റോക്കി എറണാകുളം

(KVARTHA) നഞ്ചക്ക് (Nunchaku) എന്ന വാക്ക് നമ്മൾ കൂടുതലായി കേൾക്കുന്നത് ഷഹബാസ് എന്ന വിദ്യാർത്ഥിയുടെ കൊലപാതകവുമായി ബന്ധപ്പെട്ടാണ്. ഷഹബാസിനെ മർദിക്കാൻ ഉപയോഗിച്ച നഞ്ചക്ക്  കണ്ടെത്തി എന്ന വാർത്തയാണ് ഇപ്പോൾ പുറത്തുവന്നിരിക്കുന്നത്. ഷഹബാസിനെ കൊല്ലാൻ കുറ്റാരോപിതനായ വിദ്യാർഥിക്ക് 'നഞ്ചക്ക്' നൽകിയത് പിതാവാണെന്ന തരത്തിലുള്ള വാർത്തകളും വരുന്നുണ്ട്. നഞ്ചക്ക് ഉൾപ്പെടെയുള്ള ആയുധങ്ങൾ കുറ്റാരോപിതരുടെ കൈവശം എങ്ങനെ എത്തി എന്നതിലും പൊലീസ് അന്വേഷണം നടത്തുന്നുണ്ട്. 

എന്താണ് നഞ്ചക്ക്?

നഞ്ചക്ക് എന്നത് രണ്ട് ചെറിയ മരക്കഷണങ്ങൾ ഒരു ചങ്ങല കൊണ്ടോ, കയറു കൊണ്ടോ ബന്ധിപ്പിച്ച ഒരു പരമ്പരാഗത ആയുധമാണ്. നഞ്ചാക്കിന്റെ ഉത്ഭവം ഒക്കിനാവയിലാണ് (Okinawa). ഇത് പ്രധാനമായും  ഒക്കിനാവൻ കൊബുഡോ (Okinawan Kobudo) എന്ന ആയോധനകലയിൽ നിന്ന് ഉരുത്തിരിഞ്ഞതാണ്. കിഴക്കൻ ഏഷ്യൻ (കൊറിയൻ, ഫിലിപ്പിനോ,ചൈന, ജപ്പാൻ)  ആയോധനകലകളിൽ ഇത് ഉപയോഗിക്കുന്നുണ്ട്. ഇത് പ്രധാനമായും സ്വയം പ്രതിരോധത്തിനായും, പരിശീലനത്തിനായുമാണ് മറ്റ് ആയോധനകലകളിലും (കരാട്ടെ, കുങ്ഫു) ഉപയോഗിക്കുന്നത്.

ഇതിന്റെ പരിശീലനം വേഗത്തിലുള്ള കൈ ചലനങ്ങൾ വികസിപ്പിക്കാനും ശരീരനില മെച്ചപ്പെടുത്താനും സഹായിക്കുന്നു. ഇത് ഉപയോഗിക്കാൻ പരിശീലനം ആവശ്യമാണ്. തെറ്റായി ഉപയോഗിച്ചാൽ ഗുരുതരമായ പരിക്കുകൾക്ക് കാരണമാകും. ഇതിന്റെ ഉപയോഗം പല രാജ്യങ്ങളിലും നിയമവിരുദ്ധമാണ്. പണ്ട് ചൈനയില്‍ കറ്റമെതിക്കാനായി നിഞ്ചാക്ക് എന്ന കാര്‍ഷിക ഉപകരണം ഉപയോഗിച്ചിരുന്നു. ഇതാണ് പിന്നീട് നഞ്ചക്ക് എന്ന പേരില്‍ ലോകമാകെ ആയോധ നവിദ്യയുടെ ഭാഗമായി മാറിയതെന്നാണ് ചരിത്രം. 

പിന്നീട് യുദ്ധങ്ങളിൽ ഇത് ഒരു ആയുധമായി ഉപയോഗിക്കാൻ തുടങ്ങി. ബ്രൂസ് ലീ (Bruce Lee) സിനിമകളിലൂടെ നഞ്ചാക്ക് ലോകമെമ്പാടും പ്രശസ്തമായി. ഇന്ന് നഞ്ചക്ക് കായിക വിനോദങ്ങളിലും ആയോധനകല പരിശീലനങ്ങളിലും ഉപയോഗിക്കുന്നു.

താമരശ്ശേരിയിൽ സഹപാഠിയെ കൊല്ലാൻ നഞ്ചക്ക് കൊടുത്തുവിട്ടത് മുഖ്യപ്രതിയായ വിദ്യാർത്ഥിയുടെ പിതാവെന്നാണ് വിവരം. ക്വട്ടേഷൻ സംഘവുമായി ബന്ധമുണ്ടെന്ന് ആരോപണമുള്ള ഇയാൾ വിദ്യാർത്ഥികൾ ഏറ്റുമുട്ടിയ സമയത്ത് സംഭവ സ്ഥലത്തുണ്ടായിരുന്നതായും സംശയമുണ്ട്. ഇയാൾ ടി.പി വധക്കേസ് പ്രതി ടി.കെ രജീഷിനൊപ്പം നിൽക്കുന്ന ചിത്രവും പുറത്തായിട്ടുണ്ട്. എന്തായാലും കേരളക്കരയാകെ ചർച്ച ചെയ്യപ്പെടുന്ന ഒരു ആയുധമായിരിക്കുന്നു നഞ്ചക്ക്.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

The Nunchaku, a traditional weapon, gained attention due to its association with a recent murder case. It has a deep history and is used in various martial arts across Asia.

#Nunchaku #MartialArts #TraditionalWeapons #SelfDefense #BruceLee #OkinawanKobudo