വാക്കുതർക്കം: വീഡിയോ കോളിനിടെ പ്രവാസി യുവാവിനെ സൗദിയിൽ മരിച്ച നിലയിൽ കണ്ടെത്തി

ലക്‌നൗ: (KVARTHA) ഭാര്യയുമായി വീഡിയോ കോൾ സംഭാഷണത്തിനിടെയുണ്ടായ വാക്കുതർക്കത്തെ തുടർന്ന് പ്രവാസി യുവാവിനെ സൗദിയിലെ താമസസ്ഥലത്ത് മരിച്ച നിലയിൽ കണ്ടെത്തിയതായി പരാതി. മുസാഫർനഗർ സ്വദേശിയായ അൻസാരിയാണ് (24) ജീവനൊടുക്കിയ നിലയിൽ കാണപ്പെട്ടത്.

വിവാഹം കഴിഞ്ഞ് ആറുമാസം മാത്രമായ അൻസാരി തൊഴിൽ ആവശ്യത്തിനായി രണ്ടര മാസം മുമ്പാണ് സൗദിയിൽ എത്തിയത്. ഞായറാഴ്ച വൈകുന്നേരം പതിവുപോലെ ഭാര്യ സാനിയയുമായി വീഡിയോ കോൾ സംഭാഷണം നടത്തുകയായിരുന്നു. ഈ സംസാരത്തിനിടെ ഇരുവരും തമ്മിൽ വാക്കുതർക്കമുണ്ടായതായി പരാതിയിൽ പറയുന്നു.

സംസാരം രൂക്ഷമായതിനെ തുടർന്ന് അൻസാരി വീഡിയോ കോളിനിടെ തന്നെ ഫാനിൽ കെട്ടി ജീവനൊടുക്കുകയായിരുന്നു. സംഭവം ഫോണിലൂടെ കണ്ട സാനിയ ഉടൻ തന്നെ സൗദിയിലുള്ള ബന്ധുക്കളെ വിവരമറിയിക്കുകയായിരുന്നു. എന്നാൽ ഉടൻ സ്ഥലത്തെത്തിയെങ്കിലും യുവാവിനെ രക്ഷിക്കാനായില്ല.

മൃതദേഹം എത്രയും വേഗം നാട്ടിലെത്തിക്കുന്നതിനുള്ള നിയമപരമായ നടപടിക്രമങ്ങൾ പുരോഗമിക്കുകയാണെന്ന് ബന്ധുവായ അംജദ് അലി അറിയിച്ചു. മൃതദേഹം നാട്ടിലെത്തിക്കുന്നതിലെ നിയമപരമായ തടസ്സങ്ങൾ ഒഴിവാക്കാൻ ഇന്ത്യൻ എംബസിയുടെ സഹായം തേടിയിട്ടുണ്ടെന്നും കുടുംബം വ്യക്തമാക്കി.

പ്രവാസി യുവാവ് ജീവനൊടുക്കിയതുമായി ബന്ധപ്പെട്ട് പൊലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചതായി അധികൃതർ അറിയിച്ചു.

ശ്രദ്ധിക്കുക: ആത്മഹത്യ ഒന്നിനും ഒരു പരിഹാരമല്ല. ജീവിതം വിലമതിക്കേണ്ടതാണ്. ആത്മഹത്യ ചിന്തകൾ ഉണ്ടെങ്കിൽ ദിശ ഹെല്പ് ഡെസ്കിൽ സഹായം തേടുക, നമ്പർ: 1056, അല്ലെങ്കിൽ iCALL- നമ്പർ: 9152987821.  നിങ്ങളുടെ പ്രശ്നങ്ങൾക്ക് പരിഹാരമുണ്ട്.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ കമന്റ് ചെയ്യുക. വാർത്ത മറ്റുള്ളവരിലേക്ക് ഷെയർ ചെയ്യുക. 

Article Summary: Expat youth from Muzaffarnagar found dead in Saudi Arabia after an argument with his wife during a video call.

#SaudiArabia #ExpatDeath #VideoCall #Death #NRI #Muzaffarnagar