കട്ടപ്പന: (KVARTHA) രോഗക്കിടക്കയിലായ ഭാര്യയെ ശുശ്രൂഷിക്കാൻ ജോലി ഉപേക്ഷിക്കാനായിരുന്നു വണ്ടൻമേട് പൊലീസ് സ്റ്റേഷനിലെ എസ്.ഐ കെ. അശോകന്റെ തീരുമാനം. വിരമിക്കാൻ ഒരു വർഷം ബാക്കിനിൽക്കെയാണ് വെള്ളയാംകുടി പുത്തൻപുരയ്ക്കൽ അശോകൻ സ്വയം വിരമിച്ചത്.

സഹപ്രവർത്തകർ ഞായറാഴ്ച (31.08.2025) ആശുപത്രിയിലെത്തി എസ്.ഐക്ക് അപൂർവമായ യാത്രാ അയപ്പ് ഒരുക്കി. കെ.എസ്.എഫ്.ഇ. കട്ടപ്പന ശാഖയിലെ അസിസ്റ്റന്റ് മാനേജരായ അദ്ദേഹത്തിന്റെ ഭാര്യ ജയന്തിക്ക് മൂന്ന് മാസം മുൻപാണ് പക്ഷാഘാതം വന്നത്. ആദ്യം വലതുവശം തളർന്നപ്പോൾ ചികിത്സയിലൂടെ ആരോഗ്യസ്ഥിതി മെച്ചപ്പെടുത്തി. എന്നാൽ, അതിനിടെ ഇടതുവശം തളർന്നു. ശസ്ത്രക്രിയയ്ക്ക് ശേഷം എറണാകുളം അമൃത ആശുപത്രിയിൽ കഴിയുന്ന ഭാര്യയെ പരിചരിക്കാൻ അശോകൻ മറ്റാരെയും തേടിയില്ല. ഓഗസ്റ്റ് ആദ്യം തന്നെ വി.ആർ.എസ്-ന് അപേക്ഷ നൽകി. ഞായറാഴ്ചയായിരുന്നു അദ്ദേഹത്തിന്റെ ജോലിയിലെ അവസാനദിവസം.

ഭാര്യയുടെ അടുത്തുനിന്ന് മാറിനിൽക്കാൻ കഴിയാത്തതിനാൽ സ്റ്റേഷനിലെ യാത്രാ അയപ്പ് ചടങ്ങിന് എത്താൻ അശോകന് കഴിഞ്ഞില്ല. അതോടെയാണ് 32 വർഷത്തെ സേവനം അവസാനിപ്പിക്കുന്ന അദ്ദേഹത്തിന് ആശുപത്രിയിലെത്തി യാത്രാ അയപ്പ് നൽകാൻ സഹപ്രവർത്തകർ തീരുമാനിച്ചത്. ആശുപത്രി അധികൃതർ ഇതിന് സൗകര്യമൊരുക്കി. ഇവരുടെ ഏകമകൻ അഖിൽ അശോക് തിരുവനന്തപുരത്ത് സിവിൽ സർവീസസ് പരീക്ഷാ പരിശീലനത്തിലാണ്. വണ്ടൻമേട് എസ്.എച്ച്.ഒ എ. ഷൈൻകുമാർ, എസ്.ഐ വിനോദ്കുമാർ എന്നിവരുടെ നേതൃത്വത്തിലായിരുന്നു യാത്രയയപ്പ് ചടങ്ങ് നടന്നത്.
 

സ്വന്തം കുടുംബത്തിന് വേണ്ടി ജോലി ഉപേക്ഷിക്കുന്നതിനോട് നിങ്ങൾ യോജിക്കുന്നുണ്ടോ? അഭിപ്രായങ്ങൾ പങ്കുവയ്ക്കുക.

Article Summary: Kerala SI retires early to care for ailing wife.

#KeralaPolice #Kattappana #Humanity #Sacrifice #FamilyFirst #Inspiration