തിരുവനന്തപുരം: (KVARTHA) വെഞ്ഞാറമൂട് കൂട്ടക്കൊലപാതക കേസിൽ അറസ്റ്റിലായ പ്രതി അഫാനെ പൊലീസ് വിശദമായ തെളിവെടുപ്പിനായി എത്തിച്ചു. പേരുമലയിലെ പ്രതിയുടെ വീട്ടിലും പരിസരങ്ങളിലുമാണ്  പ്രധാനമായും തെളിവെടുപ്പ്. സഹോദരൻ അഹ്സാൻ, പെൺസുഹൃത്ത് ഫർസാന എന്നിവരെ കൊലപ്പെടുത്തിയ സംഭവത്തിൽ അഫാന്റെ മൊഴികളിലെ വൈരുദ്ധ്യങ്ങൾ പരിശോധിക്കുന്നതിനും കൂടുതൽ തെളിവുകൾ ശേഖരിക്കുന്നതിനുമാണ് പൊലീസ് നടപടി. 

നെടുമങ്ങാട് കോടതി മൂന്നു ദിവസത്തേക്ക് പൊലീസ് കസ്റ്റഡിയിൽ വിട്ടതിനെ തുടർന്നാണ് അന്വേഷണം ഊർജിതമായി നടക്കുന്നത്. ഇതിനുമുൻപ് പാങ്ങോട്, കിളിമാനൂർ എന്നിവിടങ്ങളിലും പൊലീസ് തെളിവെടുപ്പ് നടത്തിയിരുന്നു. ഫെബ്രുവരി 24-നാണ് നാടിനെ നടുക്കിയ വെഞ്ഞാറമൂട് കൂട്ടക്കൊലപാതകം നടന്നത്. അഫാന്റെ പിതൃമാതാവ് സൽമാ ബീവി, പിതൃസഹോദരൻ ലത്തീഫ്, ഭാര്യ ഷാഹിദ, സഹോദരൻ അഹ്സാൻ, പെൺസുഹൃത്ത് ഫർസാന എന്നിവരാണ് ദാരുണമായി കൊല്ലപ്പെട്ടത്. 

രാവിലെ പത്തിനും വൈകുന്നേരം ആറിനുമിടയിലായിരുന്നു അഞ്ച് കൊലപാതകങ്ങളും നടന്നതെന്നാണ് പൊലീസ് നിഗമനം. മാതാവ് ഷെമിയെ ആക്രമിച്ചപ്പോൾ അവർ മരിച്ചെന്നാണ് അഫാൻ ആദ്യം കരുതിയത്. എന്നാൽ ഷെമി ഗുരുതരമായ പരിക്കുകളോടെ രക്ഷപ്പെട്ടു. അഞ്ച് കൊലപാതകങ്ങൾക്കും ശേഷം അഫാൻ എലിവിഷം കഴിച്ച് ആത്മഹത്യക്ക് ശ്രമിക്കുകയും പിന്നീട് പൊലീസിൽ കീഴടങ്ങുകയുമായിരുന്നു. 

ജയിലിൽ കഴിഞ്ഞിരുന്ന അഫാനെ മൂന്നാംഘട്ട തെളിവെടുപ്പിനായി വെഞ്ഞാറമൂട് പൊലീസ് കസ്റ്റഡിയിൽ വാങ്ങിയിരുന്നു. തിങ്കളാഴ്ച രാത്രി വൈകിയും പ്രതിയെ പൊലീസ് ചോദ്യം ചെയ്തു. പണം കടം നൽകിയവരിൽ നിന്ന് അഫാനുണ്ടായ ഭീഷണികളെക്കുറിച്ചും പൊലീസ് വിവരങ്ങൾ ശേഖരിക്കുന്നുണ്ട്. ഇതിന്റെ അടിസ്ഥാനത്തിൽ അഫാനുമായി അനധികൃത പണമിടപാട് നടത്തിയവർക്കെതിരെയും കേസെടുക്കാൻ പൊലീസ് ആലോചിക്കുന്നുണ്ട്.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

Afan, the accused in the Venjaramoodu mass murder case, is being interrogated by police in the third phase of evidence collection, with details about the killings.

#VenjaramooduMurder #KeralaCrime #MassMurder #PoliceInvestigation #AfanCase #KeralaNews