അനീഷ് ജോർജിന്റെ മരണം: അധിക ഭാരം കാരണമാണെന്ന് ആരോപണം; തിങ്കളാഴ്ച ബിഎൽഒമാർ ജോലി ബഹിഷ്‌കരിക്കും

തിരുവനന്തപുരം: (KVARTHA) കണ്ണൂർ പയ്യന്നൂർ ഏറ്റുകുടുക്കയിലെ ബൂത്ത് ലെവൽ ഓഫീസർ (ബിഎൽഒ) അനീഷ് ജോർജിനെ വീട്ടിലെ കിടപ്പുമുറിയിൽ തൂങ്ങിമരിച്ച നിലയിൽ കണ്ടെത്തിയ സംഭവത്തിൽ സംസ്ഥാന വ്യാപകമായി പ്രതിഷേധം. തീവ്ര വോട്ടർ പട്ടിക പരിഷ്‌കരണവുമായി ബന്ധപ്പെട്ട ജോലി സമ്മർദമാണ് മരണത്തിന് കാരണമെന്ന കുടുംബത്തിൻ്റെയും ജീവനക്കാരുടെയും ആരോപണങ്ങളെ തുടർന്നാണ് പ്രതിഷേധം ശക്തമായത്. ഞായറാഴ്ച, രാവിലെ 11 മണിയോടെയാണ് ഏറ്റുകുടുക്കയിലെ വീട്ടിൽ അനീഷിനെ ജീവനൊടുക്കിയ നിലയിൽ കണ്ടെത്തിയത്.

ഇതിൻ്റെ പശ്ചാത്തലത്തിൽ സംസ്ഥാന വ്യാപകമായി തിങ്കളാഴ്ച, ബിഎൽഒമാർ ജോലിയിൽ നിന്ന് വിട്ടുനിന്ന് പ്രതിഷേധിക്കുമെന്ന് സംയുക്ത സമരസമിതി അറിയിച്ചു. ആക്ഷൻ കൗൺസിൽ ഓഫ് സ്റ്റേറ്റ് ഗവൺമെന്റ് എംപ്ലോയീസ് ആൻഡ് ടീച്ചേഴ്‌സിൻ്റെയും അധ്യാപക സർവീസ് സംഘടന സമരസമിതിയുടെയും സംയുക്ത ആഭിമുഖ്യത്തിലാണ് പ്രതിഷേധ പരിപാടികൾ സംഘടിപ്പിക്കുന്നത്.

'ആത്മഹത്യയിലേക്ക് തള്ളിവിടുന്നു'

എസ്ഐആർ പരിപാടിയുടെ പേരിലുള്ള വലിയ സമ്മർദമാണ് ഉദ്യോഗസ്ഥർക്ക് നേരിടേണ്ടിവരുന്നത് എന്നാണ് ജീവനക്കാർ പറയുന്നത്. നിലവിൽ 35,000 ബിഎൽഓമാരെയാണ് ഈ ജോലിക്കായി നിയോഗിച്ചിരിക്കുന്നത്. 'കൂടുതൽ ടാർഗറ്റ് നൽകി മനുഷ്യസാധ്യമല്ലാത്ത ജോലി അടിച്ചേൽപ്പിക്കുകയാണ്' എന്നും 'ഈ സാഹചര്യം ബിഎൽഒമാരെ ആത്മഹത്യയിലേക്ക് തള്ളിവിടുകയാണ്' എന്നും പ്രതിഷേധക്കാർ ചൂണ്ടിക്കാട്ടുന്നു.

