ആന്തൂർ, മലപ്പട്ടം പഞ്ചായത്തുകളിൽ എൽഡിഎഫ് വിജയം; എതിരില്ലാത്ത നാല് സീറ്റുകൾ ഉറപ്പിച്ചു

കണ്ണൂർ: (KVARTHA) തദ്ദേശ തെരഞ്ഞെടുപ്പിൻ്റെ പത്രിക സമർപ്പണം പൂർത്തിയായപ്പോൾ കണ്ണൂർ ജില്ലയിൽ എൽ.ഡി.എഫ്. പതിവുപോലെ എതിരില്ലാത്ത വിജയത്തോടെ മുന്നിൽ. ആന്തൂർ നഗരസഭയിലെ രണ്ടിടത്തും മലപ്പട്ടം ഗ്രാമപഞ്ചായത്തിലെ രണ്ടിടത്തുമാണ് സിപിഎം സ്ഥാനാർഥികൾക്ക് എതിരാളികളില്ലാതെ വിജയം ഉറപ്പായത്. പത്രിക സമർപ്പിക്കേണ്ട അവസാന സമയമായ വെള്ളിയാഴ്ച, വൈകിട്ടുവരെ നാലിടത്തും മറ്റാരും പത്രിക നൽകിയില്ല. പത്രിക പിൻവലിക്കുന്ന സമയം കഴിയുന്നതോടെ ഇവരെ വിജയികളായി പ്രഖ്യാപിക്കും.

ആന്തൂർ നഗരസഭയിൽ നിലവിൽ എൽഡിഎഫിന് പ്രതിപക്ഷമില്ലാത്ത സാഹചര്യമാണുള്ളത്. മോറാഴ വാർഡിൽ കെ രജിതയും പൊടിക്കുണ്ട് വാർഡിൽ കെ പ്രേമരാജനുമാണ് എതിരില്ലാതെ വിജയിച്ച സ്ഥാനാർത്ഥികൾ. സി.പി.എം സംസ്ഥാന സെക്രട്ടറി എം.വി ഗോവിന്ദൻ്റെ നാട് കൂടി ഉൾപ്പെടുന്ന ആന്തൂർ നഗരസഭ സി.പി എമ്മിൻ്റെ മൃഗീയ ഭൂരിപക്ഷമുള്ള നഗരസഭയാണ്.

ചെങ്കോട്ടയിൽ എതിരാളികളില്ല

മലപ്പട്ടം ഗ്രാമ പഞ്ചായത്തും സി.പി എമ്മിൻ്റെ ചെങ്കോട്ടയാണ്. ഇവിടെയും രാഷ്ട്രീയ എതിരാളികൾക്ക് മത്സരിക്കാൻ കഴിയാത്ത വാർഡുകളുണ്ട്. അടുവാപ്പുറം നോർത്തിൽ ഐ വി ഒതേനനും അടുവാപ്പുറം സൗത്തിൽ സി കെ ശ്രേയയുമാണ് എതിരില്ലാതെ തെരഞ്ഞെടുക്കപ്പെട്ട എൽഡിഎഫ് സ്ഥാനാർത്ഥികൾ.

2015-ൽ രൂപീകരിക്കപ്പെട്ട ആന്തൂർ നഗരസഭയിൽ കഴിഞ്ഞ തവണ ആറ് സീറ്റുകളിൽ യു.ഡി എഫ് സ്ഥാനാർത്ഥികൾ മത്സരിച്ചിരുന്നില്ല. ഇത്തവണ നാല് സീറ്റുകളിൽ എതിരില്ലാത്ത വിജയം നേടാനായത് എൽഡിഎഫ് പക്ഷത്തിന് തെരഞ്ഞെടുപ്പ് തുടക്കത്തിൽ തന്നെ വലിയ ആത്മവിശ്വാസമാണ് നൽകുന്നത്. കണ്ണൂർ ജില്ലയിൽ എൽഡിഎഫ് പതിവായി നേടുന്ന എതിരില്ലാത്ത വിജയം ഇക്കുറിയും തുടരുമെന്നാണ് വിലയിരുത്തൽ.

കണ്ണൂർ ജില്ലയിൽ എൽഡിഎഫിന് ലഭിച്ച ഈ എതിരില്ലാത്ത വിജയത്തെക്കുറിച്ച് നിങ്ങളുടെ അഭിപ്രായമെന്താണ്? കമൻ്റ് ചെയ്യുക.

Article Summary: LDF secures four unopposed victories in Anthoor and Malappattam in Kannur.

#LDF #KeralaLocalBodyPolls #KannurPolitics #Anthoor #Malappattam #CPMVijayam