കണ്ണൂർ: (KVARTHA) നഗരത്തിലെ പഴയ ബസ് സ്റ്റാൻഡിൽ സാമൂഹ്യവിരുദ്ധർ തമ്പടിച്ചിരിക്കുന്നു എന്ന പരാതിയെ തുടർന്ന് നടത്തിയ പരിശോധനയിൽ, മോഷണം ആസൂത്രണം ചെയ്യുന്നതിനിടെ മൂന്ന് പേർ പിടിയിലായതായി പൊലീസ് അറിയിച്ചു. ബൈജു എന്ന കണ്ടൻ ബൈജു (42), വർഗീസ് (46), അർഹീൻ (34) എന്നിവരെയാണ് കണ്ണൂർ ടൗൺ പൊലീസ് പിടികൂടിയത്. വെള്ളിയാഴ്ച പുലർച്ചെ പൊലീസ് പഴയ ബസ് സ്റ്റാൻഡ് പരിസരത്ത് പട്രോളിംഗ് നടത്തുന്നതിനിടെയാണ് ഇവരെ പിടികൂടിയത്.

'പഴയ ബസ് സ്റ്റാൻഡ് കംഫർട്ട് സ്റ്റേഷന് സമീപം വാഹനം നിർത്തിയ ശേഷം മൂന്ന് പേർ ഒളിച്ചുനിൽക്കുന്നത് കണ്ടതിനെ തുടർന്ന് പൊലീസ് ഇവരെ ചോദ്യം ചെയ്തു. ചോദ്യം ചെയ്യലിലാണ് മോഷണം ആസൂത്രണം ചെയ്യുകയായിരുന്നു എന്ന് മനസ്സിലായത്. പിടിയിലായ ബൈജു കണ്ണൂർ, വളപട്ടണം പൊലീസ് സ്റ്റേഷനുകളിൽ നിരവധി മോഷണ കേസുകളിൽ പ്രതിയാണ്. അടുത്ത ദിവസമാണ് വളപട്ടണം പൊലീസ് സ്റ്റേഷനിലെ ഒരു മോഷണ കേസിൽ ശിക്ഷ കഴിഞ്ഞ് ജയിലിൽ നിന്നും പുറത്തിറങ്ങിയത്. പഴയ ബസ് സ്റ്റാൻഡ് പരിസരത്തെ കടയിൽ മോഷണം നടത്താൻ പദ്ധതിയിടുന്നതിനിടെയാണ് പ്രതികൾ പിടിയിലായത്', പൊലീസ് പറഞ്ഞു.

കഴിഞ്ഞ ദിവസം പഴയ ബസ് സ്റ്റാൻഡിലെ കടയിലെത്തി മൂന്ന് പേർ ചായ കുടിച്ച ശേഷം യാതൊരു പ്രകോപനവുമില്ലാതെ കടയുടമയെ അസഭ്യം പറയുകയും സാധനങ്ങൾ അടിച്ചു തകർക്കുകയും ചെയ്തിരുന്നുവെന്ന് പരാതിയുണ്ടായിരുന്നു. ഇതിനെ തുടർന്നാണ് പൊലീസ് പഴയ ബസ് സ്റ്റാൻഡിൽ പരിശോധന നടത്തിയത്. കണ്ണൂർ ടൗൺ പൊലീസ് ഇൻസ്പെക്ടർ ശ്രീജിത്ത് കോടെരി, എസ്ഐ പി പി ഷമീൽ എന്നിവർ നേതൃത്വം നൽകി.

Three individuals were arrested in Kannur for plotting a theft. The arrests were made during a police patrol following complaints of anti-social activities at the old bus stand. Among those arrested is the notorious thief. The suspects were planning to rob a shop near the old bus stand.

#Kannur #Theft #Arrest #Crime #Police #Kerala