സമഗ്ര വോട്ടർ പട്ടിക പരിഷ്‌കരണം ചോദ്യം ചെയ്യാൻ കേരളം സുപ്രീം കോടതിയിലേക്ക്; സർവകക്ഷി യോഗത്തിൽ തീരുമാനം

തിരുവനന്തപുരം: (KVARTHA) കേരളത്തിൽ സമഗ്ര വോട്ടർ പട്ടിക പരിഷ്‌കരണം അഥവാ എസ്ഐആർ Special Intensive Revision) നടപ്പാക്കുന്നത് നിയമപരമായി ചോദ്യം ചെയ്യാൻ മുഖ്യമന്ത്രി പിണറായി വിജയൻ്റെ അധ്യക്ഷതയിൽ ചേർന്ന സർവകക്ഷി യോഗം തീരുമാനിച്ചു. തീവ്ര വോട്ടർ പട്ടിക പരിഷ്‌കരണത്തിനെതിരെ സുപ്രീം കോടതിയെ സമീപിക്കാനാണ് സംസ്ഥാന സർക്കാർ ഒരുങ്ങുന്നത്. യോഗത്തിൽ പങ്കെടുത്ത ബിജെപി ഒഴികെയുള്ള എല്ലാ കക്ഷികളും സർക്കാർ തീരുമാനത്തെ പൂർണമായും പിന്തുണച്ചുവെന്നത് ശ്രദ്ധേയമാണ്. സംസ്ഥാനത്ത് തദ്ദേശ സ്വയംഭരണ തിരഞ്ഞെടുപ്പ് ആസന്നമായിരിക്കുന്ന പശ്ചാത്തലത്തിലാണ് സർക്കാരിൻ്റെ ഈ നിർണ്ണായക നീക്കം.

എസ്ഐആർ അശാസ്ത്രീയമെന്ന് മുഖ്യമന്ത്രി

എസ്ഐആർ ചോദ്യം ചെയ്യാനുള്ള നിയമോപദേശം സർക്കാർ എന്ന നിലയിലും രാഷ്ട്രീയ പാർട്ടി എന്ന നിലയിലും തേടുമെന്ന് മുഖ്യമന്ത്രി യോഗത്തെ അറിയിച്ചു. കഴിഞ്ഞ ലോക്‌സഭാ തിരഞ്ഞെടുപ്പ് സമയത്ത് പുതുക്കിയ വോട്ടർ പട്ടിക നിലവിലിരിക്കേ, 2002-ലെ പട്ടിക അടിസ്ഥാനമാക്കി സമഗ്ര വോട്ടർ പട്ടിക പരിഷ്കരണം നടപ്പാക്കാനുള്ള നീക്കം അശാസ്ത്രീയവും ദുരുദ്ദേശപരവുമാണ് എന്ന് മുഖ്യമന്ത്രി പിണറായി വിജയൻ പറഞ്ഞു. 2002 ലെ തിരഞ്ഞെടുപ്പ് പട്ടിക ആധാരമാക്കി വോട്ടർ പട്ടിക പരിഷ്ക്കരിക്കുമ്പോഴുള്ള പ്രയാസങ്ങൾ നിരവധിയാണെന്നും എസ്ഐആർ പ്രത്യേക ഉദ്ദേശ്യത്തോടെ നടപ്പാക്കുന്നതാണെന്നുമുള്ള ആശങ്ക രാഷ്ട്രീയ പാർട്ടികൾ പങ്കുവെച്ചു.

പ്രതിപക്ഷം പിന്തുണ പ്രഖ്യാപിച്ചു

മുഖ്യമന്ത്രി മുന്നോട്ട് വെച്ച നിലപാടിനെ പൂർണമായും പിന്തുണക്കുന്നുവെന്ന് പ്രതിപക്ഷ നേതാവ് വി ഡി സതീശൻ പറഞ്ഞു. കോടതിയിൽ പോയാൽ കേസിൽ കക്ഷിചേരാൻ തയാറാണെന്നും അദ്ദേഹം വ്യക്തമാക്കി. എസ്ഐആറിനെ ഭരണഘടനാ വിരുദ്ധവും ജനാധിപത്യ വിരുദ്ധവുമായ നടപടി എന്നാണ് സിപിഎം സംസ്ഥാന സെക്രട്ടറി എം വി ഗോവിന്ദൻ വിശേഷിപ്പിച്ചത്. മുഖ്യമന്ത്രി പങ്കുവെച്ച ഉത്കണ്ഠയോട് പൂർണമായും യോജിക്കുന്നവെന്നും പ്രതിപക്ഷ നേതാവ് വി.ഡി. സതീശൻ കൂട്ടിച്ചേർത്തു.

കോൺഗ്രസ്സിനെ പ്രതിനിധീകരിച്ച് പി.സി. വിഷ്ണുനാഥ്, ഉഴമലയ്ക്കൽ വേണുഗോപാൽ എന്നിവരും, സിപിഐയിൽ നിന്ന് സത്യൻ മൊകേരി, ഐയുഎംഎല്ലിൽ നിന്ന് പി.കെ. കുഞ്ഞാലിക്കുട്ടി, കേരള കോൺഗ്രസ് (എം)ൽ നിന്ന് സ്‌റ്റീഫൻ ജോർജ്, കേരള കോൺഗ്രസ്സിൽ നിന്ന് പി.ജെ. ജോസഫ്, ജനതാദൾ (സെക്യുലർ)ൽ നിന്ന് മാത്യു ടി. തോമസ്, എൻസിപിയിൽ നിന്ന് തോമസ് കെ. തോമസ്, കേരള കോൺഗ്രസ് (ബി)ൽ നിന്ന് കെ.ജി. പ്രേംജിത്ത്, ആർഎസ്‌പി (ലെനിനിസ്‌റ്റ്)ൽ നിന്ന് ഷാജി. എസ്. പണിക്കർ, കേരള കോൺഗ്രസ് (ജേക്കബ്)ൽ നിന്ന് കെ.ആർ. ഗിരിജൻ, ആർഎസ്‌പിയിൽ നിന്ന് എൻ.കെ. പ്രേമചന്ദ്രൻ, ഐഎൻഎല്ലിൽ നിന്ന് അഹമ്മദ് ദേവർകോവിൽ, ജനാധിപത്യ കേരള കോൺഗ്രസ്സിൽ നിന്ന് ആന്റണി രാജു എന്നിവരും യോഗത്തിൽ പങ്കെടുത്തു. ബിജെപിക്ക് വേണ്ടി കെ. സുരേന്ദ്രനാണ് പങ്കെടുത്തത്.

വോട്ടർ പട്ടിക പരിഷ്‌കരണ വിഷയത്തിൽ നിങ്ങളുടെ അഭിപ്രായം കമൻ്റ് ചെയ്യുക.

Article Summary: Kerala decides to challenge Special Intensive Revision (SIR) of voter list in Supreme Court; all parties except BJP support.

#KeralaPolitics #VoterList #SIR #SupremeCourt #AllPartyMeet #Kerala