വിവാഹവാർഷിക ദിനത്തിൽ കുഞ്ഞിനെ കഴുത്തറുത്ത് കൊലപ്പെടുത്തിയ കേസ്; ഭർതൃവീട്ടിലെ ഒറ്റപ്പെടലാണ് കാരണമെന്ന് അമ്മ

വിളവൂർക്കൽ: (KVARTHA) വിളവൂർക്കലിൽ വിവാഹവാർഷിക ദിനത്തിൽ ഒരു വയസ്സുള്ള സ്വന്തം കുഞ്ഞിനെ അമ്മ കഴുത്തറുത്ത് കൊലപ്പെടുത്തിയ കേസിൽ കൂടുതൽ വിവരങ്ങൾ പുറത്ത്. വിളവൂർക്കൽ പൊറ്റയിൽ പുലവന്നിയൂർക്കോണത്ത് നീതു എന്ന ക്രിസ്റ്റി (29) യാണ് ഒരു വയസ്സും ഒരു മാസവും പ്രായമുള്ള മകൾ ഇവാനയെ കഴുത്തറുത്ത് കൊലപ്പെടുത്തിയത് എന്നാണ് കേസ്. 

വ്യാഴാഴ്ച (സെപ്റ്റംബർ 10) ഉച്ചയ്ക്കായിരുന്നു നാടിനെ നടുക്കിയ സംഭവം. ഫാർമസ്യൂട്ടിക്കൽ കമ്പനി ജീവനക്കാരനായ ഭർത്താവ് അഭിജിത് ജോലിക്ക് പോയിരിക്കുകയായിരുന്നു. വ്യാഴാഴ്ച ഇവരുടെ നാലാം വിവാഹവാർഷിക ദിനമായിരുന്നു. 

വീട്ടിൽ ദമ്പതിമാരെ കൂടാതെ അഭിജിത്തിൻ്റെ അച്ഛൻ കുഞ്ഞുമോൻ, അമ്മ ഗേളി, ഇവരുടെ അമ്മ നേശമ്മ, നേശമ്മയുടെ അനുജത്തി ജസീല എന്നിവരും താമസിക്കുന്നുണ്ട്. സംഭവസമയം ജസീലയും ക്രിസ്റ്റിയും മാത്രമാണ് വീട്ടിലുണ്ടായിരുന്നത്. ഉച്ചഭക്ഷണത്തിന് ശേഷം മുറിയിൽക്കയറി വാതിലടച്ച് കുഞ്ഞിനെ ഉറക്കിയതിന് പിന്നാലെയാണ് ക്രിസ്റ്റി കൃത്യം നിർവഹിച്ചതെന്നാണ് പൊലീസ് പറയുന്നത്.

ഒറ്റപ്പെടലും ആത്മഹത്യാശ്രമവും

ഭർതൃവീട്ടിൽ ഒറ്റപ്പെടൽ നേരിടുന്നതിനാലാണ് കുഞ്ഞിനെ കൊലപ്പെടുത്തിയതെന്നാണ് ക്രിസ്റ്റി പൊലീസിനോട് പറഞ്ഞിരിക്കുന്നത്. കുഞ്ഞിനെ കൊന്നശേഷം താനും മരിക്കാൻ തീരുമാനിച്ചിരുന്നതായി ക്രിസ്റ്റി പൊലീസിനോട് പറഞ്ഞു. താൻ മരിച്ചാൽ കുഞ്ഞ് ഒറ്റപ്പെടുമെന്നതിനാലാണ് കുഞ്ഞിനെ കൊന്ന് മരിക്കാൻ തീരുമാനിച്ചതെന്നാണ് മൊഴി. 

വീട്ടുകാർ തന്നെ സംശയത്തോടെയാണ് കണ്ടിരുന്നതെന്നും, കുന്നുകുഴിയിലെ തൻ്റെ സ്വന്തം വീട്ടിലേക്ക് അയക്കാറില്ലെന്നും ക്രിസ്റ്റി ആരോപിക്കുന്നു. കൂടാതെ സ്വന്തം ഇഷ്ടപ്രകാരമുള്ള ആഹാരം പാകംചെയ്യുന്നതിന് പോലും തനിക്ക് അനുവാദമുണ്ടായിരുന്നില്ലെന്നും ഇവർ പൊലീസിനോട് പറഞ്ഞതായി റിപ്പോർട്ടുകളുണ്ട്.

