തിരുവനന്തപുരം: (KVARTHA) മനുഷ്യജീവന് ഭീഷണിയാകുന്ന അക്രമകാരികളായ മൃഗങ്ങളെ കൊല്ലാൻ അനുമതി നൽകുന്ന ബില്ലിന് മന്ത്രിസഭായോഗം അംഗീകാരം നൽകി. കേന്ദ്ര നിയമത്തിൽ ഭേദഗതി വരുത്തിക്കൊണ്ടാണ് ഈ ബിൽ കൊണ്ടുവരുന്നത്. വരുന്ന നിയമസഭാ സമ്മേളനത്തിൽ ഈ ബിൽ അവതരിപ്പിക്കും. അതോടൊപ്പം വന നിയമത്തിലെ ഭേദഗതി ബില്ലിനും മന്ത്രിസഭായോഗം അംഗീകാരം നൽകിയിട്ടുണ്ട്.

പുതിയ ബിൽ അനുസരിച്ച്, മൃഗങ്ങളെ കൊല്ലാനുള്ള അധികാരം ചീഫ് വൈൽഡ് ലൈഫ് വാർഡന് നൽകാൻ തീരുമാനമായി. വിഷയത്തിൽ താമരശ്ശേരി ബിഷപ്പ് റെമിജിയോസ് ഇഞ്ചനാനിയൽ ഇതിനെ സ്വാഗതം ചെയ്തു. 'നടപ്പാക്കിയാൽ വളരെ മികച്ച തീരുമാനമാണിത്, നേരത്തെ എടുക്കേണ്ട തീരുമാനമായിരുന്നു' എന്നും അദ്ദേഹം പ്രതികരിച്ചു.

നിലവിൽ അപകടകാരിയായ വന്യമൃഗം ജനവാസ മേഖലയിലേക്ക് ഇറങ്ങി ജനങ്ങളെ പരിക്കേൽപ്പിക്കുകയോ കൊല്ലുകയോ ചെയ്താൽ അതിനെ വെടിവെക്കാനുള്ള നടപടിക്രമങ്ങൾ വളരെ സങ്കീർണ്ണമാണ്. മൃഗത്തെ വെടിവെക്കാനുള്ള ഉത്തരവിറക്കുന്നതിന് മുമ്പ് വിദഗ്ദ്ധരടങ്ങിയ ആറംഗ കമ്മിറ്റി യോഗം ചേരണം. ഏത് മൃഗമാണ് ആക്രമണം നടത്തിയത് എന്ന് സി.സി.ടി.വി ദൃശ്യങ്ങൾ ഉൾപ്പെടെയുള്ള തെളിവുകൾ ഉപയോഗിച്ച് കണ്ടെത്തണം. കടുവയാണെങ്കിൽ അത് നരഭോജിയാണെന്ന് ഉറപ്പിക്കണം. ഇത്തരത്തിലുള്ള അനവധി നടപടിക്രമങ്ങൾക്ക് ശേഷം മാത്രമേ ചീഫ് വൈൽഡ് ലൈഫ് വാർഡന് വെടിവെക്കാൻ ഉത്തരവിടാൻ സാധിക്കൂ. എന്നാൽ പുതിയ ബിൽ ഈ നടപടിക്രമങ്ങൾ ലളിതമാക്കാൻ സഹായിക്കുമെന്നാണ് പ്രതീക്ഷ.
 

ഈ വാർത്തയെക്കുറിച്ചുള്ള നിങ്ങളുടെ അഭിപ്രായം താഴെ പങ്കുവെക്കുക! 

Article Summary: Kerala approves bill allowing killing of dangerous animals.

#Kerala #DangerousAnimals #WildlifeLaw #CabinetDecision #AnimalControl