പെൺകുട്ടിയെ പീഡിപ്പിച്ചു; യുവാവിന് ജീവപര്യന്തവും പിഴയും, അമ്മയ്ക്കും തടവ്
 

കണ്ണൂർ: (KVARTHA) പ്രായപൂർത്തിയാകാത്ത പിന്നോക്കക്കാരിയായ പെൺകുട്ടിയെ പ്രണയം നടിച്ച് ലൈംഗികമായി പീഡിപ്പിച്ച കേസിൽ യുവാവിന് ജീവപര്യന്തം തടവും രണ്ട് ലക്ഷം രൂപ പിഴയും വിധിച്ച് തളിപ്പറമ്പ് അതിവേഗ പോക്സോ കോടതി. കൂടാതെ, ഇരയായ പെൺകുട്ടിയെ മർദ്ദിച്ച പ്രതിയുടെ അമ്മയ്ക്ക് ഒരു വർഷം തടവും ആയിരം രൂപ പിഴയും ശിക്ഷ വിധിച്ചു.

ചേപ്പറമ്പ് പയറ്റുചാൽ ചെമ്പാലക്കുന്നേൽ ഹൗസിൽ സി.ജെ. ജിബിനിനാണ് (24) ജീവപര്യന്തം തടവ് ശിക്ഷിച്ചത്. ഈ ശിക്ഷ കൂടാതെ 12 വർഷം തടവ് കൂടി ഇയാൾ അനുഭവിക്കണം. തളിപ്പറമ്പ് അതിവേഗ പോക്സോ കോടതി ജഡ്ജി ആർ. രാജേഷാണ് വിധി പുറപ്പെടുവിച്ചത്. 

പീഡനക്കേസിലെ പ്രതിയുടെ അമ്മ മിനി ജോസിനാണ് (49) ഒരു വർഷം തടവും 1000 രൂപ പിഴയും വിധിച്ചത്. മൂന്നാം പ്രതിയായ മുത്തശ്ശി മേരി ദേവസ്യയെയും (79), നാലാം പ്രതിയായ പിതാവ് സി.ഡി. ജോസിനെയും (54) കോടതി കുറ്റക്കാരല്ലെന്ന് കണ്ട് വെറുതെ വിട്ടു.

കേസിനാസ്പദമായ സംഭവം നടന്നത് 2022 ജനുവരി 22-നാണ്. ആറളം പോലീസ് സ്റ്റേഷൻ പരിധിയിൽ താമസിച്ചിരുന്ന അന്ന് 17 വയസ്സുള്ള പെൺകുട്ടിയെ ഫേസ്ബുക്കിലൂടെ പരിചയപ്പെട്ട ജിബിൻ പ്രണയത്തിലാണെന്ന് വിശ്വസിപ്പിച്ചു. 

തനിക്ക് സുഖമില്ലെന്നും വന്നു കാണണമെന്നും ഫോണിലൂടെ അറിയിച്ചതിനെ തുടർന്ന്, ഉച്ചയ്ക്ക് 12 മണിയോടെ മറ്റൊരിടത്ത് താമസിക്കുന്ന അമ്മയെ കാണാനെന്ന് പറഞ്ഞ് വീട്ടിൽ നിന്നിറങ്ങിയ പെൺകുട്ടിയെ വൈകുന്നേരം 5:20-ഓടെ ചേപ്പറമ്പ് ടൗണിൽ വെച്ച് കാറിൽ കയറ്റിക്കൊണ്ടുപോയി. തുടർന്ന്, ജിബിന്റെ പിതാവിന്റെ ഉടമസ്ഥതയിലുള്ള വീട്ടിൽ തടങ്കലിൽ പാർപ്പിച്ച് രാത്രി ക്രൂരമായി ബലാത്സംഗം ചെയ്യുകയായിരുന്നു.

വിവരമറിഞ്ഞ് സ്ഥലത്തെത്തിയ ജിബിന്റെ അമ്മ മിനി ജോസും അമ്മൂമ്മ മേരി ദേവസ്യയും പെൺകുട്ടിയെ മർദ്ദിക്കുകയും, പിതാവ് ജോസ് അശ്ലീലഭാഷയിൽ ചീത്ത വിളിച്ച് തല്ലിക്കൊന്ന് കെട്ടിത്തൂക്കുമെന്ന് ഭീഷണിപ്പെടുത്തുകയും ചെയ്തുവെന്നാണ് കേസ്. 

അന്നത്തെ ചെറുപുഴ എസ്.ഐ. എം.പി. ഷാജിയാണ് കേസ് രജിസ്റ്റർ ചെയ്തത്. പെൺകുട്ടി പട്ടികവർഗ്ഗക്കാരിയായതിനാൽ പയ്യന്നൂർ ഡിവൈ.എസ്.പി. ആയിരുന്ന കെ.ഇ. പ്രേമചന്ദ്രനാണ് പ്രതികളെ അറസ്റ്റ് ചെയ്യുകയും കോടതിയിൽ കുറ്റപത്രം സമർപ്പിക്കുകയും ചെയ്തത്. പ്രോസിക്യൂഷന് വേണ്ടി സ്പെഷ്യൽ പ്രോസിക്യൂട്ടർ അഡ്വ. ഷെറിമോൾ ജോസ് ഹാജരായി.

Disclaimer: ഈ വാർത്ത ഔദ്യോഗിക റിപ്പോർട്ടുകളെയും അന്വേഷണങ്ങളെയും അടിസ്ഥാനമാക്കിയുള്ള വസ്തുതകളാണ്.

ഈ വാർത്തയെക്കുറിച്ച് നിങ്ങളുടെ അഭിപ്രായം പങ്കുവെക്കൂ! 

Article Summary: Youth gets life sentence, mother jailed for deception and abuse in Kannur.

#KeralaCrime #KannurNews #JusticeServed #POCSO #LegalVerdict #YouthCrime