ഉളിക്കൽ നുച്യാടിന് സമീപം വൻ കവർച്ച; വീടിൻ്റെ അലമാര കുത്തിത്തുറന്ന് 27 പവൻ്റെ ആഭരണങ്ങൾ മോഷ്ടിച്ചതായി പരാതി

ഇരിട്ടി: (KVARTHA) മലയോര ഹൈവേയിൽ ഉളിക്കൽ നുച്യാടിന് സമീപം വീട്ടിലെ അലമാര കുത്തിത്തുറന്ന് 27 പവൻ്റെ ആഭരണങ്ങൾ കവർന്നതായി പരാതി. നുച്യാട് സെൻ്റ് ജോസഫ്സ് കന്യായ ചർച്ചിന് സമീപം താമസിക്കുന്ന നെല്ലിക്കൽ ഹൗസിൽ സിമിലി മോൾ ബിജുവിൻ്റെ വീട്ടിലാണ് വൻ കവർച്ച നടന്നത്. വ്യാഴാഴ്ച (ഡിസംബർ 18) രാവിലെ ആറു മണിക്കും വൈകുന്നേരം ആറു മണിക്കും ഇടയിലുള്ള സമയത്താണ് സംഭവം നടന്നതെന്ന് പോലീസ് പറയുന്നു.

വിദേശത്തുനിന്ന് വരുന്ന ഭർത്താവ് ബിജുവിനെ സ്വീകരിക്കുന്നതിനായി സിമിലി മോളും മകളും കോഴിക്കോട് വിമാനത്താവളത്തിലേക്ക് പോയ സമയത്താണ് മോഷണം നടന്നത്. ഇവരുടെ ഭിന്നശേഷിക്കാരനായ പിതാവ് ഈ സമയം വീട്ടിലുണ്ടായിരുന്നു. 

അതിനാൽ വീടിൻ്റെ മുൻവശത്തെ കതക് പൂട്ടാതെയാണ് ഇവർ വിമാനത്താവളത്തിലേക്ക് പോയിരുന്നത്. തിരികെ വീട്ടിലെത്തിയപ്പോഴാണ് കിടപ്പുമുറിയിലെ അലമാര കുത്തിത്തുറന്ന നിലയിൽ കണ്ടെത്തിയതെന്ന് പരാതിയിൽ പറയുന്നു.

അലമാരയിൽ സൂക്ഷിച്ചിരുന്ന 27 പവൻ്റെ സ്വർണാഭരണങ്ങളാണ് നഷ്ടപ്പെട്ടിരിക്കുന്നത്. ഇതിന് വിപണിയിൽ ഏകദേശം 27 ലക്ഷം രൂപയോളം വില വരുമെന്നാണ് പ്രാഥമിക നിഗമനം. സംഭവത്തെ തുടർന്ന് വീട്ടുകാർ ഉളിക്കൽ പോലീസിൽ വിവരമറിയിക്കുകയായിരുന്നു. സ്ഥലത്തെത്തിയ പോലീസ് കേസ് രജിസ്റ്റർ ചെയ്ത് അന്വേഷണം ഊർജ്ജിതമാക്കിയിട്ടുണ്ട്.

മോഷണം നടന്ന വീട്ടിൽ വിരലടയാള വിദഗ്ദ്ധരും ഫോറൻസിക് സംഘവും എത്തി ശാസ്ത്രീയമായ പരിശോധനകൾ പൂർത്തിയാക്കി. പ്രദേശത്തെ വിവിധ സിസിടിവി ക്യാമറകളിൽ നിന്നുള്ള ദൃശ്യങ്ങൾ പോലീസ് ശേഖരിച്ചുവരികയാണ്. 

മോഷണത്തിന് പിന്നിൽ പ്രദേശത്തെ സാഹചര്യങ്ങൾ കൃത്യമായി അറിയാവുന്നവരാണോ എന്ന് പോലീസ് സംശയിക്കുന്നു. അന്വേഷണം പുരോഗമിക്കുകയാണെന്ന് ഉളിക്കൽ പോലീസ് അറിയിച്ചു.

ഈ വാർത്ത ഷെയർ ചെയ്ത് മറ്റുള്ളവരിലേക്ക് എത്തിക്കൂ.

Article Summary: 27 sovereigns of gold ornaments worth 27 lakhs stolen from a house in Ulikkal, Iritty during daytime.

#UlikkalTheft #IrittyNews #GoldRobbery #KeralaPolice #KannurNews #CrimeNews