ടി പി വധക്കേസ് പ്രതി ടി കെ രജീഷിന് വീണ്ടും പരോൾ: അഞ്ച് മാസത്തിനിടെ ഇത് രണ്ടാം തവണ

കണ്ണൂർ: (KVARTHA) ടി പി ചന്ദ്രശേഖരൻ വധക്കേസിലെ പ്രതികൾക്ക് ജയിൽ വകുപ്പ് വീണ്ടും പരോൾ അനുവദിച്ച നടപടി വിവാദമാകുന്നു. കേസിലെ നാലാം പ്രതി ടി കെ രജീഷിനാണ് ഇപ്പോൾ 15 ദിവസത്തേക്ക് പരോൾ അനുവദിച്ചിരിക്കുന്നത്. അഞ്ച് മാസത്തിനിടെ രണ്ടാമത്തെ പരോളാണ് രജീഷിന് ലഭിക്കുന്നത്.

കണ്ണൂർ സെൻട്രൽ ജയിലിലെ തടവുകാരനായ ടി കെ രജീഷിന് സ്വാഭാവിക പരോളാണ് അനുവദിച്ചതെന്നാണ് ജയിൽ വകുപ്പിന്റെ വിശദീകരണം. കഴിഞ്ഞ ഒക്ടോബറിൽ കണ്ണൂർ താണയിലെ സ്വകാര്യ ആശുപത്രിയിൽ ചികിത്സയ്ക്കായി രജീഷിന് പരോൾ അനുവദിച്ചിരുന്നു. 

ഈ മാസം ഏഴിനാണ് ചികിത്സ കഴിഞ്ഞ് ഇയാൾ ജയിലിൽ തിരിച്ചെത്തിയത്. ഇതിനു പിന്നാലെയാണ് പുതിയ പരോൾ അനുവദിച്ചിരിക്കുന്നത്. മുൻപ് ഓഗസ്റ്റ് മാസത്തിലും ഇയാൾക്ക് 30 ദിവസത്തെ പരോൾ ലഭിച്ചിരുന്നു.

ജയിൽ ശിക്ഷ അനുഭവിക്കവെ ബെംഗളൂരുവിലെ കള്ളത്തോക്ക് കടത്തുമായി ബന്ധപ്പെട്ട് ടി കെ രജീഷിനെ കർണാടക പോലീസ് ജയിലിലെത്തി ചോദ്യം ചെയ്തിരുന്നു. ടി പി വധക്കേസിലെ മുഖ്യപ്രതികളായ കൊടി സുനിയും ടി കെ രജീഷും ഉൾപ്പെടെയുള്ളവർ സെൻട്രൽ ജയിലിൽ കഴിയുമ്പോൾ പുറത്ത് ക്വട്ടേഷൻ പ്രവർത്തനങ്ങളിൽ ഏർപ്പെടുന്നതായും മൊബൈൽ ഫോൺ ഉപയോഗിക്കുന്നതായും നേരത്തെ റിപ്പോർട്ടുകളുണ്ടായിരുന്നു. ജയിൽ വകുപ്പ് ഇക്കാര്യം പോലീസിനെയും സർക്കാരിനെയും അറിയിച്ചിട്ടും നടപടിയുണ്ടായില്ലെന്ന ആക്ഷേപം ശക്തമാണ്.

ടി പി വധക്കേസിലെ മറ്റൊരു പ്രതിയായ കൊടി സുനിക്ക് ഏഴ് മാസത്തിനിടെ 60 ദിവസം പരോൾ അനുവദിച്ചിരുന്നു. 2024 ഡിസംബർ മുതൽ ജൂലൈ വരെയുള്ള കാലയളവിലായിരുന്നു ഇത്. പരോൾ കാലയളവിൽ എറണാകുളം ജില്ല വിട്ടുപോകരുതെന്ന് ടി കെ രജീഷിന് നിർദ്ദേശമുണ്ട്. 

ജയിൽ രേഖകളിൽ എറണാകുളത്തെ വിലാസമാണ് നൽകിയിരിക്കുന്നത്. കണ്ണൂർ, കോഴിക്കോട് ജില്ലകളിൽ പ്രവേശിക്കരുതെന്ന നിബന്ധനയോടെയാണ് പരോൾ അനുവദിച്ചിട്ടുള്ളത്. ടി പി വധക്കേസ് കൂടാതെ മറ്റ് ചില കേസുകളിലും പ്രതിയാണ് ടി കെ രജീഷ്.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായം താഴെ കമന്റ് ചെയ്യൂ. 

Article Summary: Convict TK Rajeesh in the TP Chandrasekharan murder case gets parole again, sparks controversy.

#TPCase #ParoleControversy #TKRajeesh #KannurCentralJail #KeralaNews #CrimeNews