'സ്വത്തിന് വേണ്ടി വൃദ്ധനായ ഭർത്താവിനെ അതിക്രൂരമായി കൊലപ്പെടുത്തി'; ഭാര്യ റോസമ്മയ്ക്ക് ജീവപര്യന്തം കഠിനതടവും ഒരു ലക്ഷം രൂപ പിഴയും; 'പ്രതി ദയ അർഹിക്കുന്നില്ല'

കണ്ണൂർ: (KVARTHA) ഭര്‍ത്താവിനെ ഇരുമ്പ് പൈപ്പുകൊണ്ട് തലയ്ക്കടിച്ചുകൊന്ന് മൃതദേഹം വലിച്ചിഴച്ച് റോഡില്‍ തള്ളിയ ഭാര്യയുടെ ക്രൂരതയ്ക്ക് നീതിപീഠത്തിൻ്റെ കടുത്ത ശിക്ഷ. വയക്കര മൂളിപ്രയിലെ ചാക്കോച്ചൻ എന്ന കുഞ്ഞുമോനെ തലക്കടിച്ചുകൊന്ന കേസിലാണ് ഭാര്യ റോസമ്മയെ (62) തളിപ്പറമ്പ അഡീഷണല്‍ സെഷന്‍സ് ജഡ്ജ് കെ.എന്‍.പ്രശാന്ത് ജീവപര്യന്തം കഠിനതടവിനും ഒരു ലക്ഷം രൂപ പിഴയൊടുക്കാനും ശിക്ഷിച്ചത്. പിഴയടച്ചില്ലെങ്കില്‍ ഒരു വർഷം കൂടി തടവ് ശിക്ഷ അനുഭവിക്കണം. ജുഡീഷ്യല്‍ കസ്റ്റഡിയില്‍ കഴിഞ്ഞ കാലയളവ് തടവ് ശിക്ഷയില്‍ നിന്ന് ഇളവ് ചെയ്യുമെന്നും കോടതി അറിയിച്ചു.

സ്വത്ത് തർക്കമാണ് കൊലയിലേക്ക് നയിച്ചത്

പയ്യന്നൂരിലെ മെഡിക്കല്‍ സ്റ്റോറില്‍ സെയിൽസ്മാനായിരുന്ന ചാക്കോച്ചൻ 2013 ജൂലായ് അഞ്ചിന് രാത്രിയാണ് കൊല്ലപ്പെട്ടത്. ആറിന് പുലര്‍ച്ചയോടെ മൃതദേഹം റോഡിൽ കാണപ്പെടുകയായിരുന്നു. പെരിങ്ങോം പോലീസാണ് കേസ് രജിസ്റ്റർ ചെയ്തത്. തൻ്റെ വൃദ്ധയായ മാതാവിനെ പരിചരിച്ചിരുന്നത് ചാക്കോച്ചൻ ആയിരുന്നു. അതിനാൽ മൂന്ന് ഏക്കറിലധികം വരുന്ന റബര്‍ത്തോട്ടം ചാക്കോച്ചന്റെ പേരില്‍ മാതാവ് എഴുതി നൽകിയിരുന്നു. ഈ സ്വത്ത് തൻ്റെ പേരിലാക്കണമെന്ന് പറഞ്ഞ് റോസമ്മ ചാക്കോച്ചനുമായി നിരന്തരം വഴക്കുണ്ടാക്കാറുണ്ടായിരുന്നു. ഇങ്ങനെയുള്ള വഴക്കിനിടെ കവുങ്ങിന് മരുന്ന് അടിക്കാനുള്ള യന്ത്രത്തിൻ്റെ ഭാഗമായ ഇരുമ്പ് പൈപ്പ് ഉപയോഗിച്ച് റോസമ്മ ചാക്കോച്ചനെ അടിച്ചുകൊലപ്പെടുത്തിയെന്നാണ് അന്വേഷണസംഘത്തിൻ്റെ കണ്ടെത്തൽ.

ക്രൂരതയും തെളിവ് നശിപ്പിക്കാനുള്ള ശ്രമവും

കൊലപാതകത്തിന് ശേഷം റോസമ്മയുടെ ക്രൂരത തുടർന്നു. മൃതദേഹം വീട്ടിൽ നിന്നും 30 മീറ്ററോളം വലിച്ചിഴച്ച് റോഡിൽ ഉപേക്ഷിക്കുകയാണ് റോസമ്മ ചെയ്തത്. പിന്നീട് വീട്ടിലെ തറയിലും ചുമരിലുമുണ്ടായ രക്തക്കറ കഴുകിക്കളഞ്ഞ റോസമ്മ, ആയുധം ഒളിപ്പിച്ചുവെക്കുകയും സുഗന്ധ വസ്തുക്കൾ വീട്ടിൽ ഉപയോഗിക്കുകയും ചെയ്തു. ഒന്നും സംഭവിക്കാത്തതുപോലെ റോസമ്മ നിൽക്കുകയായിരുന്നു. മാരകായുധം ഉപയോഗിച്ച് ഏഴ് തവണയാണ് റോസമ്മ ഭർത്താവിനെ അക്രമിച്ചത്.

