കൊല്ലം/കൊച്ചി: (KVARTHA) അറബിക്കടലിൽ കൊച്ചി തീരത്തിന് സമീപം മുങ്ങിത്താഴ്ന്ന ചരക്കുകപ്പലായ എം.എസ്.സി എൽസ 3-ൽ നിന്ന് കടലിൽ വീണ നൂറോളം കണ്ടെയ്‌നറുകളിൽ കൂടുതൽ എണ്ണം കേരള തീരത്തേക്കടുക്കുന്നതായി മുന്നറിയിപ്പ്. പുലർച്ചെയോടെ കൊല്ലം തീരദേശത്തെ വിവിധയിടങ്ങളിൽ എട്ട് കണ്ടെയ്‌നറുകൾ തീരത്തടിഞ്ഞതോടെ സംസ്ഥാനത്ത് അതീവ ജാഗ്രത തുടരുകയാണ്. മുങ്ങിയ കപ്പലിൽ അവശേഷിക്കുന്ന 250 ടൺ കാത്സ്യം കാർബൈഡ് നിറച്ച കണ്ടെയ്‌നറുകൾ സ്ഫോടന ഭീഷണി ഉയർത്തുന്ന സാഹചര്യത്തിൽ ജനങ്ങൾ അതീവ ശ്രദ്ധ പുലർത്തണമെന്ന് ദുരന്ത നിവാരണ അതോറിറ്റി മുന്നറിയിപ്പ് നൽകി. ആലപ്പുഴ തീരത്തും കണ്ടെയ്‌നറുകൾ അടിയാൻ സാധ്യതയുണ്ടെന്നും അധികൃതർ അറിയിച്ചു.

തീരത്തടിഞ്ഞ കണ്ടെയ്‌നറുകൾ

അർധരാത്രിയോടെ കൊല്ലം കരുനാഗപ്പള്ളിയിലെ ചെറിയഴീക്കലിലാണ് ആദ്യ കണ്ടെയ്‌നർ തീരത്തടിഞ്ഞത്. ഇതിനുപിന്നാലെ കൊല്ലം ചവറയിലെ പരിമണം തീരത്തും ശക്തികുളങ്ങരയിലും (മദാമ്മ തോപ്പ്) കണ്ടെയ്‌നറുകൾ അടിഞ്ഞു. ചവറയിലും ശക്തികുളങ്ങരയിലുമായി മൂന്ന് കണ്ടെയ്‌നറുകളാണ് തീരത്തടിഞ്ഞത്. നീണ്ടകര ആൽത്തറമൂട് ഭാഗത്തും ഒരു കണ്ടെയ്‌നർ കണ്ടെത്തി. രാവിലെ നാല് മണിയോടെ ആലപ്പാട് തീരത്തും കണ്ടെയ്‌നർ അടിഞ്ഞു. അഞ്ച് മണിയോടെ നീണ്ടകര പരിമണം ഭാഗത്ത് മൂന്ന് കണ്ടെയ്‌നറുകൾ കൂടി കണ്ടെത്തിയതോടെ ആകെ എട്ട് കണ്ടെയ്‌നറുകളാണ് ഇതുവരെ കൊല്ലം തീരത്തടിഞ്ഞിട്ടുള്ളത്.

ഈ കണ്ടെയ്‌നറുകളിൽ ചിലതിന്റെ ഡോർ തുറന്ന നിലയിലായിരുന്നു. എന്നാൽ സാധനങ്ങളൊന്നും കണ്ടെത്താനായില്ല. മത്സ്യത്തൊഴിലാളികളാണ് കണ്ടെയ്‌നറുകൾ തീരത്തടിഞ്ഞത് ആദ്യം കണ്ടതും അധികൃതരെ വിവരമറിയിച്ചതും. ജില്ലാ കളക്ടർ എൻ. ദേവിദാസ്, സിറ്റി പോലീസ് കമ്മിഷണർ കിരൺ നാരായണൻ എന്നിവരുടെ നേതൃത്വത്തിൽ അധികൃതർ സ്ഥലത്തെത്തി പരിശോധന നടത്തി. സമീപത്തെ വീട്ടുകാരെ സുരക്ഷിത സ്ഥാനങ്ങളിലേക്ക് മാറ്റിപ്പാർപ്പിച്ചിട്ടുണ്ട്.