പയ്യന്നൂർ നിയോജക മണ്ഡലം 18-ആം നമ്പർ ഏറ്റുകുടുക്ക ബൂത്തിലെ ബൂത്ത് ലെവൽ ഓഫീസറും കുന്നരു എ യു പി സ്കൂളിലെ ഓഫീസ് അറ്റൻഡൻ്റ് അഥവാ ഓഫീസ് സഹായിയുമായിരുന്നു മരിച്ച അനീഷ് ജോർജ്. കടുത്ത സമ്മർദത്തിലാണ് ജോലി ചെയ്യാൻ സാധിക്കുന്നതെന്നാണ് ബിഎൽഒമാരുടെ കൂട്ടായ്മ വ്യക്തമാക്കുന്നത്. തദ്ദേശ തെരഞ്ഞെടുപ്പ് ജോലിയും നിർവഹിക്കേണ്ടി വരുന്നത് കൂടുതൽ സമ്മർദ്ദത്തിലാക്കിയെന്നും പ്രതിഷേധക്കാർ പറയുന്നു.

ഉത്തരവാദിത്തം തെരഞ്ഞെടുപ്പ് കമ്മീഷന്

അനീഷ ജോർജിന്റെ മരണത്തിന്റെ പൂർണ ഉത്തരവാദിത്തം ഇലക്ഷൻ കമ്മീഷനാണെന്നും സമര സമിതി ആരോപിച്ചു. എല്ലാ രാഷ്ട്രീയ പാർട്ടികളും സർവീസ് സംഘടനകളും എസ്ഐആർ നീട്ടിവെക്കാൻ ആവശ്യപ്പെട്ടിട്ടും അതിന് തയ്യാറാകാതെ കുറഞ്ഞ സമയത്തിനകം കൂടുതൽ ജോലി അടിച്ചേൽപ്പിക്കുകയായിരുന്നുവെന്നും അവർ വ്യക്തമാക്കി.

പ്രതിഷേധത്തിന്റെ ഭാഗമായി നാളെ ചീഫ് ഇലക്ടറൽ ഓഫീസിലേക്കും സംസ്ഥാനത്തെ എല്ലാ ജില്ലാ വരണാധികാരികളുടെ ഓഫീസുകളിലേക്കും (കലക്ട്രേറ്റ്) പ്രതിഷേധ മാർച്ച് നടത്തുമെന്നും സംയുക്ത സമരസമിതി അറിയിച്ചു. അതേസമയം, തീവ്ര വോട്ടർ പട്ടിക പരിഷ്‌കരണവുമായി ബന്ധപ്പെട്ട് അനീഷ് ജോലി സമ്മർദ്ദത്തിലായിരുന്നുവെന്ന് കുടുംബാംഗങ്ങളിൽ ചിലർ പറയുന്നുണ്ടെങ്കിലും, വ്യക്തിപരമായ മറ്റു കാരണങ്ങളൊന്നുമില്ലെന്നും കുടുംബം വ്യക്തമാക്കി.

പോലീസ് അന്വേഷണം തുടങ്ങി

ഏറ്റുകുടുക്കയിലെ വീട്ടുകാർ പള്ളിയിൽ പോയ സമയത്താണ് അനീഷ് ജീവനൊടുക്കിയതെന്നാണ് പ്രാഥമിക റിപ്പോർട്ട്. പോലീസ് അസ്വാഭാവിക മരണത്തിന് കേസെടുത്ത് അന്വേഷണം ആരംഭിച്ചിട്ടുണ്ട്. അനീഷിൻ്റെ മരണവുമായി ബന്ധപ്പെട്ട് മുഖ്യ തെരഞ്ഞെടുപ്പ് ഓഫീസർ ജില്ലാ കലക്ടറോട് റിപ്പോർട്ട് തേടിയിട്ടുണ്ട്.

ബിഎൽഒമാർ നേരിടുന്ന ജോലി സമ്മർദ്ദത്തെക്കുറിച്ച് നിങ്ങളുടെ അഭിപ്രായം അറിയിക്കുക.

Article Summary: BLO Anish George died allegedly due to work pressure; 35,000 BLOs to boycott duty Monday.

 #BLOMathrubhumi #KeralaProtest #AnishGeorge #WorkPressure #ElectionDuty #BLOboycott