തിരുവനന്തപുരം: (KVARTHA) വെഞ്ഞാറമൂട് കൂട്ടക്കൊലപാതക കേസിൽ പ്രതി അഫാനുമായുള്ള രണ്ടാംഘട്ട തെളിവെടുപ്പ് പൂർത്തിയായി. കിളിമാനൂർ പൊലീസ് കസ്റ്റഡിയിൽ വാങ്ങിയ പ്രതിയുമായി മൂന്നു ദിവസത്തോളം വിശദമായ തെളിവെടുപ്പാണ് നടത്തിയത്. കൊലപാതകത്തിന് ഉപയോഗിച്ച എലിവിഷം, മുളക് പൊടി, പെപ്സി, ചുറ്റിക, സിഗരറ്റ് തുടങ്ങിയവ വാങ്ങിയ കടകളിൽ അഫാനെ എത്തിച്ച് പൊലീസ് തെളിവെടുത്തു. ഇതിനുപുറമെ, അഫാൻ്റെ പിതൃസഹോദരൻ്റെ ചുള്ളോളത്തെ വീട്ടിലും പൊലീസ് സംഘം തെളിവെടുപ്പിനായി എത്തിയിരുന്നു.

ലത്തീഫിനെ കൊലപ്പെടുത്തിയ ശേഷം അഫാൻ ഉപേക്ഷിച്ച കാറിൻ്റെ താക്കോലും, മൊബൈൽ ഫോണും ഈ തെളിവെടുപ്പിനിടയിൽ പൊലീസ് കണ്ടെത്തി. രണ്ടാംഘട്ട തെളിവെടുപ്പിലും അഫാൻ യാതൊരു ഭാവഭേദവുമില്ലാതെയാണ് കുറ്റം ചെയ്ത രീതിയും മറ്റു വിവരങ്ങളും പൊലീസിനോട് വിശദീകരിച്ചത്. മൂന്ന് ദിവസത്തെ കസ്റ്റഡിയാണ് കോടതി അനുവദിച്ചിരുന്നത്.

അഞ്ച് കൊലപാതകങ്ങൾ നടന്നത് ഫെബ്രുവരി 24-നാണ്. പിതൃമാതാവ് സൽമാ ബീവി, പിതൃസഹോദരൻ ലത്തീഫ്, ലത്തീഫിൻ്റെ ഭാര്യ ഷാഹിദ, സഹോദരൻ അഫ്‌സാൻ, പെൺസുഹൃത്ത് ഫർസാന എന്നിവരെയാണ് അഫാൻ അതിക്രൂരമായി കൊലപ്പെടുത്തിയത്. രാവിലെ പത്തിനും വൈകിട്ട് ആറിനുമിടയിലായിരുന്നു അഞ്ച് കൊലപാതകങ്ങളും നടന്നത്. മാതാവ് ഷെമിയെ ആക്രമിച്ചപ്പോൾ ഷെമി മരിച്ചു എന്ന് അഫാൻ തെറ്റിദ്ധരിച്ചിരുന്നു. ഇതിനു ശേഷമാണ് അഫാൻ അഞ്ചുപേരെ കൊലപ്പെടുത്തിയ ശേഷം വെഞ്ഞാറമ്മൂട് പൊലീസ് സ്റ്റേഷനിൽ കീഴടങ്ങിയത്. സാമ്പത്തിക പ്രശ്നങ്ങളാണ് അഫാനെ കൂട്ടക്കൊലയ്ക്ക് പ്രേരിപ്പിച്ചതെന്നുള്ള പ്രാഥമിക നിഗമനത്തിലാണ് പൊലീസ് എത്തിച്ചേർന്നിരിക്കുന്നത്.

അതേസമയം, ചികിത്സയിൽ കഴിയുന്ന മാതാവ് ഷെമിക്ക് അഫാനെ കാണണമെന്ന് ആഗ്രഹം പ്രകടിപ്പിച്ചിരുന്നു. പരിക്കേറ്റ് ചികിത്സയിൽ കഴിയുന്ന ഷെമിയെ പിന്നീട് റൂമിലേക്ക് മാറ്റി. ഷെമിയുടെ ആരോഗ്യനിലയിൽ നല്ല പുരോഗതിയുണ്ടെന്ന് ഡോക്ടർമാർ അറിയിച്ചു. അഫാൻ്റെ കൊലപാതക പരമ്പരയെക്കുറിച്ച് ഷെമിയെ ബന്ധുക്കൾ അറിയിച്ചിട്ടുണ്ട്.

ഈ വാർത്ത പങ്കുവെക്കുകയും അഭിപ്രായങ്ങൾ രേഖപ്പെടുത്തുകയും ചെയ്യുക.

The second phase of evidence collection with Afan, the accused in the Venjaramoodu mass murder case, has been completed. Police have recovered crucial evidence, including the car key and mobile phone of the deceased Latheef.

#Venjaramoodu #MurderCase #Afan #EvidenceCollection #KeralaPolice #Crime