തൃശൂർ: (KVARTHA) കോളജ് വിദ്യാർഥികളെ കാറിടിച്ച് കൊലപ്പെടുത്താൻ ശ്രമിച്ചുവെന്ന കേസിൽ യൂട്യൂബർ മുഹമ്മദ് ഷഹീൻ ഷാ എന്ന 'മണവാളൻ' ഒളിവിൽ പോയതിനെ തുടർന്ന് തൃശൂർ വെസ്റ്റ് പൊലീസ് ലുക്ക് ഔട്ട് സർക്കുലർ പുറത്തിറക്കി. മണവാളൻ മീഡിയ എന്ന യൂട്യൂബ് ചാനലിന്റെ ഉടമയാണ് ഷഹീൻ ഷാ. 

ഏപ്രിൽ 19ന് തൃശൂർ കേരളവർമ കോളജ് റോഡിൽ വെച്ചാണ് കേസിനാസ്പദമായ സംഭവം നടന്നത്. ഇരുചക്ര വാഹനത്തിൽ സഞ്ചരിക്കുകയായിരുന്ന രണ്ട് വിദ്യാർഥികളെ ഷഹീൻ ഷായും സംഘവും കാറിടിച്ച് കൊലപ്പെടുത്താൻ ശ്രമിച്ചുവെന്നാണ് കേസ്. സംഭവത്തിന് ശേഷം ഒളിവിൽ പോയ പ്രതിയെ കണ്ടെത്താൻ പൊലീസിന് സാധിക്കാത്തതിനെ തുടർന്നാണ് ലുക്ക് ഔട്ട് നോട്ടീസ് പുറപ്പെടുവിച്ചത്.

കേരളവർമ കോളജിൽ വെച്ചുണ്ടായ ഒരു തർക്കമാണ് അക്രമത്തിൽ കലാശിച്ചത്. ഷഹീൻ ഷായുടെ നേതൃത്വത്തിലുള്ള പത്തംഗ സംഘം വിദ്യാർഥികളെ ആക്രമിക്കുകയായിരുന്നുവെന്നാണ് പറയുന്നത്. മണ്ണുത്തി സ്വദേശിയായ ഗൗതം കൃഷ്ണയെ ലക്ഷ്യമിട്ടായിരുന്നു അക്രമമെന്നും കാർ വരുന്നതുകണ്ട് സ്കൂട്ടർ റോഡിന്റെ വശത്തേക്ക് ഒതുക്കിയെങ്കിലും ഷഹീനും സംഘവും വാഹനം ഇടിച്ചു കയറ്റുകയും ചെയ്തുവെന്നുമാണ് പരാതി. 

സംഭവത്തിൽ ഗൗതമിനും സുഹൃത്തിനും പരുക്കേറ്റിരുന്നു. യൂട്യൂബറെ കണ്ടെത്താനുള്ള ശ്രമങ്ങൾ വിഫലമായതിനെ തുടർന്നാണ് പൊലീസ് ലുക്ക് ഔട്ട് നോട്ടീസ് പുറപ്പെടുവിച്ചത്.

#Manavalan, #LookOutNotice, #YouTuber, #Thrissur, #AttemptedMurder, #CrimeNews