തിരുവനന്തപുരം കോർപ്പറേഷൻ: എൽഡിഎഫ് സ്ഥാനാർഥികളെ പ്രഖ്യാപിച്ചു; മേയർ ആര്യ രാജേന്ദ്രൻ പട്ടികയിൽ ഇല്ല, യുവാക്കൾക്ക് പ്രാമുഖ്യം

തിരുവനന്തപുരം: (KVARTHA) തദ്ദേശ തെരഞ്ഞെടുപ്പിന്റെ തീയതി സംസ്ഥാന തെരഞ്ഞെടുപ്പ് കമ്മീഷൻ പ്രഖ്യാപിച്ചതിന് പിന്നാലെ തിരുവനന്തപുരം കോർപ്പറേഷനിലെ 93 സീറ്റുകളിലേക്കുള്ള സ്ഥാനാർത്ഥികളുടെ പട്ടിക എൽഡിഎഫ് പുറത്തുവിട്ടു. സി.പി.എം ജില്ലാ സെക്രട്ടറി വി. ജോയ് എംഎൽഎ ഘടകകക്ഷികളുടേത് ഉൾപ്പെടെയുള്ള സ്ഥാനാർഥികളെയാണ് പ്രഖ്യാപിച്ചത്. ബാക്കിയുള്ള എട്ട് സീറ്റുകളിലെ സ്ഥാനാർത്ഥികളെ ഘടകകക്ഷികളുമായി ചർച്ചചെയ്‌തശേഷം ചൊവ്വാഴ്ചയോ അതിനുശേഷമോ പ്രഖ്യാപിക്കുമെന്നും അദ്ദേഹം വ്യക്തമാക്കി. തിരുവനന്തപുരം കോർപ്പറേഷനിലെ തെരഞ്ഞെടുപ്പ് ആദ്യഘട്ടമായ ഡിസംബർ ഒൻപതിനാണ് നടക്കുന്നത്.

ആര്യ രാജേന്ദ്രൻ പട്ടികയിൽ ഇല്ല; യുവാക്കൾക്ക് പ്രാമുഖ്യം

നിലവിലെ മേയർ ആര്യ രാജേന്ദ്രൻ്റെ പേര് ആദ്യ പട്ടികയിൽ ഉൾപ്പെടുത്തിയിട്ടില്ല. മേയർ സ്ഥാനാർഥി പ്രഖ്യാപനത്തിൽ പങ്കെടുക്കാത്തതിനെക്കുറിച്ച്, 'മേയർ കോഴിക്കോട് ആയതിനാലാണ് സ്ഥാനാർഥി പ്രഖ്യാപനത്തിൽ പങ്കെടുക്കാത്തത്' എന്ന് ജില്ലാ സെക്രട്ടറി വി ജോയ് എംഎൽഎ അറിയിച്ചു. എന്നാൽ ആര്യ രാജേന്ദ്രൻ ഇത്തവണ മത്സരരംഗത്ത് ഇല്ലെന്നാണ് റിപ്പോർട്ട്. 23-കാരി മാഗ്നയാണ് പട്ടികയിലെ ഏറ്റവും പ്രായം കുറഞ്ഞ സ്ഥാനാർഥി. ഇവർ അലത്തറ വാർഡിലാണ് ജനവിധി തേടുന്നത്. 30 വയസ്സിന് താഴെയുള്ള 13 പേരാണ് എൽഡിഎഫ് പട്ടികയിലുള്ളത്. അഭിഭാഷകർ, മാധ്യമപ്രവർത്തകർ, ഐടി ജീവനക്കാർ, സിനിമാപ്രവർത്തകർ എന്നിവരും സ്ഥാനാർഥി പട്ടികയിൽ ഉൾപ്പെടുന്നു.

