വാളയാറിൽ ആൾക്കൂട്ട മർദനത്തിന് പിന്നാലെ അതിഥിതൊഴിലാളി മരിച്ച സംഭവത്തിൽ മനുഷ്യാവകാശ കമ്മീഷൻ കേസെടുത്തു

പാലക്കാട്: (KVARTHA) വാളയാർ അട്ടപ്പള്ളത്ത് ആൾക്കൂട്ട മർദനമേറ്റ് അതിഥിതൊഴിലാളി മരിച്ച സംഭവത്തിൽ സംസ്ഥാന മനുഷ്യാവകാശ കമ്മീഷൻ സ്വമേധയാ കേസെടുത്തു. സംഭവത്തെക്കുറിച്ച് പാലക്കാട് ജില്ലാ പൊലീസ് മേധാവി വിശദമായ അന്വേഷണം നടത്തി മൂന്നാഴ്ചയ്ക്കകം റിപ്പോർട്ട് സമർപ്പിക്കണമെന്ന് കമ്മീഷൻ നിർദേശിച്ചു. ഛത്തീസ്ഗഡ് സ്വദേശിയായ രാംനാരായണൻ ബയ്യയാണ് ആൾക്കൂട്ട ആക്രമണത്തിന് ഇരയായി മരിച്ചത്.

കഞ്ചിക്കോട് കിംഫ്രയിൽ ജോലി തേടി എത്തിയ രാംനാരായണൻ ബയ്യ ഒരാഴ്ച മുമ്പാണ് പാലക്കാട് എത്തിയത്. പ്രദേശത്ത് അപരിചിതനായിരുന്ന ഇയാൾ വഴിതെറ്റി അട്ടപ്പള്ളത്ത് എത്തിപ്പെടുകയായിരുന്നു എന്നാണ് പ്രാഥമിക വിവരം. 

മൂന്ന് വർഷം മുമ്പ് ഭാര്യ ഉപേക്ഷിച്ചു പോയതിനെ തുടർന്ന് ഇയാൾ ചില മാനസിക അസ്വാസ്ഥ്യങ്ങൾ പ്രകടിപ്പിച്ചിരുന്നതായും പറയുന്നു. അട്ടപ്പള്ളത്തെ തൊഴിലുറപ്പ് വനിതകളാണ് രാംനാരായണനെ പ്രദേശത്ത് ആദ്യം കണ്ടത്. തുടർന്ന് ഇവർ വിവരമറിയിച്ചതിനെത്തുടർന്ന് സ്ഥലത്തെത്തിയ യുവാക്കൾ ഉൾപ്പെടെയുള്ള സംഘം ഇയാളെ തടഞ്ഞുവെച്ചു.

മോഷ്ടാവാണെന്ന് ആരോപിച്ചായിരുന്നു രാംനാരായണൻ ബയ്യയ്ക്കു നേരെ ആൾക്കൂട്ട വിചാരണയും മർദനവും നടന്നതെന്നാണ് പൊലീസ് വ്യക്തമാക്കുന്നത്. മണിക്കൂറുകൾ നീണ്ട ക്രൂരമായ വിചാരണയാണ് ഇയാൾ നേരിട്ടതെന്ന് പോസ്റ്റ്‌മോർട്ടം റിപ്പോർട്ടിലെ സൂചനകൾ വ്യക്തമാക്കുന്നു. 

മർദനമേറ്റ നിലയിൽ പൊലീസെത്തി ഇയാളെ ജില്ലാ ആശുപത്രിയിൽ പ്രവേശിപ്പിച്ചെങ്കിലും മരണം സംഭവിക്കുകയായിരുന്നു. കണ്ടപ്പോൾ മോഷ്ടാവാണെന്ന് തോന്നിയതിനാലാണ് ഇയാളെ തടഞ്ഞതെന്നാണ് നാട്ടുകാരുടെ പ്രാഥമിക വിശദീകരണം.

സംഭവത്തിൽ അഞ്ച് പേരെ പൊലീസ് ഇതിനകം അറസ്റ്റ് ചെയ്തിട്ടുണ്ട്. കേസിൽ കൂടുതൽ ആളുകൾക്ക് പങ്കുണ്ടോ എന്ന കാര്യം പരിശോധിച്ചു വരികയാണെന്നും കൂടുതൽ അറസ്റ്റ് ഉണ്ടാകുമെന്നും പൊലീസ് അറിയിച്ചു. 

അതേസമയം, രാംനാരായണൻ കള്ളനാണെന്ന ആരോപണം അദ്ദേഹത്തിന്റെ കുടുംബം പൂർണമായും നിഷേധിച്ചു. ജോലി തേടി എത്തിയ തന്റെ ബന്ധുവിനെ ക്രൂരമായി മർദിച്ചു കൊലപ്പെടുത്തുകയായിരുന്നു എന്നാണ് കുടുംബത്തിന്റെ ആരോപണം.

ഈ വാർത്ത ഷെയർ ചെയ്യൂ. നിങ്ങളുടെ അഭിപ്രായം എന്താണ്? കമന്റ് ചെയ്യൂ. 

Article Summary: Kerala Human Rights Commission registered a case on the mob lynching death of a migrant worker in Walayar.

#Walayar #MobLynching #HumanRights #Palakkad #KeralaPolice #MigrantWorker