കാത്സ്യം കാർബൈഡ് ഭീഷണി

കൊച്ചി തീരത്തുനിന്ന് 38 നോട്ടിക്കൽ മൈൽ ദൂരെയാണ് 640 കണ്ടെയ്‌നറുകളുമായി എത്തിയ ചരക്കുകപ്പൽ മുങ്ങിയത്. മുങ്ങിത്താഴ്ന്ന കപ്പലിനുള്ളിൽ ഇപ്പോഴും 250 ടണ്ണോളം കാത്സ്യം കാർബൈഡ് നിറച്ച കണ്ടെയ്‌നറുകൾ ഉണ്ടെന്നാണ് വിലയിരുത്തൽ. ഈ കണ്ടെയ്‌നറുകളിൽ വെള്ളം കടന്നാൽ കാത്സ്യം കാർബൈഡുമായി കൂടിക്കലർന്ന് അസറ്റലീൻ വാതകം ഉണ്ടാവുകയും അതുവഴി വലിയ സ്ഫോടനത്തിന് സാധ്യതയുണ്ടെന്നും മുന്നറിയിപ്പുണ്ട്. അതുകൊണ്ടുതന്നെ അതീവ ജാഗ്രതയോടെയാണ് വിവിധ ഏജൻസികളുടെ നീക്കം. കപ്പലിലുണ്ടായിരുന്ന 643 കണ്ടെയ്‌നറുകളിൽ 73 എണ്ണവും കാലിയായിരുന്നു. 13 എണ്ണത്തിൽ കാത്സ്യം കാർബൈഡ് ഉൾപ്പെടെയുള്ള രാസവസ്തുക്കളുണ്ടെന്ന് കസ്റ്റംസ് വെളിപ്പെടുത്തി.

ദുരന്ത നിവാരണ അതോറിറ്റിയുടെ നിർദേശങ്ങൾ

കണ്ടെയ്‌നറുകൾ കണ്ടെത്തിയാൽ പൊതുജനങ്ങൾ യാതൊരു കാരണവശാലും അതിന്റെ അടുത്തേക്ക് പോകാനോ തൊടാൻ ശ്രമിക്കാനോ പാടില്ലെന്ന് സംസ്ഥാന ദുരന്ത നിവാരണ അതോറിറ്റി ആവർത്തിച്ച് മുന്നറിയിപ്പ് നൽകി. 'എം.എസ്.സി എൽസ-3' എന്ന കപ്പലിൽ നിന്നുള്ള വസ്തുക്കൾ എന്ന് തോന്നുന്നവ തീരത്ത് അടിഞ്ഞത് കണ്ടാൽ ഉടൻതന്നെ 112-ൽ അറിയിക്കണം. ചുരുങ്ങിയത് 200 മീറ്റർ എങ്കിലും മാറിനിൽക്കാനും കൂട്ടം കൂടി നിൽക്കരുതെന്നും അധികൃതർ വസ്തുക്കൾ മാറ്റുമ്പോൾ തടസ്സം സൃഷ്ടിക്കരുതെന്നും നിർദേശമുണ്ട്.

കസ്റ്റംസിന്റെ നടപടികൾ

മുങ്ങിയ കപ്പലിൽനിന്നുള്ള കണ്ടെയ്‌നറുകൾ കരതൊട്ടാൽ കസ്റ്റംസ് കസ്റ്റഡിയിലെടുക്കും. കസ്റ്റംസ് നിയമമനുസരിച്ച് ഈ കണ്ടെയ്‌നറുകൾ കേരള തീരം തൊട്ടാൽ പൂർണ്ണ ഉത്തരവാദിത്തം കസ്റ്റംസിനാണ്. തീരുവ അടയ്ക്കാതെ കൊണ്ടുവന്നിട്ടുള്ള ചരക്കുകളാണ് കപ്പലിലുള്ളത്. ഇതിൽനിന്ന് ചരക്കുകൾ മാറ്റുന്നത് നിയമവിരുദ്ധമാണ്. കണ്ടെയ്‌നറുകൾ കണ്ടെത്താനും നിരീക്ഷിക്കാനും കസ്റ്റംസ് മറൈൻ ആൻഡ് പ്രിവന്റീവ് യൂണിറ്റുകളെ കേരള തീരത്ത് വിന്യസിച്ചിട്ടുണ്ട്. കരതൊടുന്നതനുസരിച്ച് സംഘമെത്തി കണ്ടെയ്‌നറുകൾ പരിശോധിക്കുകയും അപകടകരമല്ലാത്ത വസ്തുക്കളുള്ളവ കൊച്ചി തുറമുഖത്തേക്ക് എത്തിക്കുകയും ചെയ്യും. അല്ലെങ്കിൽ സമീപത്തെ കസ്റ്റംസ് ഓഫീസിന്റെ കസ്റ്റഡിയിലാകും.

