വിജിലൻസ് ചരിത്രത്തിലെ ഏറ്റവും വലിയ വേട്ട; 15 ലക്ഷം രൂപ കൈക്കൂലി വാങ്ങിയ കാസർകോട് സ്വദേശിയായ ഓവർസീയർ പിടിയിൽ

എറണാകുളം: (KVARTHA) സംസ്ഥാന വിജിലൻസിന്റെ ചരിത്രത്തിലെ ഏറ്റവും ഉയർന്ന തുകയ്ക്കുള്ള ട്രാപ്പ് ഓപ്പറേഷൻ എറണാകുളത്ത് നടന്നു. പുതിയതായി നിർമ്മിച്ച വെയർഹൗസിന് കംപ്ലീഷൻ സർട്ടിഫിക്കറ്റ് അനുവദിക്കുന്നതിനായി 15 ലക്ഷം രൂപ കൈക്കൂലി വാങ്ങിയ ഗ്രാമപഞ്ചായത്ത് ഓവർസീയറെ വിജിലൻസ് സംഘം കയ്യോടെ പിടികൂടി. എറണാകുളം വടവുകോട് പുത്തൻകുരിശ് ഗ്രാമപഞ്ചായത്ത് ഓവർസീയറും കാസർകോട് അമ്പലത്തറ പൊലീസ് സ്റ്റേഷൻ പരിധിയിലെ ദീപേഷ് കുമാറാണ് വിജിലൻസിന്റെ വലയിലായത്. 2026 ഫെബ്രുവരി 24 ചൊവ്വാഴ്ച രാത്രിയാണ് ഈ നാടകീയമായ ഓപ്പറേഷൻ നടന്നത്.

കംപ്ലീഷൻ സർട്ടിഫിക്കറ്റിനായി വിലപേശൽ

എറണാകുളം പനമ്പള്ളി നഗർ സ്വദേശിയായ പരാതിക്കാരൻ തന്റെ ട്രാൻസ്പോർട്ടേഷൻ സ്ഥാപനത്തിന്റെ ആവശ്യത്തിനായി വടവുകോട് പുത്തൻകുരിശ് ഗ്രാമപഞ്ചായത്ത് പരിധിയിൽ പുതിയൊരു വെയർഹൗസ് നിർമ്മിച്ചിരുന്നു. ഇതിന്റെ കംപ്ലീഷൻ സർട്ടിഫിക്കറ്റിനായി 2026 ജനുവരി 21-ന് ഓൺലൈൻ മുഖാന്തരം അദ്ദേഹം പഞ്ചായത്തിൽ അപേക്ഷ സമർപ്പിച്ചു. തുടർന്ന് സ്ഥലപരിശോധനയ്ക്ക് എത്തിയ ഓവർസീയർ ദീപേഷ് കുമാർ, സർട്ടിഫിക്കറ്റ് അനുവദിക്കുന്നതിനായി 20 ലക്ഷം രൂപ കൈക്കൂലിയായി നൽകണമെന്ന് ആവശ്യപ്പെട്ടു.

ഇത്രയും വലിയ തുക നൽകാൻ കഴിയില്ലെന്ന് പരാതിക്കാരൻ ഫോണിലൂടെ അറിയിച്ചതിനെ തുടർന്ന് ഉദ്യോഗസ്ഥൻ കൈക്കൂലി തുക 15 ലക്ഷമാക്കി കുറച്ചു. പിന്നീട് ഇരുവരും നേരിൽ കണ്ടപ്പോൾ ഈ തുക ചൊവ്വാഴ്ച രാത്രി ഒൻപത് മണിക്ക് കാക്കനാട് കളക്ടറേറ്റിന് സമീപം എത്തിച്ച് നൽകണമെന്ന് ദീപേഷ് കുമാർ നിർദ്ദേശിക്കുകയായിരുന്നു.

വിജിലൻസിന്റെ ചരിത്ര നേട്ടം

സർക്കാർ സേവനം കൈക്കൂലി നൽകി നേടിയെടുക്കാൻ താല്പര്യമില്ലാതിരുന്ന പരാതിക്കാരൻ വിവരം എറണാകുളം യൂണിറ്റ് ഡെപ്യൂട്ടി പോലീസ് സൂപ്രണ്ടിനെ അറിയിച്ചു. അദ്ദേഹത്തിന്റെ നിർദ്ദേശാനുസരണം വിജിലൻസ് സംഘം രഹസ്യമായി കെണിയൊരുക്കി ഉദ്യോഗസ്ഥനെ നിരീക്ഷിച്ചുവരികയായിരുന്നു. രാത്രി ഒൻപതേകാലോടെ കാക്കനാട് കളക്ടറേറ്റിന് സമീപം വെച്ച് പരാതിക്കാരനിൽ നിന്നും അഞ്ച് ലക്ഷം രൂപ പണമായും 10 ലക്ഷം രൂപ ചെക്കായും ദീപേഷ് കുമാർ കൈപ്പറ്റി. ഈ സമയം അവിടെയുണ്ടായിരുന്ന വിജിലൻസ് സംഘം ഇയാളെ കയ്യോടെ പിടികൂടുകയായിരുന്നു. അറസ്റ്റ് രേഖപ്പെടുത്തിയ പ്രതിയെ മൂവാറ്റുപുഴ വിജിലൻസ് കോടതിയിൽ ഹാജരാക്കും.

അഴിമതി അറിയിക്കാൻ വിജിലൻസ് ഡയറക്ടർ

പൊതുജനങ്ങളുടെ ശ്രദ്ധയിൽ സർക്കാർ ഓഫീസുകളിലെ അഴിമതി സംബന്ധിച്ച വിവരങ്ങൾ ലഭിക്കുകയാണെങ്കിൽ അത് ഉടൻ അറിയിക്കണമെന്ന് വിജിലൻസ് ഡയറക്ടർ മനോജ് എബ്രഹാം ഐപിഎസ് അഭ്യർത്ഥിച്ചു. ഇതിനായി വിജിലൻസിന്റെ ടോൾ ഫ്രീ നമ്പറായ 1064 എന്ന നമ്പറിലോ, 8592900900 എന്ന നമ്പറിലോ ബന്ധപ്പെടാവുന്നതാണ്. കൂടാതെ വാട്സ്ആപ്പ് നമ്പരായ 9447789100 എന്ന നമ്പറിലും വിവരങ്ങൾ നൽകാം.

പുതിയ വാർത്തകൾ സമയബന്ധിതമായി അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. ഈ വാർത്ത ഉപകാരപ്രദമെന്ന് തോന്നിയാൽ സുഹൃത്തുകൾക്കും കുടുംബാംഗങ്ങൾക്കും വാട്സ്ആപ്പ് ഗ്രൂപ്പുകളിലും ഷെയർ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: Kerala Vigilance arrested a Grama Panchayat Overseer, a native of Kasaragod, for accepting a bribe of Rs 15 lakh, marking the highest trap amount in the department's history.

#VigilanceTrap #AntiCorruption #KeralaPolice #KasaragodNative #BribeCase #ErnakulamNews #ManojAbrahamIPS #VadavucodePanchayat