യുവാവിനെ തട്ടിക്കൊണ്ടുപോയി കൊലപ്പെടുത്താൻ ശ്രമം; എട്ട് പേർ പിടിയിൽ, കുപ്രസിദ്ധ ഗുണ്ടാനേതാവും അറസ്റ്റിൽ

തൃശൂർ: (KVARTHA) അടിപിടിയിൽ ഇടപെട്ടതിലുള്ള പകപോക്കലിനായി യുവാവിനെ തട്ടിക്കൊണ്ടുപോയി കൊലപ്പെടുത്താൻ ശ്രമിച്ച കേസിൽ കുപ്രസിദ്ധ ഗുണ്ടാനേതാവ് ഉൾപ്പെടെ എട്ട് പേരെ വാടാനപ്പള്ളി പോലീസ് അറസ്റ്റ് ചെയ്തു.

ജൂലൈ 18ന് രാത്രിയിൽ വാടാനപ്പള്ളി നടുവിൽക്കര സ്വദേശിയായ യുവാവിനെ തട്ടിക്കൊണ്ടുപോയി കവർച്ച ചെയ്ത് കൊലപ്പെടുത്താൻ ശ്രമിച്ച കേസിലാണ് പ്രതികളെ പിടികൂടിയത്.

അറസ്റ്റിലായവർ:

● ബിൻഷാദ് (36)
● മുഹമ്മദ് അഷ്ഫാക്ക് (23)
● മുഹമ്മദ് അസ്‌ലം (28)
● ഷിഫാസ് (30)
● ഫാസിൽ (24)
● ഷാഫി മുഹമ്മദ് (36)
● ആഷിഖ് (27)
● മുഹമ്മദ് റയീസ് (22)

സംഭവം നടന്നത്

ജൂൺ 29ന് തൃത്തല്ലൂരിൽ വെച്ച് നടന്ന അടിപിടിയിൽ യുവാവ് ഇടപെട്ട് പ്രതികളെ പിടിച്ചുമാറ്റിയതിന്റെ വൈരാഗ്യമാണ് ആക്രമണത്തിന് പിന്നിൽ. പ്രശ്‌നങ്ങൾ പറഞ്ഞുതീർക്കാമെന്ന് വിശ്വസിപ്പിച്ച് യുവാവിനെ വീട്ടിൽ നിന്ന് നടുവിൽക്കരയിലെ ദേശീയപാത നിർമാണ സ്ഥലത്തേക്ക് വിളിച്ചുവരുത്തുകയായിരുന്നു.

ഇവിടെ വെച്ച് അഷ്ഫാക്കും മറ്റൊരു പ്രതിയും ചേർന്ന് സ്കൂട്ടറിൽ കയറ്റി യുവാവിനെ തട്ടിക്കൊണ്ടുപോയി. വാടാനപ്പള്ളി ബീച്ച് ശാന്തി റോഡിന് സമീപമുള്ള ആളൊഴിഞ്ഞ പറമ്പിൽ എത്തിച്ച് യുവാവിനെ ക്രൂരമായി മർദ്ദിക്കുകയും കഴുത്തിൽ തോർത്തുകൊണ്ട് മുറുക്കി കൊല്ലാൻ ശ്രമിക്കുകയും ചെയ്തു. യുവാവിന്റെ കൈവശമുണ്ടായിരുന്ന 1000 രൂപയും മൊബൈൽ ഫോണും ഇവർ കവർന്നു.

പോലീസ് നടപടി

ജൂലൈ 18ന് രാത്രിയിൽ ഒരു യുവാവിനെ നടുവിൽക്കരയിൽ നിന്ന് തട്ടിക്കൊണ്ടുപോയതായി ജില്ലാ പോലീസ് മേധാവിക്ക് രഹസ്യവിവരം ലഭിച്ചതിനെ തുടർന്ന് നടത്തിയ അന്വേഷണത്തിലാണ് പ്രതികളെ പിടികൂടിയത്.

വാടാനപ്പള്ളി ഇൻസ്പെക്ടർ എൻ.ബി. ഷൈജുവും എസ്.ഐ.മാരായ സനദ് എൻ. പ്രദീപും പോലീസ് സംഘവും ചേർന്ന് പരാതിക്കാരനെ ആക്രമിച്ച ശാന്തി റോഡിലെ തെങ്ങിൻപറമ്പിലെ ഒളിസങ്കേതം കണ്ടെത്തുകയായിരുന്നു.

തുടർന്ന്, ഈ സ്ഥലത്തിന്റെ ഉടമയും പ്രതിയുമായ ഷിഫാസ്, അഷ്ഫാക്ക്, ആഷിഖ്, ഷാഫി എന്നിവരെ മണിക്കൂറുകൾക്കുള്ളിൽ സംഭവസ്ഥലത്ത് നിന്ന് പിടികൂടി. പോലീസ് എത്തുന്നത് കണ്ട് മറ്റ് പ്രതികൾ ഇരുട്ടിന്റെ മറവിൽ പരാതിക്കാരനെ ബലമായി പിടിച്ചുവലിച്ച് മറ്റൊരു സ്ഥലത്തേക്ക് കൊണ്ടുപോകാൻ ശ്രമിച്ചെങ്കിലും നാട്ടുകാരും പോലീസും ചേർന്ന് യുവാവിനെ രക്ഷപ്പെടുത്തി.

