കെഎസ്ആർടിസിയുടെ ചരിത്രത്തിലെ ഏറ്റവും വലിയ നവീകരണത്തിന് തുടക്കമായി; 143 പുതിയ ബസുകളും ഡിജിറ്റൽ സംവിധാനങ്ങളും ഉദ്ഘാടനം ചെയ്തു

തിരുവനന്തപുരം: (KVARTHA) സംസ്ഥാന സർക്കാർ നടപ്പാക്കുന്ന നവീകരണ പ്രവർത്തനങ്ങളിലൂടെ കെഎസ്ആർടിസി പുതിയൊരു തലത്തിലേക്ക് ഉയരുകയാണെന്ന് മുഖ്യമന്ത്രി പിണറായി വിജയൻ. കെഎസ്ആർടിസിയുടെ വിവിധ ശ്രേണികളിലുള്ള 143 പുതിയ ബസ്സുകളുടെ ഫ്ലാഗ് ഓഫും സമ്പൂർണ ഡിജിറ്റലൈസേഷൻ സംവിധാനങ്ങളുടെ ഉദ്ഘാടനവും തിരുവനന്തപുരം ആനയറ ബസ് സ്റ്റേഷനിൽ നിർവഹിച്ചുകൊണ്ട് സംസാരിക്കുകയായിരുന്നു അദ്ദേഹം. ചടങ്ങിൽ ഗതാഗത മന്ത്രി കെ.ബി. ഗണേഷ് കുമാർ അധ്യക്ഷനായി.

പുതിയ തുടക്കത്തിന് ആശംസകൾ

കെഎസ്ആർടിസിയുടെ ഭാഗമായി പുതിയ ബസ്സുകൾ വന്നുകൊണ്ടിരിക്കുകയാണെന്ന് മുഖ്യമന്ത്രി പറഞ്ഞു. യാത്രക്കാർക്ക് ഏറെ ഉപയോഗപ്രദമാകുന്നതും ഇന്ത്യയിലെ തന്നെ ഏറ്റവും നൂതനവുമായ ബസ്സുകളാണ് കെഎസ്ആർടിസി നിരത്തിലെത്തിക്കുന്നത്. ഇതിലൂടെ കെഎസ്ആർടിസി കൂടുതൽ ആധുനികവൽക്കരിക്കപ്പെടുമെന്നും അദ്ദേഹം ചൂണ്ടിക്കാട്ടി. ഈ യാത്ര മംഗളമായി ഭവിക്കട്ടെ എന്നും കൂടുതൽ യശസ്സിലേക്ക് കെഎസ്ആർടിസി ഉയരട്ടെ എന്നും ആശംസിച്ച മുഖ്യമന്ത്രി, ഇതിന് ആവശ്യമായ സഹായവും പിന്തുണയും സഹകരണവും എല്ലാവരും നൽകണമെന്നും ആവശ്യപ്പെട്ടു.

ചരിത്രത്തിലെ ഏറ്റവും വലിയ നവീകരണം

കെഎസ്ആർടിസിയുടെ ചരിത്രത്തിൽ ഏറ്റവുമധികം ബസ്സുകളുടെ ആധുനികവത്കരണം നടക്കുന്ന ആദ്യത്തെ സന്ദർഭമാണിതെന്ന് ഗതാഗത വകുപ്പ് മന്ത്രി കെ.ബി. ഗണേഷ് കുമാർ പറഞ്ഞു. ലിങ്ക് ബസ്സുകൾ, സൂപ്പർഫാസ്റ്റ് പ്രീമിയം/സൂപ്പർഫാസ്റ്റ്, സ്ലീപ്പർ/സെമി സ്ലീപ്പർ, വോൾവോ ബസ്സുകൾ തുടങ്ങിയ ഏറ്റവും ആധുനിക ബസ്സുകളുമായി കെഎസ്ആർടിസി ഒരു പുതിയ തുടക്കം കുറിക്കുകയാണ്. ഈ തുടക്കം ഒരു വലിയ വിജയമാകുമെന്നതിൽ സംശയമില്ലെന്നും മന്ത്രി പറഞ്ഞു.

