ങളിലേക്കുള്ള ബാലറ്റ് പേപ്പറിന് വെള്ള നിറമാണ്. ബ്ലോക്ക് പഞ്ചായത്തുകളിലേക്ക് പിങ്ക് നിറത്തിലും ജില്ലാ പഞ്ചായത്തുകളിലേക്ക് ആകാശനീല നിറത്തിലുമാണ് ബാലറ്റ് പേപ്പറുകളും ലേബലുകളും അച്ചടിക്കുന്നത്.

അച്ചടി നടക്കുന്ന പ്രസ്സുകൾ

സംസ്ഥാനത്തെ ഒൻപത് സർക്കാർ പ്രസ്സുകളിലായാണ് ബാലറ്റ് പേപ്പറുകളുടെയും ലേബലുകളുടെയും അച്ചടി ജോലികൾ നടക്കുന്നത്. തിരുവനന്തപുരം മണ്ണന്തല ഗവൺമെൻ്റ് പ്രസ്സ്, തിരുവനന്തപുരം ഗവൺമെൻ്റ് സെൻട്രൽ പ്രസ്സ്, തിരുവനന്തപുരം ഗവൺമെൻ്റ് സ്റ്റാമ്പ് മാനുഫാക്ച്ചറി പ്രസ്സ്, വാഴൂർ ഗവൺമെൻ്റ് പ്രസ്സ്, എറണാകുളം ഗവൺമെൻ്റ് പ്രസ്സ്, ഷൊർണ്ണൂർ ഗവൺമെൻ്റ് പ്രസ്സ്, കോഴിക്കോട് ഗവൺമെൻ്റ് പ്രസ്സ്, വയനാട് ഗവൺമെൻ്റ് പ്രസ്സ്, കണ്ണൂർ ഗവൺമെൻ്റ് പ്രസ്സ് എന്നിവിടങ്ങളാണ് ഇതിനായി നിശ്ചയിച്ചിരിക്കുന്നത്. ഓരോ പ്രസ്സിനും അതാത് ജില്ലകളിലെയും സമീപ ജില്ലകളിലെയും തദ്ദേശ സ്ഥാപനങ്ങളിലേക്കുള്ള അച്ചടി ചുമതല നൽകിയിട്ടുണ്ട്.

ബാലറ്റ് പേപ്പറിൽ തമിഴും കന്നഡയും

തദ്ദേശ സ്ഥാപനങ്ങളിലേക്കുള്ള തിരഞ്ഞെടുപ്പിൽ ഭാഷാ ന്യൂനപക്ഷങ്ങളുള്ള നിയോജകമണ്ഡലങ്ങളിൽ ബാലറ്റ് പേപ്പർ, വോട്ടിംഗ് മെഷീനിൽ പതിപ്പിക്കുന്ന ബാലറ്റ് ലേബൽ എന്നിവയിൽ സ്ഥാനാർത്ഥികളുടെ പേര് തമിഴ്/കന്നട ഭാഷകളിലും കൂടി ചേർത്താണ് അച്ചടിക്കുന്നത്. തിരുവനന്തപുരം, കൊല്ലം, പത്തനംതിട്ട, ഇടുക്കി, പാലക്കാട്, വയനാട് ജില്ലകളിലെ ഭാഷാ ന്യൂനപക്ഷ വോട്ടർമാരുള്ള വാർഡുകളിൽ മലയാളത്തിന് പുറമേ തമിഴ് ഭാഷയിൽ കൂടി പേരുകൾ ഉൾപ്പെടുത്തും. കാസർഗോഡ് ജില്ലയിലെ ഭാഷാ ന്യൂനപക്ഷ വോട്ടർമാരുള്ള വാർഡുകളിൽ കന്നഡ ഭാഷയിലായിരിക്കും പേരുകൾ ഉൾപ്പെടുത്തുക.

