വയോധികയുടെ മരണം കൊലപാതകം: സ്വർണം കവരാൻ അമ്മയെ കൊന്ന മകളും കാമുകനും അറസ്റ്റിൽ

തൃശൂർ: (KVARTHA) മുണ്ടൂർ ശങ്കരകണ്ടം പഞ്ഞമൂലയിൽ 75 വയസുള്ള തങ്കമണിയെ മരിച്ച നിലയിൽ കണ്ടെത്തിയ സംഭവം കൊലപാതകമെന്ന് തെളിഞ്ഞതായി പോലീസ് അറിയിച്ചു. സംഭവവുമായി ബന്ധപ്പെട്ട് വയോധികയുടെ മകൾ സന്ധ്യ (45), അയൽവാസിയും കാമുകനുമായ നിധിൻ (29) എന്നിവരെ പോലീസ് അറസ്റ്റ് ചെയ്തു. 

കാമുകന്റെ സാമ്പത്തിക ബാധ്യത തീർക്കുന്നതിനുവേണ്ടി അമ്മയുടെ സ്വർണ്ണം കവരാൻ മകൾ ആസൂത്രണം ചെയ്ത പദ്ധതിയാണ് കൊലപാതകത്തിൽ കലാശിച്ചതെന്നാണ് പ്രാഥമിക നിഗമനം. ഞായറാഴ്ച പുലർച്ചെ അഞ്ചരയോടെയാണ് തങ്കമണിയെ വീടിനരികിലെ വഴിയോരത്ത് മരിച്ചനിലയിൽ കണ്ടെത്തിയത്. അയൽക്കാരാണ് മൃതദേഹം ആദ്യം കണ്ടത്. മുഖത്ത് ചെറിയ മുറിപ്പാടുകൾ കണ്ടതിനെ തുടർന്ന്, വീഴ്ചയിൽ സംഭവിച്ചതാകാമെന്നായിരുന്നു ആദ്യത്തെ വിലയിരുത്തൽ.

എന്നാൽ, കഴുത്തിൽനിന്നും സ്വർണമാല നഷ്ടപ്പെട്ടതായി ശ്രദ്ധയിൽപ്പെട്ടതോടെ പോലീസ് സംശയം തോന്നുകയും മൃതദേഹം പോസ്റ്റ്‌മോർട്ടത്തിനായി അയക്കുകയും ചെയ്തു. പോസ്റ്റ്‌മോർട്ടം റിപ്പോർട്ടിലാണ് മരണം കൊലപാതകമാണെന്ന് തെളിഞ്ഞതെന്നാണ് അന്വേഷണ സംഘം വ്യക്തമാക്കിയത്.

തുടർന്ന് നടത്തിയ അന്വേഷണത്തിലാണ് മകൾ സന്ധ്യയാണ് കൃത്യം നടത്തിയതെന്ന് കണ്ടെത്തിയതായി പോലീസ് അറിയിച്ചു. സ്വർണമാല വലിച്ചുപൊട്ടിക്കാൻ ശ്രമിക്കുന്നതിനിടെ കഴുത്തിൽ പിടിച്ച് തള്ളിയപ്പോൾ ഉണ്ടായ വീഴ്ചയാണ് തങ്കമണിയുടെ മരണത്തിന് കാരണമായതെന്നാണ് പോലീസ് പറയുന്നത്. കൊലപാതകത്തിന് ശേഷം മൃതദേഹം വീടിനരികിലെ വഴിയോരത്ത് ഉപേക്ഷിക്കുകയായിരുന്നു.

കേസിൽ വഴിത്തിരിവായത് സന്ധ്യയുടെ മകനെ നിധിൻ ഇടക്കിടെ വിളിച്ച് അന്വേഷണ പുരോഗതി ആരാഞ്ഞതാണ്. ഇത് പോലീസിന്റെ ശ്രദ്ധയിൽപ്പെട്ടതോടെയാണ് അന്വേഷണം നിധിനിലേക്കും സന്ധ്യയിലേക്കും കേന്ദ്രീകരിച്ചതെന്നും തുടർന്നാണ് ഇരുവരുടെയും അറസ്റ്റ് രേഖപ്പെടുത്തിയതെന്നും പോലീസ് വ്യക്തമാക്കി.

തൃശൂരിലെ കൊലപാതക വാർത്ത ഷെയർ ചെയ്യൂ. നിങ്ങളുടെ അഭിപ്രായം കമൻ്റ് ചെയ്യുക. 

Article Summary: Daughter and lover arrested in Thrissur for killing her 75-year-old mother Thangamani to steal her gold.

#Thrissur #MurderArrest #CrimeNews #GoldTheft #KeralaCrime #Mundur