ഇതിനുശേഷം കാർഗോയുടെ കസ്റ്റംസ് ഏജന്റിനെ വിളിപ്പിക്കുകയും 'ബിൽ ഓഫ് എൻട്രി' അഥവാ കണ്ടെയ്‌നറുകളിൽ എന്തൊക്കെയാണെന്ന് രേഖപ്പെടുത്തിയിരിക്കുന്നത് പരിശോധിക്കുകയും ചെയ്യും. എം.എസ്.സി മെഡിറ്ററേനിയൻ ഷിപ്പിംഗ് തന്നെയാണ് ഏജന്റ്. ബില്ലിൽ രേഖപ്പെടുത്താത്ത വസ്തുക്കൾ ഉണ്ടോയെന്നതാണ് പ്രധാന പരിശോധന. ഇതിനെല്ലാം കപ്പൽ ഉടമകൾ നികുതിയടയ്‌ക്കേണ്ടി വരും. അപകടകരമായ വസ്തുക്കളടങ്ങിയ കണ്ടെയ്‌നറുകൾ കൈകാര്യം ചെയ്യുന്നത് സർക്കാർ നിർദ്ദേശമനുസരിച്ചായിരിക്കും.

എണ്ണപ്പാട നീക്കം തുടരുന്നു

അതേസമയം, കപ്പലിൽ നിന്ന് ഒഴുകിപ്പടർന്ന എണ്ണപ്പാട നീക്കം ചെയ്യുന്നത് തുടരുകയാണ്. കോസ്റ്റ് ഗാർഡിന്റെ രണ്ട് കപ്പലുകളും ഡോണിയർ വിമാനങ്ങളും ഉപയോഗിച്ചാണ് എണ്ണപ്പാട നീക്കം ചെയ്യാനുള്ള ശ്രമം തുടരുന്നത്. എണ്ണപ്പാട എവിടെ വേണമെങ്കിലും എത്താം എന്നതിനാൽ കേരള തീരത്ത് പൂർണ്ണ ജാഗ്രതാ നിർദേശം നൽകിയിട്ടുണ്ട്. കപ്പൽ മുങ്ങിയ ഭാഗത്തുനിന്ന് 20 നോട്ടിക്കൽ മൈൽ പ്രദേശത്ത് ആരും മത്സ്യബന്ധനത്തിന് പോകരുതെന്നും മുന്നറിയിപ്പുണ്ട്. എണ്ണപ്പാട തീരത്ത് എത്തിയാൽ കൈകാര്യം ചെയ്യാൻ മലിനീകരണ നിയന്ത്രണ ബോർഡിന്റെ നേതൃത്വത്തിൽ രണ്ട് വീതം റാപ്പിഡ് റെസ്‌പോൺസ് ടീമുകളെയും സജ്ജമാക്കിയിട്ടുണ്ട്.

കടൽ മലിനീകരണം ഒരു വലിയ ഭീഷണിയാണ്. എംഎസ്സി എൽസ 3 കപ്പൽ അപകടത്തെക്കുറിച്ചുള്ള ഈ വാർത്ത ഷെയർ ചെയ്യൂ.

Article Summary: More containers from the sunken cargo ship MSC Elsa 3 have washed ashore in Kollam, Kerala. The coast is on high alert due to oil spill and calcium carbide explosion risks.

#KeralaCoast #OilSpill #ContainerCrisis #CalciumCarbide #MarinePollution #CoastalAlert