തിരുവനന്തപുരം: (KVARTHA) രണ്ടാം പിണറായി സർക്കാരിന്റെ അവസാന ബജറ്റിൽ സർക്കാർ ജീവനക്കാർക്കും സാധാരണക്കാർക്കും ആശ്വാസമാകുന്ന നിർണായക പ്രഖ്യാപനങ്ങളുമായി ധനമന്ത്രി കെ.എൻ ബാലഗോപാൽ. ഏറെക്കാലമായി സർക്കാർ ജീവനക്കാർ ആവശ്യപ്പെടുന്ന പങ്കാളിത്ത പെൻഷൻ പദ്ധതിക്ക് പകരമായി സംസ്ഥാനത്ത് 'അഷ്വേർഡ് പെൻഷൻ പദ്ധതി' (Assured Pension Scheme) നടപ്പിലാക്കുമെന്ന് മന്ത്രി പ്രഖ്യാപിച്ചു. അടുത്ത സാമ്പത്തിക വർഷം മുതൽ പദ്ധതി നിലവിൽ വരും.

അഷ്വേർഡ് പെൻഷൻ പദ്ധതി

പുതിയ പദ്ധതി പ്രകാരം ജീവനക്കാരന്റെ അവസാന അടിസ്ഥാന ശമ്പളത്തിന്റെ 50 ശതമാനം തുക പരമാവധി പെൻഷനായി ലഭിക്കുന്നുവെന്ന് ഉറപ്പുവരുത്തും. കൂടാതെ ഡി.ആർ (Dearness Relief) അനുവദനീയമാക്കുകയും ചെയ്യും. ജീവനക്കാർക്ക് നിലവിലുള്ള നാഷണൽ പെൻഷൻ സിസ്റ്റത്തിൽ (NPS) നിന്നും അഷ്വേർഡ് പെൻഷനിലേക്ക് മാറാൻ ഓപ്ഷനുണ്ടായിരിക്കും. ജീവനക്കാരുടെയും സർക്കാരിന്റെയും വിഹിതം പ്രത്യേക ഫണ്ടായി കൈകാര്യം ചെയ്യുന്നതിനുള്ള സംവിധാനം ഒരുക്കും. പദ്ധതി ഏപ്രിൽ ഒന്നിന് നടപ്പിൽ വരുത്തുന്നതിനുള്ള വിശദമായ മാർഗനിർദ്ദേശങ്ങൾ ഉൾക്കൊള്ളിച്ച ഉത്തരവ് ഉടൻ പുറത്തിറക്കുമെന്നും മന്ത്രി അറിയിച്ചു.

എം സി റോഡ് വികസനം

സംസ്ഥാനത്തെ ഗതാഗത സൗകര്യം മെച്ചപ്പെടുത്തുന്നതിന്റെ ഭാഗമായി തിരുവനന്തപുരം മുതൽ അങ്കമാലി വരെയുള്ള എം.സി റോഡ് 24 മീറ്റർ വീതിയിൽ നാലുവരിയായി പുനർനിർമിക്കും. ഈ പദ്ധതിയുടെ ഒന്നാം ഘട്ടത്തിനായി കിഫ്ബി (KIIFB) വഴി 5217 കോടി രൂപ വകയിരുത്തി. ഗതാഗതക്കുരുക്ക് ലഘൂകരിക്കുന്നതിനായി കിളിമാനൂർ, നിലമേൽ, ചടയമംഗലം, ആയൂർ, പന്തളം, ചെങ്ങന്നൂർ എന്നീ ബൈപ്പാസുകളുടെ നിർമ്മാണവും വിവിധ ജങ്ഷനുകളുടെ വികസനവും നടപ്പിലാക്കും. കൊട്ടാരക്കര ബൈപ്പാസ് നിർമ്മാണത്തിനായി 110.36 കോടി രൂപയുടെ അനുമതി നൽകിയിട്ടുണ്ടെന്നും ഭൂമി ഏറ്റെടുക്കൽ പുരോഗമിക്കുകയാണെന്നും മന്ത്രി വ്യക്തമാക്കി.

നേറ്റിവിറ്റി കാർഡും ക്ഷേമ പെൻഷനും

എസ്.ഐ.ആർ (SIR) മത ന്യൂനപക്ഷങ്ങളിൽ വലിയ ആശങ്ക ഉണ്ടാക്കുന്നുവെന്നും ഇത് അകറ്റാനായി കേരള സർക്കാർ 'നേറ്റിവിറ്റി കാർഡ്' (Nativity Card) പ്രഖ്യാപിക്കുന്നതായും ധനമന്ത്രി അറിയിച്ചു. ഇതിനായി പുതിയ നിയമ നിർമ്മാണം നടത്തും. മതസാമുദായിക സൗഹൃദം അടയാളപ്പെടുത്താൻ 10 കോടി രൂപ വകയിരുത്തി.

അടുത്ത സാമ്പത്തിക വർഷത്തെ ക്ഷേമ പെൻഷൻ വിതരണത്തിനായി 14,500 കോടി രൂപയാണ് വകയിരുത്തിയത്. സ്ത്രീ സുരക്ഷാ പെൻഷന് 3820 കോടി രൂപയും വകയിരുത്തിയിട്ടുണ്ട്. എൽ.ഡി.എഫ് സർക്കാരിന്റെ കാലത്ത് ക്ഷേമപെൻഷൻ ഘട്ടംഘട്ടമായി ഉയർത്തിയെന്നും ജനസംഖ്യയുടെ 30 ശതമാനത്തിന് വിവിധ ക്ഷേമ ആനുകൂല്യങ്ങൾ നൽകുന്നുണ്ടെന്നും മന്ത്രി പറഞ്ഞു. സംസ്ഥാനത്ത് ഒരു കോടി പേരിലേക്ക് സർക്കാർ സഹായം എത്തുന്നുണ്ടെന്നും അദ്ദേഹം കൂട്ടിച്ചേർത്തു.

മധ്യകേരളത്തിലെ ഗതാഗതക്കുരുക്കിന് ഇതോടെ ശാശ്വത പരിഹാരമാകുമെന്ന് കരുതുന്നുണ്ടോ? നിങ്ങളുടെ അഭിപ്രായം പറയൂ.

Article Summary: Kerala Budget announces Assured Pension Scheme ensuring 50% of last salary as pension. Rs 5217 Crore allocated for 4-laning MC Road. Nativity Card proposed.

#KeralaBudget2026 #AssuredPension #MCRoad #KNBalagopal #KeralaNews #WelfarePension