തിരുവനന്തപുരം കോർപ്പറേഷനിലെ വലിയശാല, കരമന എന്നീ രണ്ട് വാർഡുകളിലും കൊല്ലം ജില്ലയിലെ കുളത്തൂപ്പുഴ, ആര്യൻകാവ് ഗ്രാമപഞ്ചായത്തുകളിലായി അഞ്ചു വീതം വാർഡുകളിലും തമിഴിൽ വിവരങ്ങൾ ഉണ്ടാകും. പത്തനംതിട്ട സീതത്തോട് ഗ്രാമപഞ്ചായത്തിലെ ഗവി വാർഡിലും മലയാലപ്പുഴ ഗ്രാമപഞ്ചായത്തിലെ രണ്ട് വാർഡുകളിലും തമിഴ് ഭാഷയിൽ വിവരങ്ങൾ ഉൾപ്പെടുത്തും. ഇടുക്കിയിലെ 22 ഗ്രാമപഞ്ചായത്തുകളിലായി 229 വാർഡുകളിലും പാലക്കാട് ആറ് ഗ്രാമപഞ്ചായത്തുകളിലായി 93 വാർഡുകളിലും വയനാട് തവിഞ്ഞാൽ ഗ്രാമപഞ്ചായത്തിലെ കൈതക്കൊല്ലി വാർഡിലും തമിഴ് ഭാഷയിൽ വിവരങ്ങൾ ഉൾപ്പെടുത്തും. കാസർഗോഡ് ജില്ലയിലെ 18 ഗ്രാമപഞ്ചായത്തുകളിലായി 283 വാർഡുകളിലെ ബാലറ്റ് ലേബലിലും ബാലറ്റ് പേപ്പറിലും കന്നഡ ഭാഷയിൽ കൂടി വിവരങ്ങൾ അച്ചടിക്കും. ഈ ഗ്രാമപഞ്ചായത്ത് വാർഡുകൾ ഉൾപ്പെടുന്ന ബ്ലോക്ക് പഞ്ചായത്ത്, ജില്ലാ പഞ്ചായത്ത് വാർഡുകളിലേയ്ക്കുള്ള ബാലറ്റ് പേപ്പറിലും ലേബലിലും അതാത് ഭാഷകളിൽ കൂടി വിവരങ്ങൾ അച്ചടിക്കുന്നതാണ്. 

രണ്ടര ലക്ഷത്തിലധികം ഉദ്യോഗസ്ഥർ

തദ്ദേശ സ്ഥാപനങ്ങളിലേക്കുള്ള വിവിധ തിരഞ്ഞെടുപ്പ് ജോലികൾക്കായി 2,56,934 ഉദ്യോഗസ്ഥരെ നിയോഗിച്ചിട്ടുണ്ടെന്ന് സംസ്ഥാന തിരഞ്ഞെടുപ്പ് കമ്മീഷൻ അറിയിച്ചു. സംസ്ഥാനത്ത് 14 ജില്ലാ തിരഞ്ഞെടുപ്പ് ഓഫീസർമാരും 28 അസിസ്റ്റൻ്റ് ജില്ലാ തിരഞ്ഞെടുപ്പ് ഓഫീസർമാരുമാണുള്ളത്. 1249 റിട്ടേണിംഗ് ഓഫീസർമാർ, 1321 അസിസ്റ്റൻ്റ് റിട്ടേണിംഗ് ഓഫീസർമാർ, 1034 ഇലക്ടറൽ രജിസ്‌ട്രേഷൻ ഓഫീസർമാർ എന്നിവരും തിരഞ്ഞെടുപ്പ് നടത്തിപ്പ് ചുമതലയിലുണ്ട്.

വോട്ടെടുപ്പ്, പോളിംഗ് സാമഗ്രികളുടെ വിതരണം, വോട്ടെണ്ണൽ തുടങ്ങിയ പ്രവർത്തനങ്ങൾക്കായി ഒരു ലക്ഷത്തി എൺപതിനായിരത്തോളം ഉദ്യോഗസ്ഥരെയാണ് നിയോഗിച്ചിട്ടുള്ളത്. സുരക്ഷാ ക്രമീകരണങ്ങൾക്കായി 70,000 പോലീസുകാരെ വിന്യസിക്കും. തിരഞ്ഞെടുപ്പ് നടപടികൾ നിരീക്ഷിക്കാൻ 14 പൊതു നിരീക്ഷകരേയും 70 ചെലവു നിരീക്ഷകരെയും നിയമിച്ചിട്ടുണ്ട്. 2300 സെക്ടറൽ ഓഫീസർമാർ, 184 ആന്റി-ഡിഫേസ്മെൻ്റ് സ്‌ക്വാഡുകൾ, 70 ജില്ലാതല പരിശീലകർ, 650 ബ്ലോക്കുതല പരിശീലകർ എന്നിവരുമാണ് തിരഞ്ഞെടുപ്പ് ഡ്യൂട്ടിയിലേർപ്പെടുന്നത്.

നിങ്ങളുടെ തദ്ദേശ സ്ഥാപനത്തിലേക്കുള്ള ബാലറ്റ് പേപ്പറിൻ്റെ നിറം ഏതാണ്? ഈ വിവരങ്ങൾ മറ്റുള്ളവരിലേക്ക് ഷെയർ ചെയ്യുക.

Article Summary: Local body election ballot papers printing begins with multilingual support and over 2.5 lakh staff deployed.

#KeralaLocalBodyElection #BallotPaper #ElectionCommission #KeralaElections #TNSC #Voting