രക്തം വാർന്ന് മരണം

വൈകുന്നേരം 3.30 ആയിട്ടും കുഞ്ഞിനെ പുറത്ത് കാണാത്തതിനാൽ ജസീല കതകിൽ തട്ടി പലവട്ടം വിളിച്ചപ്പോഴാണ് ക്രിസ്റ്റി കതക് തുറന്നത്. ഈ സമയം അനക്കമില്ലാതെ കുഞ്ഞ് കട്ടിലിൽ കിടക്കുകയായിരുന്നു. താൻ കുഞ്ഞിനെ കൊന്നതായി ക്രിസ്റ്റി ജസീലയോട് വെളിപ്പെടുത്തുകയും ചെയ്‌തു. 

ഉടൻ തന്നെ കുഞ്ഞിനെയുമെടുത്ത് ജസീല സമീപത്തുള്ള വിളവൂർക്കൽ പ്രാഥമികാരോഗ്യ കേന്ദ്രത്തിലെത്തിച്ചു. അവിടെനിന്ന് ആംബുലൻസിൽ മെഡിക്കൽ കോളജിലേക്ക് കൊണ്ടുപോയെങ്കിലും കുഞ്ഞ് മരിച്ചിരുന്നു. കഴുത്ത് പാതി അറുത്ത നിലയിലായിരുന്നു. രക്തം വാർന്നൊഴുകി മണിക്കൂറുകൾക്ക് മുൻപുതന്നെ കുഞ്ഞിൻ്റെ മരണം സംഭവിച്ചതായാണ് ഡോക്ടർമാർ വ്യക്തമാക്കിയത്.

പൊലീസ് നടപടികൾ

വിവരമറിഞ്ഞ് സ്ഥലത്തെത്തിയ മലയിൻകീഴ് പൊലീസ് ക്രിസ്റ്റിയെ കസ്റ്റഡിയിലെടുത്തു. സംഭവത്തിന് ഉപയോഗിച്ച അധികം നീളമില്ലാത്ത കത്തി മുറിയിൽനിന്ന് പൊലീസ് കണ്ടെടുത്തു. സിഐ ഉമേഷിൻ്റെ നേതൃത്വത്തിൽ പൊലീസ് വീട് സീൽ ചെയ്തു. കസ്റ്റഡിയിലുള്ള ക്രിസ്റ്റി നിലവിൽ പൊലീസ് നിരീക്ഷണത്തിൽ ആശുപത്രിയിലാണ്.

ശ്രദ്ധിക്കുക: ആത്മഹത്യ ഒന്നിനും പരിഹാരമല്ല, മാനസിക ബുദ്ധിമുട്ടുകൾ ഉണ്ടാകുമ്പോൾ മാനസികാരോഗ്യ വിദഗ്ധരുടെ സഹായം തേടുക. അതിജീവിക്കാൻ ശ്രമിക്കുക. 1056 എന്ന നമ്പറിലോ, 14416 എന്ന നമ്പറിലോ വിളിച്ചാൽ ദിശ കോൾ സെൻ്ററിൽ നിന്ന് മാനസികാരോഗ്യ വിദഗ്ധരുടെ സേവനം ലഭിക്കും

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം.

Article Summary: In a tragic incident in Vilavoorkal on her 4th wedding anniversary (September 10, 2026), 29-year-old Christy allegedly slit the throat of her 13-month-old daughter Ivana. Police report she felt isolated at her husband's home and planned suicide after the crime. Malayinkeezh police took her into custody.

#Kvartha #Vilavoorkal #Malayinkeezh #TrivandrumNews #CrimeNews #KeralaPolice #MurderCase #MalayalamNews #KeralaCrime #MentalHealth #AmmuNews