തിരുവനന്തപുരം: (KVARTHA) വെഞ്ഞാറമൂട് കൂട്ടക്കൊലപാതകക്കേസിലെ പ്രതി അഫാൻ്റെ ഞെട്ടിക്കുന്ന വെളിപ്പെടുത്തലുകൾ പുറത്ത്. സാമ്പത്തിക പ്രതിസന്ധിയും ബന്ധുക്കളുടെ പരിഹാസവും മൂലമാണ് കൊലപാതകങ്ങൾ നടത്തിയതെന്ന് അഫാൻ ആവർത്തിച്ചു. മാതാവ് മരിച്ചെന്ന് തെറ്റിദ്ധരിച്ചാണ് കൊലപാതകങ്ങൾ നടത്തിയതെന്നും ജയിലിലെ ഉദ്യോഗസ്ഥരോട് അഫാൻ പറഞ്ഞു. പ്രതിദിനം 10,000 രൂപയോളം വിവിധ സാമ്പത്തിക ഇടപാടുകാർക്ക് നൽകേണ്ട വിധത്തിൽ ഇയാൾ കടക്കെണിയിലായിരുന്നുവെന്നാണ് പുറത്തുവരുന്ന വിവരം.

ജയിലിലെ പ്രത്യേക നിരീക്ഷണം

പൂജപ്പുര സെൻട്രൽ ജയിലിലെ പ്രത്യേക നിരീക്ഷണ ബ്ലോക്കിലേക്കാണ് അഫാനെ മാറ്റിയിരിക്കുന്നത്. അഫാനെ 24 മണിക്കൂറും ശ്രദ്ധിക്കാൻ മൂന്ന് ജയിൽ ജീവനക്കാരെ ഏർപ്പാടാക്കിയിട്ടുണ്ട്. ജയിലിലെ വിശ്വസ്തനായ മറ്റൊരു തടവുകാരനെയും അതേ മുറിയിൽ താമസിപ്പിച്ചിട്ടുണ്ട്. മുറിക്കുള്ളിൽ നിരീക്ഷണ ക്യാമറയും ഉണ്ട്. താനും ആത്മഹത്യ ചെയ്യുമെന്ന് ജയിലിൽ എത്തിയ ശേഷം അഫാൻ ജയിൽ ജീവനക്കാരോട് പറഞ്ഞു. അതുകൊണ്ടാണ് പ്രത്യേക ശ്രദ്ധ നൽകുന്നത്.

കൊലപാതക കാരണം കടക്കെണി

അഫാൻ ലഹരി ഉപയോഗിക്കാറില്ലെന്നും മാനസിക പ്രശ്‌നങ്ങളില്ലെന്നുമുള്ള റിപ്പോർട്ട് ലഭിച്ച സാഹചര്യത്തിൽ, സാമ്പത്തിക ബാധ്യത തന്നെയാണ് കൊലപാതകത്തിന് കാരണമെന്ന് ഉറപ്പിച്ചിരിക്കുകയാണ് പൊലീസ്. അഫാന്റെ പിതാവിന്റെ കച്ചവടം തകർന്നതോടെ 2022 മുതൽ കുടുംബത്തിന്റെ വരുമാനം കുറഞ്ഞു. എങ്കിലും, നേരത്തെയുണ്ടായിരുന്ന ആഡംബര ജീവിതം തുടരാൻ അവർ ശ്രമിച്ചു. ഇതിനായി പലരിൽ നിന്നും പലിശയ്ക്കും മറ്റും പണം കടം വാങ്ങി. കടം ഏകദേശം 65 ലക്ഷം രൂപയോളം എത്തി.

പിതാവ് അബ്ദുൽ റഹീം പൊലീസിനോട് പറഞ്ഞത് വിദേശത്തും നാട്ടിലുമായി 27 ലക്ഷം രൂപയുടെ കടം മാത്രമാണെന്നാണ്. എന്നാൽ, പിതാവിന് അറിയാതെയോ അറിഞ്ഞോ ഇതിലും കൂടുതൽ കടമുണ്ടെന്ന് 
പൊലീസ് അന്വേഷണത്തിൽ കണ്ടെത്തി. പണം കടം കൊടുത്തവരെയും സാമ്പത്തിക സ്ഥാപനങ്ങളെയും കണ്ടപ്പോൾ കടം നൽകിയവരെയും സാമ്പത്തിക സ്ഥാപനങ്ങളെയും കണ്ടപ്പോൾ വലിയ കടബാധ്യതയുണ്ടെന്ന് വ്യക്തമായി. 

