തിരുവനന്തപുരം സ്വർണത്തട്ടിപ്പ്; ജീവനൊടുക്കാൻ ശ്രമിച്ച രണ്ടാമത്തെ ജീവനക്കാരിയും മരിച്ചു, മുഖ്യപ്രതി പിടിയിൽ

തിരുവനന്തപുരം: (KVARTHA) സ്വകാര്യ ധനകാര്യ സ്ഥാപനത്തിലെ സ്വർണത്തട്ടിപ്പിനെ തുടർന്ന് ജീവനൊടുക്കാൻ ശ്രമിച്ച് ചികിത്സയിലായിരുന്ന രണ്ടാമത്തെ ജീവനക്കാരിയും മരണത്തിന് കീഴടങ്ങി. വെങ്ങാനൂർ ചാവടിനട സ്വദേശിനി ഐശ്വര്യ (32) ആണ് തിരുവനന്തപുരം മെഡിക്കൽ കോളേജ് ആശുപത്രിയിൽ ചികിത്സയിലിരിക്കെ മരിച്ചത്. ഇതേ സ്ഥാപനത്തിലെ ജീവനക്കാരിയായ വെണ്ണിയൂർ നെല്ലിവിള ജയഭവനിൽ വിഷ്ണുവിൻ്റെ ഭാര്യ അഞ്ജു 2026 ജൂലൈ 4 ശനിയാഴ്ച മരിച്ചിരുന്നു. 2026 ജൂൺ 30 ചൊവ്വാഴ്ചയാണ് ഇരുവരും കുറിപ്പെഴുതി വെച്ച ശേഷം ജീവനൊടുക്കാൻ ശ്രമിച്ചത്.

70 പവൻ്റെ സ്വർണത്തട്ടിപ്പ്

യുവതികൾ ജോലി ചെയ്യുന്ന സ്വർണ പണയ സ്ഥാപനത്തിൽ നിന്ന് കേസിലെ പ്രതിയും പരിചയക്കാരിയുമായ സിന്ധുകുമാരിക്ക് 70 പവൻ സ്വർണം എടുത്തുനൽകിയതുമായി ബന്ധപ്പെട്ടാണ് പ്രശ്നങ്ങൾ ആരംഭിച്ചതെന്ന് പൊലീസ് പറയുന്നു. പണയം വെച്ച സ്വർണം തിരികെയെടുക്കാൻ ഉടമസ്ഥർ സ്ഥാപനത്തിൽ എത്തിയതോടെയാണ് തട്ടിപ്പ് വിവരം പുറത്തറിയുന്നത്. 

അഞ്ജുവിൽ നിന്ന് 20 പവനും ഐശ്വര്യയിൽ നിന്ന് 50 പവൻ സ്വർണവുമാണ് സിന്ധുകുമാരി കൈക്കലാക്കിയതെന്നാണ് ആരോപണം. തട്ടിപ്പ് വിവരം പുറത്തറിയുകയും സാമ്പത്തിക ബാധ്യത ഏറുകയും ചെയ്തതോടെ കടുത്ത മാനസിക സമ്മർദ്ദത്തിലായ ഐശ്വര്യയും അഞ്ജുവും ജീവനൊടുക്കാൻ തീരുമാനിക്കുകയായിരുന്നുവെന്ന് പൊലീസ് സംശയിക്കുന്നു.

മുൻപ് സ്വർണ പണമിടപാട് സ്ഥാപനം നടത്തിയിരുന്ന പ്രതി സിന്ധുകുമാരി യുവതികളെ പരിചയപ്പെട്ട് വിശ്വാസ്യത നേടിയെടുക്കുകയായിരുന്നു. ഇവർ ജോലി നോക്കുന്ന ധനകാര്യ സ്ഥാപനത്തിൽ പണയം വയ്ക്കുന്ന സ്വർണം, കുറഞ്ഞ പലിശയ്ക്ക് കെഎസ്എഫ്ഇയിൽ പണയം വെക്കാമെന്ന് വാഗ്ദാനം നൽകി വാങ്ങി വിൽക്കുകയായിരുന്നു പതിവ്. ഇതിനായി കമ്മിഷൻ യുവതികൾക്ക് നൽകിയിരുന്നു. 

