കോൺഗ്രസ് നേതാവിനെ മർദ്ദിച്ച സംഭവം; രണ്ട് എസ്ഐമാർ ഉൾപ്പെടെ മൂന്ന് പോലീസുകാർക്കെതിരെ കേസ്

കണ്ണൂർ: (KVARTHA) നഗരത്തിൽ കോൺഗ്രസ് നേതാവിനെ അകാരണമായി മർദ്ദിച്ചുവെന്ന പരാതിയിൽ രണ്ട് സബ് ഇൻസ്പെക്ടർമാർ ഉൾപ്പെടെ മൂന്ന് പോലീസുകാർക്കെതിരെ കണ്ണൂർ ടൗൺ പോലീസ് കേസെടുത്തു. കോൺഗ്രസ് ടൗൺ മണ്ഡലം പ്രസിഡൻ്റും മുൻ കോർപ്പറേഷൻ കൗൺസിലറുമായ രഞ്ചിത്ത് താളിക്കാവിൻ്റെ പരാതിയിലാണ് നടപടി. 

സിവിൽ പോലീസ് ഓഫീസർ തൻസീർ, എസ്.ഐമാരായ രജീവൻ, ബിനു കൃഷ്‌ണൻ എന്നിവർക്കെതിരെയാണ് കേസെടുത്തിരിക്കുന്നത്. സംഭവത്തിൽ ആഭ്യന്തര വകുപ്പ് കണ്ണൂർ സിറ്റി പോലീസ് കമ്മീഷണറോട് വിശദീകരണം തേടിയിട്ടുണ്ട്.

മർദ്ദനത്തിൻ്റെ വിശദാംശങ്ങൾ

പെരുന്നാൾ ദിനത്തിൽ രാത്രി 9.30 മണിയോടെ കണ്ണൂർ കവിത ടാക്കീസിനടുത്തുള്ള തട്ടുകടയ്ക്ക് സമീപമാണ് മർദ്ദനം നടന്നത്. തട്ടുകടയിൽ തിരക്കുണ്ടായിരുന്ന സമയത്ത് ഭക്ഷണം കഴിക്കുകയായിരുന്ന മൂന്നംഗ പോലീസ് സംഘം ഉള്ളി ചോദിച്ചിരുന്നു. 

തൊട്ടടുത്തുണ്ടായിരുന്ന രഞ്ചിത്ത് ഇക്കാര്യം തട്ടുകടക്കാരോട് പറഞ്ഞപ്പോൾ, ഇത് ഇഷ്ടപ്പെടാതെ തൻസീർ അസഭ്യം പറയുകയും രഞ്ചിത്തിനെ പിടിച്ച് വലിച്ച് നിലത്തിട്ട് മർദ്ദിക്കുകയും ചെയ്തുവെന്നാണ് പരാതി. രജീവനും മർദ്ദനം തുടർന്നുവെന്നും, ഭക്ഷണം കഴിക്കുകയായിരുന്ന ബിനു കൃഷ്ണൻ പ്ലേറ്റ് കൊണ്ട് മുഖത്തടിച്ചുവെന്നും രഞ്ചിത്ത് പറയുന്നു. മർദ്ദനമേറ്റ രഞ്ചിത്ത് കണ്ണൂരിലെ സ്വകാര്യ ആശുപത്രിയിൽ ചികിത്സയിലാണ്.

വകുപ്പ് തല അന്വേഷണം ആരംഭിച്ചു

ദേഹമാസകലം മർദ്ദനത്തിൽ ചതവുകൾ സംഭവിച്ചതായും രക്തം ഛർദ്ദിച്ചതായും രഞ്ചിത്ത് വ്യക്തമാക്കി. ആക്രമണം നടത്തിയ ഉദ്യോഗസ്ഥർ സ്വബോധത്തിലായിരുന്നില്ലെന്ന് പരാതിയിൽ ആരോപിക്കുന്നുണ്ട്. ഒരു തരത്തിലുള്ള ഒത്തുതീർപ്പിനും തയ്യാറല്ലെന്നാണ് രഞ്ചിത്തിൻ്റെ നിലപാട്. 

കേസിൽ പ്രതി ചേർക്കപ്പെട്ട എസ്.ഐ രജീവൻ സർവ്വീസിൽ നിന്നും വിരമിക്കാൻ ഒരു ദിവസം മാത്രം ബാക്കി നിൽക്കെയാണ് സംഭവം. മറ്റൊരു ഉദ്യോഗസ്ഥനായ ബിനു കൃഷ്‌ണൻ അച്ചടക്ക ലംഘനത്തിൻ്റെ ഭാഗമായി മുൻപ് രണ്ട് തവണ സസ്പെൻഷൻ നടപടികൾ നേരിട്ടിട്ടുണ്ട്. പ്രതി ചേർക്കപ്പെട്ട ഉദ്യോഗസ്ഥർക്കെതിരെ വകുപ്പ് തല അന്വേഷണം ഇതിനകം ആരംഭിച്ചിട്ടുണ്ട്.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക. കൂടുതൽ വാർത്തകൾ അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക.

Article Summary: Three police officers, including two SIs (Rajeevan and Binu Krishnan) and a CPO (Thanseer), have been booked by the Kannur Town Police for allegedly brutally assaulting Congress Town Mandalam President Renjith Thaalikkavu near a food stall in Kannur. The incident occurred on Eid night following a trivial argument. A departmental inquiry has been initiated, and the Home Department has sought an explanation from the Kannur City Police Commissioner.

#KannurNews #KeralaPolice #CongressLeaderAssaulted #LocalNews #MalayalamNews