അഫാന്റെ സാമ്പത്തിക ഇടപാടുകളിൽ ഭൂരിഭാഗവും ദിവസേനയുള്ള പണപ്പിരിവുകളായിരുന്നു. മുത്തശ്ശിയെ കൊലപ്പെടുത്തിയ ശേഷം കവർന്ന സ്വർണമാല പണയം വെച്ച അഫാൻ, ഗൂഗിൾ പേ വഴി പണം അയച്ച നിരവധി ആളുകളെ പൊലീസ് ചോദ്യം ചെയ്യുന്നുണ്ട്. ഈ അന്വേഷണത്തിൽ മാണിക്കൽ പഞ്ചായത്തിലെ ഒരു സഹകരണ സ്ഥാപനത്തിലെ ദിവസേനയുള്ള പണം പിരിക്കുന്ന ഏജന്റും ഉൾപ്പെടുന്നു.

അഫാന്റെ കുടുംബത്തിന് വലിയ കടബാധ്യതകൾ ഉണ്ടായിരുന്നുവെന്ന് പിതാവ് അബ്ദുൽ റഹീം പൊലീസിനോട് വെളിപ്പെടുത്തിയിട്ടുണ്ട്. ഈ കടങ്ങൾ അഫാൻ തനിയെ ഉണ്ടാക്കിയതാണോ എന്ന് പൊലീസ് അന്വേഷിക്കുന്നു. റഹീമിന്റെ മൊഴിയും പൊലീസ് വീണ്ടും രേഖപ്പെടുത്തും. 

പശ്ചാത്താപമില്ലാത്ത മൊഴികൾ

കൊലപാതകങ്ങളെക്കുറിച്ച് പ്രതി അഫാൻ പറഞ്ഞ കാര്യങ്ങൾ ഞെട്ടിക്കുന്നതായിരുന്നു. കൊലപാതകങ്ങളിൽ ഒരു കുറ്റബോധവുമില്ലാതെയാണ് കാര്യങ്ങൾ വിശദീകരിച്ചത്. വീട്ടിലെ പ്രശ്നങ്ങളെക്കുറിച്ചും കൊലപാതകങ്ങളെക്കുറിച്ചും സംസാരിച്ചു. ബന്ധുക്കൾ സ്ഥിരമായി ആക്ഷേപിക്കുമായിരുന്നുവെന്നും കൊലപാതകം ചെയ്യുന്നതിന് മുൻപ് സുഹൃത്ത് ഫർസാനയോട് മറ്റു കൊലപാതകങ്ങളെക്കുറിച്ചും പറഞ്ഞിരുന്നുവെന്നും ആവർത്തിച്ചു.

ഉമ്മയുടെ മരണം തെറ്റിദ്ധരിച്ചു

ഉമ്മ മരിച്ചെന്ന് തെറ്റിദ്ധരിച്ചാണ് മറ്റുള്ളവരെ കൊല്ലാൻ തീരുമാനിച്ചതെന്ന് അഫാൻ ജയിൽ ഉദ്യോഗസ്ഥരോട് പറഞ്ഞു. ഉമ്മ മരിച്ചിട്ടില്ലെന്ന് ആശുപത്രിയിൽ വെച്ച് ഡോക്ടർ പറഞ്ഞപ്പോഴാണ് താനറിയുന്നത്. അമ്മയും അനുജനും കാമുകിയുമായിരുന്നു തനിക്ക് ഏറ്റവും പ്രിയപ്പെട്ടവരെന്നും അഫാൻ കൂട്ടിച്ചേർത്തു. അഫാനെ കസ്റ്റഡിയിൽ ലഭിച്ചാൽ ഉടൻ തന്നെ തെളിവെടുപ്പ് നടത്താനാണ് പൊലീസ് തീരുമാനം. അഫാൻ ആദ്യം കൊലപ്പെടുത്തിയ സൽമാ ബീവിയുടെ വീട്ടിലാണ് ആദ്യ തെളിവെടുപ്പ് നടത്തുക.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

Afan's shocking confessions reveal financial debts and a mistaken belief that his mother had died. He was transferred to a special observation block in jail.

#Venjaramoodu  #Afan #MassMurder #JailConfessions #CrimeNews #KeralaNews