കഞ്ചാവ് കടത്ത്: നിരവധി കേസുകളിലെ പ്രതി സ്കൂട്ടറും ഉപേക്ഷിച്ച് ഓടിരക്ഷപ്പെട്ടു

തളിപ്പറമ്പ്: (KVARTHA) സ്കൂട്ടറിൽ കഞ്ചാവ് കടത്തിക്കൊണ്ടു വന്ന കേസിൽ നിരവധി മയക്കുമരുന്ന് കേസുകളിലെ പ്രതിയായ യുവാവ് എക്‌സൈസ് ഉദ്യോഗസ്ഥരെ കണ്ടതോടെ വാഹനം ഉപേക്ഷിച്ച് ഓടിരക്ഷപ്പെട്ടതായി എക്‌സൈസ് അറിയിച്ചു. ഷമ്മാസ് (27) എന്ന കുപ്രസിദ്ധ കുറ്റവാളിയാണ് രക്ഷപ്പെട്ടത്.

എക്‌സൈസ് സർക്കിൾ ഇൻസ്‌പെക്ടർ സതീഷും സംഘവും ഞായറാഴ്ച രാത്രി എടക്കോം തെന്നം ഭാഗത്ത് നടത്തിയ പതിവ് പരിശോധനയ്ക്കിടെയാണ് സംഭവം. കെ.എൽ-86 ബി 5987 നമ്പര്‍ സ്കൂട്ടറിൽ നിയമവിരുദ്ധമായി 204 ഗ്രാം കഞ്ചാവ് കടത്തിക്കൊണ്ടുവന്ന പ്രതി, എക്‌സൈസ് സംഘത്തെ കണ്ടതോടെ ഉടൻതന്നെ വാഹനം സ്ഥലത്ത് ഉപേക്ഷിച്ച് ഓടി രക്ഷപ്പെടുകയായിരുന്നു.

മയക്കുമരുന്ന് കേസുകളിലുൾപ്പെടെ നിരവധി കേസുകളിൽ പ്രതിയായ ഷമ്മാസിനെതിരെ എൻ.ഡി.പി.എസ് നിയമപ്രകാരം എക്‌സൈസ് കേസെടുത്തിട്ടുണ്ട്. എന്നാൽ, വാഹനം ഉപേക്ഷിച്ച് ഓടി രക്ഷപ്പെട്ടതിനെത്തുടർന്ന് പ്രതിയുടെ അറസ്റ്റ് രേഖപ്പെടുത്താൻ സാധിച്ചില്ല.

ഇയാൾ വീട്ടിലും കഞ്ചാവ് സൂക്ഷിച്ചിരുന്നതായി രഹസ്യ വിവരം ലഭിച്ചതിനെ തുടർന്ന് എക്‌സൈസ് സംഘം വീട്ടിലും പരിശോധന നടത്തി. എന്നാൽ, ഈ പരിശോധനയിൽ നിയമവിരുദ്ധമായ ഒന്നും കണ്ടെത്താനായില്ല.

അസിസ്റ്റന്റ് എക്‌സൈസ് ഇൻസ്‌പെക്ടർ അഷ്‌റഫ് മലപ്പട്ടം, പ്രിവന്റീവ് ഓഫീസർമാരായ മുഹമ്മദ് ഖലീൽ, നികേഷ്, ഫെമിൻ, ഗോവിന്ദൻ, സിവില്‍ എക്‌സൈസ് ഓഫീസർമാരായ സുജിത, വിനീത് എന്നിവരും എക്‌സൈസ് സംഘത്തിൽ ഉണ്ടായിരുന്നു. സംഭവത്തിൽ എക്‌സൈസ് തുടർ അന്വേഷണം നടത്തി വരികയാണ്.

ഈ വാർത്ത നിങ്ങളുടെ സുഹൃത്തുക്കളുമായി പങ്കുവെക്കൂ. നിങ്ങളുടെ അഭിപ്രായം കമൻ്റ് ചെയ്യുക. 

Article Summary: Notorious drug accused escapes in Thaliparamba after abandoning scooter with 204g of cannabis.

#Kasaragod #Kanjaavu #ExciseCase #DrugTrafficking #KeralaCrime #Thaliparamba