കണ്ണൂർ: (KVARTHA) ജാതിമത ചിന്തകൾക്കതീതമായി സമൂഹത്തിന്റെ നാനാ തുറകളിൽ നിന്നുള്ള ആയിരത്തി അഞ്ഞൂറോളം ആളുകൾ ഒത്തുചേർന്ന കണ്ണൂർ ആസ്റ്റർ മിംസിന്റെ ഇഫ്താർ സംഗമം ശ്രദ്ധേയമായി. 'വിരുന്ന് 2025' എന്ന പേരിൽ പയ്യാമ്പലം അറേബ്യൻ ബീച്ച് റിസോർട്ടിൽ വെച്ച് നടന്ന ഈ സംഗമം, കണ്ണൂർ പൗരാവലിയുടെ ഒരുമയുടെ വേദിയായി മാറി.

ആത്മസമർപ്പണത്തിന്റെയും ആത്മവിശുദ്ധിയുടെയും നാളുകളിലൂടെ കടന്നുപോകുന്ന വിശ്വാസികൾക്ക് ഐക്യദാർഢ്യം പ്രകടിപ്പിക്കുന്ന മനോഹരമായ ഒത്തുചേരലിനാണ് ഇഫ്താർ വിരുന്ന് സാക്ഷ്യം വഹിച്ചത്. കണ്ണൂർ പ്രസ് ക്ലബ് സെക്രട്ടറി കബീർ കണ്ണാടിപറമ്പ് സ്വാഗത പ്രസംഗം നടത്തി. സയ്യിദ് സഫറുദ്ദീൻ തങ്ങൾ, അബ്ദുൽ റഷീദ്, ഫാ. ജോർജ്ജ് പൈനാടത്ത് എന്നിവർ അനുഗ്രഹ പ്രഭാഷണങ്ങൾ നടത്തി.

ഇത്തരം കൂടിച്ചേരലുകൾ മാനുഷിക മൂല്യങ്ങളുടെ പ്രാധാന്യം വിളിച്ചോതുന്നതാണെന്ന് സയ്യിദ് സഫറുദ്ദീൻ തങ്ങൾ അഭിപ്രായപ്പെട്ടു. വർഗീയതയുടെ അടിസ്ഥാനത്തിൽ സമൂഹത്തെ വേർതിരിക്കാനുള്ള ശ്രമങ്ങളെ ചെറുക്കാൻ ഇത്തരം കൂട്ടായ്മകൾക്ക് സാധിക്കുമെന്നും അദ്ദേഹം കൂട്ടിച്ചേർത്തു. എല്ലാ മതങ്ങളും മാനുഷിക നന്മകളെയാണ് ഉയർത്തിക്കാട്ടുന്നതെന്നും, ആത്മസംസ്കരണത്തിലൂടെ മാനുഷിക മൂല്യങ്ങൾ ഉയർത്താൻ ഈ സംഗമം സഹായിക്കുമെന്നും ഫാ. ജോർജ്ജ് പൈനാടത്ത് പറഞ്ഞു. മനസ്സിൽ നന്മയുള്ളവരുടെ സംഗമമാണ് ഇഫ്താർ വേദിയെന്ന് മന്ത്രി രാമചന്ദ്രൻ കടന്നപ്പള്ളി അഭിപ്രായപ്പെട്ടു.

കണ്ണൂർ കോർപ്പറേഷൻ ഡെപ്യൂട്ടി മേയർ ഇന്ദിരാ പ്രേമാനാഥ്, കണ്ണൂർ സിറ്റി പൊലീസ് കമ്മീഷണർ നിധിൻ രാജ്, കണ്ണൂർ എസിപി രത്നകുമാർ, കണ്ണൂർ എസ് എച്ച് ഒ ശ്രീജിത്ത് കോടേരി, ചക്കരക്കൽ എസ് എച്ച് ഒ ആസാദ്, വിവിധ രാഷ്ട്രീയ പാർട്ടി പ്രതിനിധികളായ മാർട്ടിൻ ജോർജ്, കരീം ചേലേരി, രഘുനാഥ് ഹരിദാസ് കെ പി, താഹിർ സഹദുള്ള, പ്രസ് ക്ലബ് പ്രസിഡന്റ് സി സുനിൽ കുമാർ തുടങ്ങിയവർ സംഗമത്തിൽ പങ്കെടുത്തു.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക. കൂടുതൽ വിവരങ്ങൾക്കായി ഷെയർ ചെയ്യുക.

The Iftar gathering organized by Aster MIMS in Kannur brought together around 1500 people from various walks of life, promoting unity and secularism.

#IftarGathering, #SecularMeeting, #CommunityUnity, #KannurEvents, #AsterMIMS, #ReligiousHarmony