വളപട്ടണത്ത് യുവതി മരിച്ച സംഭവം: ഗൾഫിലേക്ക് കടന്ന ഭർത്താവിനെ പിടികൂടാൻ ലുക്കൗട്ട് നോട്ടീസിറക്കി പൊലീസ്

കണ്ണൂർ: (KVARTHA) വളപട്ടണം പൊലീസ് സ്റ്റേഷൻ പരിധിയിലെ പൊയ്ത്തുംകടവിൽ ഭർതൃമതിയായ 20 വയസ്സുകാരിയെ സ്വന്തം വീട്ടിൽ മരിച്ച നിലയിൽ കണ്ടെത്തിയ സംഭവത്തിൽ പ്രതിയെ പിടികൂടാൻ പൊലീസ് ലുക്കൗട്ട് നോട്ടീസ് ഇറക്കി. ഭർത്താവ് ആസിഫി (29) നെതിരെയാണ് പൊലീസ് ലുക്കൗട്ട് നോട്ടീസ് പുറപ്പെടുവിച്ചിരിക്കുന്നത്. യുവതിയുടെ മരണത്തിന് പിന്നാലെ നാട്ടിലെത്തി ദിവസങ്ങൾക്കുള്ളിൽ തന്നെ ഇയാൾ ദുബൈയിലേക്ക് കടന്നതായാണ് പൊലീസ് സംശയിക്കുന്നത്.

പൊയ്ത്തുംകടവിലെ ഹംസ, ഷമീറ ദമ്പതികളുടെ മകളായ ഫാത്വിമത്ത് റിസയെ ജൂലൈ 30-ന് വൈകിട്ട് അഞ്ചു മണിയോടെയാണ് സ്വന്തം വീട്ടിൽ തൂങ്ങി മരിച്ച നിലയിൽ കണ്ടെത്തിയതായി പൊലീസ് പറയുന്നത്. റിസ മരിച്ചത് ഭർത്താവിൻ്റെ നിരന്തര പീഡനം മൂലമാണെന്ന് കാണിച്ച് ബന്ധുക്കൾ പരാതി നൽകിയിരുന്നു.

ലഹരി ഉപയോഗവും മർദനവുമെന്ന ആരോപണം

കഴിഞ്ഞ ജനുവരി എട്ടിനായിരുന്നു ഫാത്വിമത്ത് റിസയുടെയും ആസിഫിൻ്റെയും വിവാഹം നടന്നത്. വിവാഹത്തിന് ശേഷം യു എ ഇയിൽ വിമാനത്താവള ജീവനക്കാരനായ ആസിഫിനൊപ്പം റിസയും വിദേശത്തേക്ക് പോയിരുന്നു. ഇതിനിടെ ആസിഫിൻ്റെ ലഹരി ഉപയോഗം റിസയുടെ ശ്രദ്ധയിൽപ്പെടുകയും ഇത് ചോദ്യം ചെയ്തതിന് പിന്നാലെ യുവതിക്ക് കടുത്ത ഉപദ്രവങ്ങൾ അനുഭവിക്കേണ്ടി വരികയും ചെയ്തുവെന്ന് ബന്ധുക്കൾ ആരോപിക്കുന്നു. തുടർന്ന് രണ്ടു മാസക്കാലമായി അവധിക്ക് ഭർത്താവിനൊപ്പം നാട്ടിൽ കഴിയവെയാണ് യുവതിയെ മരിച്ച നിലയിൽ കണ്ടെത്തിയത്.

നാട്ടിലെത്തിയ ശേഷവും മയക്കുമരുന്ന് ഉപയോഗം റിസ ചോദ്യം ചെയ്തപ്പോൾ ആസിഫ് മർദിച്ചുവെന്നാണ് ബന്ധുക്കൾ പറയുന്നത്. മരണത്തിന് മുൻപ് ഭർത്താവിൽ നിന്നുണ്ടായ ഉപദ്രവ വിവരങ്ങൾ ഉറ്റസുഹൃത്തുമായി റിസ ഫോൺ സംഭാഷണത്തിലൂടെ പങ്കുവെച്ചിരുന്നു. ഭർത്താവിൻ്റെ പ്രവർത്തികൾ പുറത്തറിയണമെന്നതടക്കമുള്ള  ശബ്ദസന്ദേശങ്ങൾ പിന്നീട് പുറത്തുവന്നിട്ടുണ്ട്.

പൊലീസിനെതിരെ ആക്ഷേപവുമായി കുടുംബം

യുവതി എഴുതിയ കുറിപ്പും സുഹൃത്തിന് അയച്ച വാട്സാപ്പ് സന്ദേശങ്ങളും തെളിവായി വളപട്ടണം പൊലീസിന് ലഭിച്ചിട്ടുണ്ട്. ആദ്യം അസ്വാഭാവിക മരണത്തിന് കേസെടുത്ത പൊലീസ്, ഈ തെളിവുകൾ പരിശോധിച്ച ശേഷമാണ് പ്രേരണാക്കുറ്റത്തിനും ഭർതൃപീഡനത്തിനും കേസെടുത്തത്.

റിസയുടെ മരണ വിവരമറിഞ്ഞ് വിദേശത്തുനിന്ന് നാട്ടിലെത്തിയ ആസിഫ്, ദിവസങ്ങൾക്കുള്ളിൽ തന്നെ വിദേശത്തേക്ക് തിരിച്ചുപോകുകയായിരുന്നു. കുറിപ്പ് ലഭിച്ചിട്ടും പ്രതിയെ പിടികൂടുന്നതിൽ പൊലീസ് വേണ്ടത്ര ജാഗ്രത കാണിച്ചില്ലെന്ന ഗുരുതരമായ ആക്ഷേപം ബന്ധുക്കൾ ഉന്നയിക്കുന്നുണ്ട്. ഇതിനിടെ പ്രതിയെ പിടികൂടുന്നതിന് പൊലീസ് ഇൻ്റർപോളിൻ്റെ സഹായം തേടിയിട്ടുണ്ടെന്നാണ് വിവരം.

ജൂലൈ 31-ന് രാത്രി എട്ടുമണിയോടെയാണ് റിസയുടെ മയ്യത്ത് വളപട്ടണം മന്ന റഹ്മാനിയ്യ മസ്ജിദ് ഖബർസ്ഥാനിൽ ഖബറടക്കിയത്.

(ശ്രദ്ധിക്കുക: സ്വയം ജീവനെടുക്കുന്നത് ഒരു പരിഹാരമല്ല. മാനസിക സമ്മർദ്ദമോ നിരാശയോ അനുഭവപ്പെടുന്നവർ സഹായം തേടണം. ദിശ ഹെൽപ്പ്‌ലൈൻ: 1056 / 0471-2552056 ടെലിമാനസ്: 14416)

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. കൂടുതൽ വാർത്തകൾ അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമൻ്റായി രേഖപ്പെടുത്തുക.

Article Summary: Lookout notice issued for husband in Valapattanam 20-year-old woman's death.

#Valapattanam #KannurNews #DomesticViolence #KeralaPolice #LookoutNotice #MalayalamNews