പ്രമുഖർ മത്സരരംഗത്ത്: മേയർ സാധ്യത

കോർപ്പറേഷനിലെ ഭരണം നിലനിർത്തുക എന്ന ലക്ഷ്യത്തോടെ പ്രമുഖരെ അണിനിരത്തിക്കൊണ്ടാണ് എൽഡിഎഫ് പട്ടിക തയ്യാറാക്കിയിരിക്കുന്നത്. മുൻ ഡിജിപി ആർ. ശ്രീലേഖയ്ക്കെതിരെ ശാസ്ത്രമംഗലത്ത് സിപിഎമ്മിലെ ആർ. അമൃത മത്സരിക്കും. യുഡിഎഫിന്റെ മേയർ സ്ഥാനാർഥി ശബരീനാഥനെതിരെ കവടിയാറിൽ മുൻ കൗൺസിലറും സിപിഎം ലോക്കൽ കമ്മിറ്റി സെക്രട്ടറിയുമായ എ. സുനിൽകുമാറാണ് മത്സരിക്കുന്നത്.

ഡെപ്യൂട്ടി മേയർ പി.കെ രാജുവിൻ്റെ മകൾ തൃപ്തി രാജ് പട്ടം വാർഡിൽ ജനവിധി തേടും. കൂടാതെ വിളപ്പിൽ ഏരിയ സെക്രട്ടറി ആർ.പി. ശിവജി, വഞ്ചിയൂർ ഏരിയ സെക്രട്ടറിയും മുൻ മേയറുമായ കെ. ശ്രീകുമാർ, പാളയം ഏരിയ സെക്രട്ടറി വഞ്ചിയൂർ ബാബു എന്നിവരും മത്സരരംഗത്തുണ്ട്. ഇവരിലാരെങ്കിലും മേയർ സ്ഥാനാർഥിയാകുമെന്നാണ് രാഷ്ട്രീയ നിരീക്ഷകരുടെ വിലയിരുത്തൽ. മേയറെ തെരഞ്ഞെടുപ്പിന് ശേഷം പ്രഖ്യാപിക്കുമെന്നും അതാണ് പാർട്ടി രീതിയെന്നും വി ജോയ് വ്യക്തമാക്കി.

സീറ്റ് വിഭജനം

സിപിഎം 70 സീറ്റുകളിലും സി.പി.ഐ. 17 സീറ്റുകളിലുമാണ് പ്രധാനമായും മത്സരിക്കുന്നത്. മറ്റ് ഘടകകക്ഷികളുടെ സീറ്റുകൾ ഇങ്ങനെ: കേരള കോൺഗ്രസ് (എം)-മൂന്ന്, ആർ.ജെ.ഡി-മൂന്ന്, ജനതാദൾ (എസ്)-രണ്ട്, ഐ.എൻ.എൽ-ഒന്ന്, കോൺഗ്രസ് (എസ്)-ഒന്ന്, എൻ.സി.പി-ഒന്ന്, കേരള കോൺഗ്രസ് (ബി)-ഒന്ന്, ജനാധിപത്യ കേരളാ കോൺഗ്രസ്-ഒന്ന്, ജെ.എസ്.എസ്-ഒന്ന് എന്നിങ്ങനെയാണ്. 31 സീറ്റുകളിലാണ് ഘടകകക്ഷികൾ ജനവിധി തേടുന്നത്. നേരത്തെ കോൺഗ്രസും ബി.ജെ.പി.യും ആദ്യഘട്ട സ്ഥാനാർത്ഥികളെ പ്രഖ്യാപിച്ചിരുന്നതോടെ തിരുവനന്തപുരം കോർപ്പറേഷനിലെ മത്സരചിത്രം വ്യക്തമായി.

തിരുവനന്തപുരം കോർപ്പറേഷൻ തെരഞ്ഞെടുപ്പ് വിശേഷങ്ങൾ ചർച്ച ചെയ്യാനായി ഷെയർ ചെയ്യുക.

Article Summary: LDF announced 93 candidates for Thiruvananthapuram Corporation; Mayor Arya Rajendran is not on the list.

#LDFKerala #TrivandrumPolls #AryaRajendran #LocalBodyElection #KeralaPolitics #CPM