ഡിജിറ്റൽവൽക്കരണം പൂർത്തിയാകുന്നു

ടിക്കറ്റ് നൽകുന്നത് മുതൽ തുടങ്ങി കെഎസ്ആർടിസിയുടെ എല്ലാ കാര്യങ്ങളും ഡിജിറ്റലൈസ് ചെയ്യുന്ന നടപടികൾ പുരോഗമിക്കുകയാണ്. ഗ്രാമപ്രദേശങ്ങളിൽ ഓടുന്ന ബസ്സുകളിൽ പോലും വൈഫൈ സൗകര്യം ലഭ്യമാക്കുമെന്ന് മന്ത്രി ഗണേഷ് കുമാർ പറഞ്ഞു. കെഎസ്ആർടിസിയുടെ വളർച്ചയിൽ മുഖ്യമന്ത്രി വഹിച്ചിട്ടുള്ള പങ്ക് വളരെ വലുതാണ്. ഇന്ന് കെഎസ്ആർടിസി ജീവനക്കാർക്ക് എല്ലാ മാസവും ഒന്നാം തീയതി ശമ്പളം ലഭിക്കുന്നുണ്ടെങ്കിൽ അത് മുഖ്യമന്ത്രിയുടെ പിന്തുണ കൊണ്ടുമാത്രമാണെന്നും മന്ത്രി പറഞ്ഞു. മുഖ്യമന്ത്രി കെഎസ്ആർടിസിയോട് കാണിക്കുന്ന പ്രത്യേക പരിഗണനയാണ് ഇത്രയും പുതിയ വണ്ടികൾ വാങ്ങാൻ സാധിച്ചതെന്നും ഇന്ത്യയിൽ ലഭ്യമായ ഏറ്റവും മികച്ച വണ്ടികൾ വാങ്ങാൻ സഹായിച്ചത് അദ്ദേഹത്തിന്റെ ദീർഘവീക്ഷണമാണെന്നും മന്ത്രി കൂട്ടിച്ചേർത്തു.

ചടങ്ങിൽ വിദ്യാർഥികൾക്കായി സ്റ്റുഡന്റ്‌സ് ട്രാവൽ കാർഡിന്റെ പ്രകാശനവും വിതരണവും മുഖ്യമന്ത്രി നിർവഹിച്ചു. വിപുലീകരിച്ച കമ്പ്യൂട്ടർ അധിഷ്ഠിത ബാർകോഡ് ഇൻവെന്ററി സംവിധാനത്തിന്റെയും ഡിജിറ്റൽ ക്ലോക് റൂമിന്റെയും ഉദ്ഘാടനം മന്ത്രി കെ.ബി. ഗണേഷ് കുമാർ നിർവഹിച്ചു. കരിക്കകം വാർഡ് കൗൺസിലർ ഡി.ജി കുമാരൻ, കെഎസ്ആർടിസി ചെയർമാൻ & മാനേജിംഗ് ഡയറക്ടർ ഡോ. പി.എസ്. പ്രമോജ് ശങ്കർ തുടങ്ങിയവർ ചടങ്ങിൽ പങ്കെടുത്തു. എസി സ്ലീപ്പർ, സീറ്റർ, സ്ലീപ്പർ കം സീറ്റർ, പ്രീമിയം സൂപ്പർ ഫാസ്റ്റ്, ഫാസ്റ്റ് പാസഞ്ചർ, ജില്ലകളെ ബന്ധിപ്പിക്കുന്ന ലിങ്ക് ബസ്, മിനി ബസ് എന്നിങ്ങനെ അത്യാധുനിക സുരക്ഷാ സംവിധാനങ്ങളും യാത്രാ സൗകര്യങ്ങളുമുള്ള ബസ്സുകളാണ് കെഎസ്ആർടിസി നിരത്തിലിറക്കുന്നത്.

കെഎസ്ആർടിസിയുടെ ഈ മുന്നേറ്റത്തെക്കുറിച്ച് നിങ്ങളുടെ കൂട്ടുകാരുമായി പങ്കുവെക്കുക.

Article Summary: KSRTC modernizes fleet with 143 new buses and digitalization.

#KSRTC #Kerala #PinarayiVijayan #GaneshKumar #PublicTransport #Modernization