വനിതാ മാധ്യമപ്രവർത്തകരുടെ അന്തസ്സ് സംരക്ഷിക്കാൻ യൂണിയൻ രംഗത്ത്

തിരുവനന്തപുരം: (KVARTHA) വനിതാ മാധ്യമപ്രവർത്തകരെ ലക്ഷ്യമിട്ട് സൈബർ ഇടങ്ങളിൽ നടക്കുന്ന ആസൂത്രിതവും അപകീർത്തികരവുമായ ആക്രമണങ്ങൾ തടയാൻ അടിയന്തര നടപടി സ്വീകരിക്കണമെന്ന് കേരള പത്രപ്രവർത്തക യൂണിയൻ (KUWJ) ആവശ്യപ്പെട്ടു. 

സൈബർ ആക്രമണങ്ങൾക്ക് അറുതിവരുത്താനും കുറ്റവാളികളെ അറസ്റ്റ് ചെയ്ത് ശിക്ഷ ഉറപ്പാക്കാനും ആവശ്യപ്പെട്ട് മുഖ്യമന്ത്രി പിണറായി വിജയനും സംസ്ഥാന പോലീസ് മേധാവിക്കും യൂണിയൻ നിവേദനം നൽകി.

സാമൂഹിക മാധ്യമങ്ങളിലൂടെ ചിലർ നടത്തുന്ന അധിക്ഷേപ പ്രചാരണങ്ങളും ആക്രമണങ്ങളും വനിതാ മാധ്യമപ്രവർത്തകർക്ക് കടുത്ത മാനസിക സമ്മർദ്ദവും ആഘാതവുമാണ് സൃഷ്ടിക്കുന്നത്. അതീവ സമ്മർദ്ദമുള്ള തൊഴിൽ സാഹചര്യങ്ങളിൽ ജോലി ചെയ്യുന്ന വനിതാ മാധ്യമപ്രവർത്തകർക്ക് നേരെ നടക്കുന്ന ഈ സൈബർ ലിഞ്ചിംഗ് അവരുടെ സ്വൈര്യജീവിതത്തിനുതന്നെ കടുത്ത ഭീഷണിയുയർത്തുന്നുണ്ട്.

ആരുടെ ഭാഗത്തുനിന്നെങ്കിലും കുറ്റകൃത്യങ്ങൾ സംഭവിച്ചിട്ടുണ്ടെങ്കിൽ, നിയമപരമായ മാർഗ്ഗങ്ങളിലൂടെ ശിക്ഷ ഉറപ്പാക്കാൻ രാജ്യത്ത് നിയമസംവിധാനങ്ങൾ നിലവിലുണ്ട്. അത്തരം സാഹചര്യത്തിൽ, മാധ്യമപ്രവർത്തകരെ സൈബർ ഇടങ്ങളിൽ 'കൊലപ്പെടുത്താൻ' ശ്രമിക്കുന്നത് അനുവദിക്കാനാവില്ലെന്നും പത്രപ്രവർത്തക യൂണിയൻ വ്യക്തമാക്കി. 

പ്രമുഖരായ വനിതാ മാധ്യമപ്രവർത്തകരെ പേരെടുത്ത് പറഞ്ഞും അല്ലാതെയും അധിക്ഷേപിക്കാനും സൈബർ ലിഞ്ചിംഗിനും സൈബർ ഗുണ്ടകൾ ശ്രമിച്ചുകൊണ്ടിരിക്കുകയാണ്. ഈ സൈബർ ക്രിമിനലുകളെ നിയന്ത്രിക്കാൻ ബന്ധപ്പെട്ട രാഷ്ട്രീയ പാർട്ടി നേതൃത്വങ്ങൾ ഇടപെടണമെന്നും യൂണിയൻ ശക്തമായി ആവശ്യപ്പെട്ടു.

വനിതാ മാധ്യമപ്രവർത്തകർക്ക് നേരെയുള്ള സൈബർ ആക്രമണങ്ങളെക്കുറിച്ച് നിങ്ങളുടെ അഭിപ്രായം പങ്കുവെക്കൂ.
 

Article Summary: Journalists' union demands action against cyber attacks on women journalists.
 

#Kerala #CyberCrime #WomenJournalists #KUWJ #MediaFreedom #CyberSafety