കണ്ണൂർ: (KVARTHA) പറശ്ശിനിക്കടവിൽ ലോഡ്‌ജിൽ ലഹരി ഉപയോഗിച്ചുവെന്ന കേസിൽ നാല് യുവതീ യുവാക്കൾ പിടിയിലായ സംഭവം പുതിയ വഴിത്തിരിവിലേക്ക്. തളിപ്പറമ്പ് എക്സൈസിനെതിരെ ഗുരുതരമായ ആരോപണങ്ങളുമായി കേസിലെ പ്രതിയായ റഫീന രംഗത്തെത്തിയിരിക്കുകയാണ് ഇപ്പോൾ. സാമൂഹ്യമാധ്യമങ്ങളിൽ പങ്കുവെച്ച വീഡിയോയിലാണ് റഫീന എക്സൈസ് ഉദ്യോഗസ്ഥർക്കെതിരെ ആരോപണം ഉന്നയിക്കുന്നത്.

മുറിയിൽ എംഡിഎംഎ കൊണ്ടുവന്നത് എക്സൈസ് ഉദ്യോഗസ്ഥരാണെന്നാണ് റഫീന വീഡിയോയിൽ ആരോപിക്കുന്നത്. കൈക്കൂലി വാങ്ങിയാണ് ഉദ്യോഗസ്ഥർ തന്നെ പിടികൂടിയതെന്നും, സമൂഹത്തിൽ മോശക്കാരിയാക്കുക എന്നതാണ് അവരുടെ ലക്ഷ്യമെന്നും റഫീന പറയുന്നു. തനിക്കെതിരെ കേസെടുക്കാതെ വ്യാജ ആരോപണങ്ങൾ ഉന്നയിക്കുകയാണെന്നും അവർ കൂട്ടിച്ചേർക്കുന്നു. തന്റെ പേരിൽ കേസൊന്നും എടുത്തിട്ടില്ലെന്നും, താൻ വീട്ടിൽ തന്നെയുണ്ടെന്നും റഫീന വീഡിയോയിൽ വ്യക്തമാക്കുന്നു. 

View this post on Instagram

A post shared by Chippy.hhh__ (@chippy.hhh__)

പൊലീസ് പിടികൂടി എന്ന തരത്തിൽ പ്രചരിക്കുന്ന ഫോട്ടോ കരുതിക്കൂട്ടി ചിലർ ഒറ്റുകൊടുത്തതാണെന്നും, തെറ്റ് ചെയ്യാത്തതുകൊണ്ട് ആരെയും ഭയമില്ലെന്നും റഫീന പറയുന്നു. തന്നെ എംഡിഎംഎയുമായി പിടിച്ചിട്ടുണ്ടെങ്കിൽ എന്തുകൊണ്ട് 14 ദിവസം റിമാൻഡ് ചെയ്തില്ലെന്നും, കേസെടുക്കാത്തത് എന്തുകൊണ്ടാണെന്നും റഫീന ചോദിക്കുന്നു. 

ലോഡ്ജ് എന്ന് പറയുന്ന സ്ഥലം ധർമ്മശാലയിലുള്ള പൊളാരിഷ് എന്ന റൂമാണ്. എക്സൈസുകാർ വരുന്ന സമയത്ത് സിസിടിവി ഓഫാക്കിയത് എന്തിനാണെന്നും റഫീന സംശയം പ്രകടിപ്പിക്കുന്നു. എക്സൈസുകാർ വന്ന് ഒരു സാധനം വെച്ച്, അത് കണ്ടെത്തിയെന്ന് പറയുകയായിരുന്നുവെന്നും റഫീന ആരോപിക്കുന്നു. തന്നെ നാറ്റിക്കുക എന്നതാണ് അവരുടെ ലക്ഷ്യമെന്നും, തന്റെ ഭാഗത്ത് തെറ്റില്ലാത്തതുകൊണ്ട് പേടിയില്ലെന്നും റഫീന ആവർത്തിക്കുന്നു.

എന്നാൽ റഫീനയുടെ വാദങ്ങൾ പൂർണ്ണമായും തള്ളിയിരിക്കുകയാണ് എക്സൈസ് അധികൃതർ. റഫീന ലഹരി ഉപയോഗിച്ചിരുന്നുവെന്നും, കേസെടുത്തിട്ടുണ്ടെന്നും എക്സൈസ് അറിയിച്ചു. പിടിച്ചെടുത്ത ലഹരിയുടെ അളവ് കുറവായതുകൊണ്ടാണ് റിമാൻഡ് ചെയ്യാതെ ജാമ്യത്തിൽ വിട്ടതെന്നും എക്സൈസ് വിശദീകരിച്ചു.

കഴിഞ്ഞ ദിവസമാണ് റഫീന അടക്കം നാല് പേരെ എംഡിഎംഎയുമായി എക്സൈസ് പിടികൂടിയത്. മകണ്ണൂർ ജില്ലയിലെ ഷംനാദ്, ജംഷിൽ, ജസീന എന്നിവരാണ് റഫീനക്കൊപ്പം ഉണ്ടായിരുന്നത്. ഇവരിൽ നിന്ന് 490 മില്ലി ഗ്രാം എംഡിഎംഎയും, ലഹരി ഉപയോഗിക്കാനുള്ള ട്യൂബുകളും ലാമ്പുകളും കണ്ടെത്തിയെന്നാണ് എക്സൈസ് രജിസ്റ്റർ ചെയ്ത കേസ്. പെരുന്നാൾ ദിവസം ഒരു സുഹൃത്തിന്റെ വീട്ടിലേക്കെന്ന് പറഞ്ഞ് വീട്ടിൽ നിന്ന് ഇറങ്ങിയ യുവതികൾ, പിന്നീട് പല സ്ഥലങ്ങളിൽ മുറിയെടുത്ത് ലഹരിമരുന്ന് ഉപയോഗിക്കുകയായിരുന്നുവെന്ന് എക്സൈസ് പറയുന്നു.

പറശ്ശിനിക്കടവിലെ ഈ ലഹരിവേട്ടയും തുടർന്നുണ്ടായ റഫീനയുടെ ആരോപണങ്ങളും ഇപ്പോൾ സാമൂഹ്യ മാധ്യമങ്ങളിൽ വലിയ ചർച്ചാവിഷയമായിരിക്കുകയാണ്. ലഹരി ഉപയോഗിക്കാൻ അല്ലെങ്കിൽ ഇവർ എന്തിനാണ് ലോഡ്ജിൽ മുറിയെടുത്തതെന്ന ചോദ്യം ഒരു വിഭാഗം ഉന്നയിക്കുമ്പോൾ, റഫീനയുടെ ആരോപണങ്ങളിൽ കഴമ്പുണ്ടോയെന്ന് മറുവിഭാഗം സംശയം പ്രകടിപ്പിക്കുന്നു. എക്സൈസിനെ അനുകൂലിച്ചും പ്രതികൂലിച്ചുമുള്ള ചർച്ചകൾ സോഷ്യൽ മീഡിയയിൽ സജീവമായി നടക്കുകയാണ്. 

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

In the Parassinikadavu drug case, arrested woman Rafeena alleges that excise officials brought the MDMA to the lodge and took a bribe. She claims no case was registered against her and the photo of her arrest was leaked. Excise authorities refute her claims, stating she used drugs, a case was filed, and she was released on bail due to the small quantity of MDMA seized (490 mg). The incident and Rafeena's allegations have sparked a social media debate.

#ParassinikadavuDrugBust #ExciseAllegations #Rafeena #MDMA #KeralaExcise #Controversy