കോടതിയുടെ നിരീക്ഷണങ്ങൾ

പ്രതിക്ക് വേണ്ടി ഹാജരായ അഡ്വ. മാർട്ടിൻ ജോർജ് പ്രതി സ്ത്രീയാണെന്നും രോഗിയാണെന്നും കേസ് അപൂർവങ്ങളിൽ അപൂർവമല്ലെന്നും വാദിച്ചു. അതേസമയം പ്രോസിക്യൂഷന് വേണ്ടി ഹാജരായ അഡ്വ. യു.രമേശൻ കേസ് അപൂർവങ്ങളിൽ അപൂർവമായി കണക്കാക്കി പ്രതിയായ റോസമ്മക്ക് വധശിക്ഷ തന്നെ നൽകണമെന്ന് വാദിച്ചു. എന്നാൽ, അപൂർവങ്ങളിൽ അപൂർവമായ കേസല്ലെങ്കിലും ക്രൂരമായ കൊലയാണ് നടന്നതെന്ന് ജഡ്ജ് കെ.എൻ.പ്രശാന്ത് ചൂണ്ടിക്കാട്ടി. പ്രതിയായ റോസമ്മ ദയ അർഹിക്കുന്നില്ല എന്നായിരുന്നു കോടതിയുടെ നിരീക്ഷണം. വയസുകാലത്ത് പരസ്പരം താങ്ങും തണലുമായി നിൽക്കേണ്ട 60കാരനായ ഭർത്താവിനെയാണ് പ്രതി ക്രൂരമായി കൊലപ്പെടുത്തിയത്. റോസമ്മയുടെ ശാരീരിക-മാനസിക അവശതകളോ മക്കൾക്ക് മറ്റാരുമില്ലെന്ന വാദമോ നിലനിൽക്കില്ലെന്നും ജഡ്ജ് കെ.എൻ.പ്രശാന്ത് പറഞ്ഞു.

24 സാക്ഷികളിൽ 16 പേരെയാണ് കോടതി വിസ്തരിച്ചത്. കഴിഞ്ഞ ദിവസം കേസ് പരിഗണിച്ചപ്പോൾ റോസമ്മയെ കുറ്റക്കാരിയാണെന്ന് കണ്ടെത്തിയിരുന്നു. നേരത്തെ താൻ കുറ്റമൊന്നും ചെയ്തിട്ടില്ലെന്നും രോഗിയായതിനാൽ കുറ്റവിമുക്തയാക്കണമെന്നും റോസമ്മ കോടതി മുൻപാകെ ബോധിപ്പിച്ചിരുന്നുവെങ്കിലും പരിഗണിച്ചിരുന്നില്ല. തളിപ്പറമ്പിൽ അഡീഷണൽ സെഷൻസ് കോടതി പ്രവർത്തനമാരംഭിച്ചതിന് ശേഷമുള്ള ആദ്യ കൊലക്കേസ് വിധിയാണിത്. പ്രോസിക്യൂഷന് വേണ്ടി വിവിധ സമയങ്ങളിൽ അഡ്വ. ഷെറിമോൾ ജോസ്, അഡ്വ. മധു എന്നിവരും ഹാജരായിരുന്നു. ജീവപര്യന്തം തടവും പിഴയും ശിക്ഷ ലഭിച്ച റോസമ്മയെ പൊലീസ് സുരക്ഷയോടെ കണ്ണൂർ പള്ളിക്കുന്നിലുള്ള വനിതാ ജയിലിലേക്ക് മാറ്റി.

ഈ ക്രൂരമായ കൊലപാതക കേസിലെ കോടതി വിധി നീതിയാണോ? നിങ്ങളുടെ അഭിപ്രായങ്ങൾ പങ്കുവെക്കുക.

Article Summary: Wife gets life imprisonment and fine for brutally murdering her husband for property in Kannur.

 #KannurCrime #LifeImprisonment #MurderCase #PropertyDispute #KeralaNews #CourtVerdict