ആദ്യ തവണ വാങ്ങിയ സ്വർണം തിരികെ നൽകി വിശ്വാസ്യത ഉറപ്പിച്ചു. പിന്നീട് വാങ്ങിയ സ്വർണം തിരികെ നൽകിയില്ല. സ്വർണം നഷ്ടപ്പെട്ടതോടെ യുവതികൾ പലയിടത്തുനിന്നും പണം കടമെടുത്ത് പണയ തൂക്കത്തിനുള്ള സ്വർണം വാങ്ങി ഇടപാടുകാർക്ക് നൽകി. കൈക്കലാക്കിയ സ്വർണം കോവളത്തെ മറ്റൊരു സ്വകാര്യ പണമിടപാട് സ്ഥാപനത്തിന് കൈമാറി വിൽപന നടത്തുകയായിരുന്നുവെന്ന് പൊലീസ് വ്യക്തമാക്കി.

മുഖ്യപ്രതി പിടിയിൽ

സംഭവത്തിൽ വെങ്ങാനൂർ പനങ്ങോട് ശ്യാമളാലയത്തിൽ സിന്ധുകുമാരിയെ (53) ജൂലൈ 4 ശനിയാഴ്ച രാത്രി പത്തുമണിയോടെ പൊലീസ് അറസ്റ്റ് ചെയ്തു. പൊലീസ് എത്തുന്നുവെന്നറിഞ്ഞ് ആദ്യം വെള്ളായണിയിലും പിന്നീട് മച്ചേലിലെ ബന്ധുവീട്ടിലും ഒളിവിൽ കഴിഞ്ഞ പ്രതിയെ അവിടെ നിന്നാണ് പിടികൂടിയത്. ഇവരെ പിന്നീട് കോടതിയിൽ ഹാജരാക്കി റിമാൻഡ് ചെയ്തു. 

സിന്ധുവിൻ്റെ വീട്ടിൽ നിന്ന് വ്യാജ വിസിറ്റിങ് കാർഡുകളും ബിൽ ബുക്കും ഉൾപ്പെടെ പൊലീസ് കണ്ടെടുത്തു. ഇവരുടെ മൊബൈൽ ഫോണിൽ നിന്നും വിഴിഞ്ഞം പൊലീസിന് നിരവധി തെളിവുകൾ ലഭിച്ചിട്ടുണ്ട്. ഇവരുടെ സാമ്പത്തിക ഇടപാടുകൾ, ബാങ്ക് വിവരങ്ങൾ, ഫോൺ കോളുകളുടെ വിശദാംശങ്ങൾ എന്നിവ പരിശോധിക്കുമെന്ന് പൊലീസ് അറിയിച്ചു.

സിന്ധുകുമാരിക്കെതിരെ ഇതുവരെ 10 പരാതികൾ ലഭിച്ചതായി പൊലീസ് പറഞ്ഞു. ഇവർക്കെതിരെ കോവളം പൊലീസ് സ്റ്റേഷനിൽ മുക്കുപണ്ടം പണയം വെച്ച് തട്ടിപ്പ് നടത്തിയതിനുൾപ്പെടെ രണ്ട് കേസുകളുണ്ട്. മലയിൻകീഴ് സ്റ്റേഷനിൽ വഞ്ചനക്കുറ്റത്തിനും കേസെടുത്തിട്ടുണ്ടെന്ന് പൊലീസ് വ്യക്തമാക്കി. വിഴിഞ്ഞം എസ്എച്ച്ഒ വി ഡി റെജിരാജ്, എസ്ഐ കൃഷ്ണലാൽ, സിപിഒമാരായ റെജിൻ, ഷീലു എന്നിവരുൾപ്പെട്ട സംഘമാണ് കേസ് അന്വേഷിക്കുന്നത്.

ശ്രദ്ധിക്കുക: സ്വയം ജീവനെടുക്കുന്നത് ഒരു പരിഹാരമല്ല. മാനസിക സമ്മർദ്ദമോ നിരാശയോ അനുഭവപ്പെടുന്നവർ സഹായം തേടുക. ദിശ ഹെൽപ്പ്‌ലൈൻ: 1056 / 14416

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. ഏറ്റവും പുതിയ വാർത്തകൾക്കായി ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം.

Article Summary: Aishwarya, the second employee involved in a gold fraud case at a private financial institution in Thiruvananthapuram, died while undergoing treatment. Both Aishwarya and Anju attempted death after realizing they were defrauded of 70 sovereigns of gold by Sindhukumari. The main accused, Sindhukumari, has been arrested by the police.

#ThiruvananthapuramNews #GoldScam #KeralaCrime #DeathPrevention #KeralaPolice #VizhinjamNews #AmmuNews