തിരുവനന്തപുരം: (KVARTHA) ദേശീയപാത നിർമ്മാണത്തിലെ അപാകതകളെച്ചൊല്ലി സംസ്ഥാന സർക്കാരിനും പൊതുമരാമത്ത് വകുപ്പ് മന്ത്രിക്കുമെതിരെ രൂക്ഷവിമർശനവുമായി പ്രതിപക്ഷ നേതാവ് വി.ഡി. സതീശൻ. ദേശീയപാതയിൽ അൻപതോളം ഇടങ്ങളിൽ വിള്ളലുണ്ടായിട്ടുണ്ടെന്ന് ചൂണ്ടിക്കാട്ടിയ സതീശൻ, ഈ വിഷയത്തിൽ മന്ത്രി പി.എ. മുഹമ്മദ് റിയാസ് റീൽസ് ഇടട്ടെ എന്നും പരിഹസിച്ചു. ദേശീയപാത നിർമ്മാണവുമായി സംസ്ഥാന സർക്കാരിന് യാതൊരു ബന്ധവുമില്ലെന്ന് ഇപ്പോൾ പറയുന്നതിനെ 'നാണക്കേട് മറയ്ക്കാനുള്ള ശ്രമം' എന്നും സതീശൻ വിശേഷിപ്പിച്ചു.

'കൂരിയാടല്ല, പലയിടത്തും വിള്ളൽ'

കൂരിയാട് മാത്രമല്ല, തിരുവനന്തപുരത്തും കൊല്ലത്തും ഉൾപ്പെടെ പലയിടത്തും ദേശീയപാതയിൽ വിള്ളൽ വീണിട്ടുണ്ടെന്ന് സതീശൻ പറഞ്ഞു. അവിടെയൊക്കെ പോയി മന്ത്രി റീൽസ് ഇടട്ടെ. അതൊക്കെ കേരളത്തിലെ ജനങ്ങൾ കാണട്ടെ. നാണക്കേട് മറയ്ക്കാൻ വേണ്ടി മന്ത്രി എന്തൊക്കെയോ പറയുകയാണെന്നും അദ്ദേഹം കൂട്ടിച്ചേർത്തു.

പാലാരിവട്ടം പാലത്തിന് അപാകതയുണ്ടെന്ന റിപ്പോർട്ടിന്റെ പേരിൽ വിജിലൻസ് കേസ് എടുത്ത സർക്കാരിന് ഇപ്പോൾ കേന്ദ്രത്തിനെതിരെ ഒരു കേസും എടുക്കാൻ താൽപര്യമില്ലെന്നും സതീശൻ വിമർശിച്ചു. വിള്ളൽ അടച്ചാൽ മതിയെന്നാണ് പറയുന്നത്. വലിയ മഴ വരാനിരിക്കുകയാണെന്നും, വലിയ വിള്ളലുകളും കാണാനിരിക്കുന്നേയുള്ളൂവെന്നും സതീശൻ മുന്നറിയിപ്പ് നൽകി.

വിഴിഞ്ഞം പദ്ധതിയും, 'എട്ടുകാലി മമ്മൂഞ്ഞ്' ശ്രമവും

മുൻ മുഖ്യമന്ത്രി ഉമ്മൻ ചാണ്ടി കൊണ്ടുവന്ന വിഴിഞ്ഞം പദ്ധതിയുടെ ക്രെഡിറ്റ് എടുക്കാൻ ശ്രമിച്ചതുപോലെയാണ് ഇപ്പോൾ കേന്ദ്രപദ്ധതിയുടെ ക്രെഡിറ്റ് എടുക്കാൻ സർക്കാർ ശ്രമിക്കുന്നതെന്നും സതീശൻ ആരോപിച്ചു. റോഡ് നിർമ്മാണത്തിൽ അപാകതയുണ്ടെന്ന് കോൺഗ്രസ് രേഖാമൂലം എഴുതി നൽകിയിരുന്നു. തിരഞ്ഞെടുപ്പിനു മുൻപ് പദ്ധതി നടപ്പാക്കിയെന്ന് വരുത്തി 'എട്ടുകാലി മമ്മൂഞ്ഞാകാൻ' ശ്രമിച്ചതാണെന്നും, അതുപക്ഷേ നാലാം വാർഷികത്തിൽ പൊളിഞ്ഞു താഴെ വീണുവെന്നും സതീശൻ പരിഹസിച്ചു. യുപിഎ സർക്കാർ കൊണ്ടുവന്ന റൈറ്റ് ടു ഫെയർ കോംപൻസേഷൻ ആക്ട് ഉപയോഗപ്പെടുത്തിയതുകൊണ്ടാണ് നല്ല വില കൊടുത്ത് സ്ഥലം ഏറ്റെടുക്കാൻ കഴിഞ്ഞതെന്നും സതീശൻ ചൂണ്ടിക്കാട്ടി.

ദേശീയപാതയിലെ വിള്ളൽ വിഷയത്തിൽ സർക്കാരിന്റെ നിലപാടുകളെക്കുറിച്ച് നിങ്ങളുടെ അഭിപ്രായം എന്താണ്? വാര്‍ത്ത സുഹൃത്തുക്കളുമായി പങ്കുവെക്കൂ.

Article Summary: Opposition leader V.D. Satheesan criticized Kerala PWD Minister P.A. Muhammad Riyas over cracks in the national highway, accusing the government of trying to cover up failures and take credit for central projects.

#KeralaPolitics #NationalHighway #VDsatheesan #PAMuhammedRiyas #Infrastructure #Roads