ഏഴാമത്തെ പ്രസവം വീട്ടിൽ വെച്ച് നടത്തി; യുവതിയും കുഞ്ഞും മരിച്ചു; ഭർത്താവിനെതിരെ പരാതിയുമായി കുടുംബം

തൃശൂർ: (KVARTHA) ചാവക്കാട് എടക്കഴിയൂരിൽ വീട്ടിൽ വെച്ച് പ്രസവം നടത്തിയതിനെ തുടർന്ന് ആരോഗ്യനില വഷളായ യുവതി മരിച്ചു. എടക്കഴിയൂർ ഹൈസ്‌കൂളിന് സമീപം കല്ലുവളപ്പിൽ ഇബ്രാഹിമിന്റെ ഭാര്യ മുഹ്സിന (37) ആണ് തൃശൂർ ഗവ. മെഡിക്കൽ കോളേജ് ആശുപത്രിയിൽ ചികിത്സയിലിരിക്കെ മരണപ്പെട്ടത്.

ജനുവരി ആറിന് നടന്ന ഇവരുടെ ഏഴാമത്തെ പ്രസവം വീട്ടിൽ വെച്ചായിരുന്നു. സംഭവത്തിൽ അക്യുപങ്ചറിസ്റ്റായ ഭർത്താവ് ഇബ്രാഹിമിനെതിരെ ഗുരുതര ആരോപണങ്ങളുമായി മുഹ്സിനയുടെ കുടുംബം രംഗത്തെത്തി.

കുഞ്ഞും അമ്മയും യാത്രയായി

വീട്ടിലെ പ്രസവത്തെ തുടർന്ന് ജനുവരി പത്തിന് ഇവരുടെ നവജാതശിശു മരണപ്പെട്ടിരുന്നു. മതിയായ ചികിത്സ ലഭിക്കാതെയാണ് കുഞ്ഞ് മരിച്ചതെന്ന് അന്ന് തന്നെ പരാതി ഉയർന്നിരുന്നു. ഇതിന് പിന്നാലെയാണ് അമ്മയുടെയും മരണം.

പ്രസവശേഷം അണുബാധയും മറ്റ് ശാരീരിക അസ്വസ്ഥതകളും ഉണ്ടായെങ്കിലും ശാസ്ത്രീയമായ വൈദ്യസഹായം തേടാൻ ഭർത്താവ് തയ്യാറായില്ലെന്ന് കുടുംബം ആരോപിക്കുന്നു. ആരോഗ്യനില അതീവ ഗുരുതരമായതിനെ തുടർന്ന് ആദ്യം സ്വകാര്യ ആശുപത്രിയിലും പിന്നീട് മെഡിക്കൽ കോളേജിലേക്കും മാറ്റിയെങ്കിലും ജീവൻ രക്ഷിക്കാനായില്ല.

ചികിത്സാ നിഷേധം ആരോപണം

ഗർഭകാലത്തോ പ്രസവസമയത്തോ മുഹ്സിനയ്ക്ക് ആവശ്യമായ വാക്സിനേഷനുകളോ പരിശോധനകളോ നൽകിയിരുന്നില്ല.  നേരത്തെ ഇവരുടെ രണ്ട് കുട്ടികൾ മരണപ്പെട്ടിരുന്നു എന്ന വിവരവും പുറത്തുവരുന്നുണ്ട്. മുഹ്സിനയുടെ മുൻപത്തെ പ്രസവങ്ങൾ ആശുപത്രികളിൽ വെച്ചായിരുന്നു നടന്നത്.

പോലീസ് നടപടി

ചാവക്കാട് പോലീസ് ആശുപത്രിയിലെത്തി ഇൻക്വസ്റ്റ് നടപടികൾ പൂർത്തിയാക്കി. അസ്വാഭാവിക മരണത്തിന് കേസെടുത്ത് അന്വേഷണം ആരംഭിച്ചിട്ടുണ്ട്. മൃതദേഹം പോസ്റ്റ്മോർട്ടം നടത്തും. പോസ്റ്റ്മോർട്ടം റിപ്പോർട്ട് ലഭിച്ച ശേഷമേ മരണത്തിന്റെ കൃത്യമായ കാരണം വ്യക്തമാകൂ എന്നും, ചികിത്സാ നിഷേധം ഉൾപ്പെടെയുള്ള കാര്യങ്ങളിൽ വിശദമായ അന്വേഷണം നടക്കുമെന്നും പോലീസ് അറിയിച്ചു.

കൂടുതൽ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. ഈ വാർത്ത സുഹൃത്തുക്കൾക്കും വാട്സ്ആപ്പ് ഗ്രൂപ്പുകളിലും ഷെയർ ചെയ്യുമല്ലോ. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിൽ കമന്റായി രേഖപ്പെടുത്താൻ മറക്കരുത്.

Article Summary: 37-year-old Muhsina died due to complications from an unassisted home birth in Thrissur; family blames her husband for denying medical care.

#ThrissurNews #HomeBirthDanger #MedicalNegligence #Chavakkad #KeralaNews #BreakingNews #PublicHealth