തുടർന്ന് നടത്തിയ അന്വേഷണത്തിൽ കേസിലെ പ്രധാന പ്രതികളായ ബിൻഷാദ്, അസ്‌ലം, ഫാസിൽ, റയീസ് എന്നിവരെ വടക്കേക്കാട് മല്ലാടുള്ള ഒളിസങ്കേതത്തിൽ നിന്ന് പിടികൂടുകയായിരുന്നു.

പ്രതികളുടെ ക്രിമിനൽ പശ്ചാത്തലം

അറസ്റ്റിലായവരിൽ ബിൻഷാദ് വാടാനപ്പള്ളി പോലീസ് സ്റ്റേഷനിലെ റൗഡി ലിസ്റ്റിൽ ഉൾപ്പെട്ടയാളാണ്. വാടാനപ്പള്ളി, വടക്കേക്കാട്, ചേര്‍പ്പ്, കാട്ടൂർ, ചാവക്കാട്, കുറ്റിപ്പുറം പോലീസ് സ്റ്റേഷനുകളിലായി പ്രായപൂർത്തിയാകാത്ത കുട്ടിയെ തട്ടിക്കൊണ്ടുപോയി പീഡിപ്പിക്കൽ, കവർച്ച, വധശ്രമം, അടിപിടി, മയക്കുമരുന്ന് കച്ചവടം തുടങ്ങിയ 25 ക്രിമിനൽ കേസുകളിൽ ഇയാൾ പ്രതിയാണ്.

കാപ്പ നിയമപ്രകാരം നാടുകടത്തലിന് വിധേയനാക്കിയ പ്രതി കൂടിയാണ് ബിൻഷാദ്. വാടാനപ്പള്ളി പോലീസ് സ്റ്റേഷനിലെ 2020ലെ ഒരു വധശ്രമക്കേസിൽ ഏഴര വർഷം ശിക്ഷ ലഭിച്ചിരുന്ന ഇയാൾ ജയിലിൽ നിന്ന് അപ്പീൽ ജാമ്യത്തിൽ ഇറങ്ങിയ ശേഷമാണ് വീണ്ടും കുറ്റകൃത്യം നടത്തിയത്.

മുഹമ്മദ് അഷ്ഫാക്ക് വാടാനപ്പള്ളി പോലീസ് സ്റ്റേഷനിലെ ഒരു അടിപിടിക്കേസിലെ പ്രതിയാണ്. ഷിഫാസ് പാലക്കാട് വാളയാർ എക്സൈസ് ഓഫീസിൽ മയക്കുമരുന്ന് വിൽപ്പനക്കായി കടത്തിയ കേസിലെയും ആലപ്പുഴ അരൂർ പോലീസ് സ്റ്റേഷനിൽ മയക്കുമരുന്ന് ഉപയോഗിച്ചതിനുള്ള കേസിലെയും പ്രതിയാണ്. ഫാസിൽ എളമക്കര പോലീസ് സ്റ്റേഷനിൽ ഒരു തട്ടിപ്പ് കേസിൽ പ്രതിയാണ്. മുഹമ്മദ് റയീസ് വിൽപ്പനക്കായി സൂക്ഷിച്ച മയക്കുമരുന്നുമായി പിടിയിലായ കേസിലെ പ്രതിയാണ്.

തൃശൂർ റൂറൽ ജില്ലാ പോലീസ് മേധാവി ബി. കൃഷ്ണകുമാറിന്റെ നേതൃത്വത്തിൽ കൊടുങ്ങല്ലൂർ ഡിവൈ.എസ്.പി. രാജു വി.കെ, വാടാനപ്പള്ളി ഇൻസ്പെക്ടർ ഷൈജു എൻ.ബി, പ്രൊബേഷൻ എസ്.ഐ. സനദ് എൻ. പ്രദീപ്, എസ്.ഐ.മാരായ ഷാഫി യൂസഫ്, പ്രദീപ് സി.ആർ., എ.എസ്.ഐ. ലിജു ഇല്യാനി, എസ്.സി.പി.ഒ.മാരായ ജിനേഷ്, രാജ് കുമാർ, സി.പി.ഒ.മാരായ നിഷാന്ത്, ബിജു, സുർജിത്ത്, അഖിൽ, അമൽ എന്നിവരടങ്ങിയ സംഘമാണ് പ്രതികളെ പിടികൂടിയത്. പ്രതികളെ സംഭവസ്ഥലത്തെത്തിച്ച് തെളിവെടുപ്പ് പൂർത്തിയാക്കി.

തൃശൂരിലെ ഗുണ്ടാ ആക്രമണത്തെക്കുറിച്ചുള്ള നിങ്ങളുടെ അഭിപ്രായം പങ്കുവെക്കുക.

Article Summary: Eight arrested, including a gang leader, for abducting and attempting to murder a youth in Thrissur.

#ThrissurCrime #AttemptedMurder #KeralaPolice #GangArrest #Vadakkekad #CrimeNews