സ്കൂൾ ക്വിസിൽ സവർക്കറെ പുകഴ്ത്തി വിവാദ ചോദ്യങ്ങൾ; അധ്യാപകന് സസ്പെൻഷൻ

കാസർകോട്: (KVARTHA) കുമ്പള, മഞ്ചേശ്വരം ഉപജില്ലകളിലെ സ്കൂളുകളിൽ സോഷ്യൽ സയൻസ് ക്ലബ്ബിൻ്റെ നേതൃത്വത്തിൽ നടന്ന 'ഫ്രീഡം ക്വിസ് 2026' സ്കൂൾതല മത്സരത്തിൻ്റെ എൽപി വിഭാഗം ചോദ്യാവലിയിൽ ചരിത്രം വളച്ചൊടിച്ച് വിവാദ ചോദ്യങ്ങൾ ഉൾപ്പെടുത്തിയ സംഭവത്തിൽ കർശന നടപടി. കുമ്പള ഉപജില്ലയിലെ പള്ളത്തടുക്ക എയുപിഎസിലെ അധ്യാപകൻ ഗുരുപ്രസാദിനെ സർവീസിൽ നിന്ന് സസ്പെൻഡ് ചെയ്യാൻ പൊതുവിദ്യാഭ്യാസ ഡയറക്ടർ (ഡിജിഇ) ഉത്തരവിട്ടു.

2026 ഓഗസ്റ്റ് 6-ന് നടന്ന മത്സരത്തിലെ എൽപി വിഭാഗം ക്വിസ് മത്സരത്തിൽ 'ബ്രിട്ടീഷുകാരുടെ കയ്യിൽ നിന്നും ഏറ്റവും കൂടുതൽ ശിക്ഷ ലഭിച്ച സ്വാതന്ത്ര്യ സമര സേനാനി ആരാണ്' എന്ന ചോദ്യത്തിന് 'വി ഡി സവർക്കർ' എന്ന് ഉത്തരമായി നൽകിയതാണ് വലിയ പ്രതിഷേധത്തിനും വിവാദത്തിനും ഇടയാക്കിയത്. 

ഇതിന് പുറമെ, രാഷ്ട്രപിതാവ് മഹാത്മാ ഗാന്ധിയെ വെടിവെച്ചു കൊന്ന നാഥുറാം ഗോഡ്സെയെ സ്വാതന്ത്ര്യസമര സേനാനിയായി ചിത്രീകരിക്കുന്ന രീതിയിലുള്ള ചോദ്യങ്ങളും ചോദ്യാവലിയിൽ ഉൾപ്പെടുത്തിയിരുന്നതായി ഗുരുതര ആരോപണമുയർന്നിരുന്നു. സംഘപരിവാറിന് അനുകൂലമായി ചരിത്രവളച്ചൊടിക്കൽ നടത്താൻ ശ്രമിച്ചുവെന്ന ആരോപണത്തെ തുടർന്നാണ് പൊതുവിദ്യാഭ്യാസ വകുപ്പ് അടിയന്തരമായി ഇടപെട്ടത്.

സസ്പെൻഷൻ ഉത്തരവും അച്ചടക്ക നടപടിയും

തെറ്റിദ്ധാരണ പരത്തുന്ന വിധം ചോദ്യാവലി തയാറാക്കിയത് ഗൗരവകരമായ വീഴ്ചയാണെന്ന് വിലയിരുത്തിയാണ് നടപടി സ്വീകരിച്ചത്. പള്ളത്തടുക്ക എയുപിഎസിലെ അധ്യാപകനായ ഗുരുപ്രസാദിൻ്റെയും മറ്റ് ചില അധ്യാപകരുടെയും നേതൃത്വത്തിലാണ് ഈ ചോദ്യപേപ്പർ തയാറാക്കിയതെന്ന് കാസർകോട് വിദ്യാഭ്യാസ ഉപ ഡയറക്ടർ (ഡിഡിഇ) നടത്തിയ അന്വേഷണത്തിൽ കണ്ടെത്തിയിരുന്നു. ഇതിൻ്റെ അടിസ്ഥാനത്തിൽ സമർപ്പിച്ച റിപ്പോർട്ടിൻ്റെ തുടർനടപടിയായാണ് ഉത്തരവിറങ്ങിയത്.

1958-ലെ കേരള വിദ്യാഭ്യാസ ആക്ട് 12 (എ) പ്രകാരം കൺകറൻ്റ് അധികാരം ഉപയോഗിച്ച് ഗുരുപ്രസാദിനെ അടിയന്തരമായി സേവനത്തിൽ നിന്ന് വിലക്കുന്നതിനും, കേരള വിദ്യാഭ്യാസ നിയമം (കെഇആർ) അധ്യായം 14 (എ) ചട്ടം 75 പ്രകാരം അധ്യാപകനെതിരെ വകുപ്പുതല അച്ചടക്ക നടപടി സ്വീകരിക്കാൻ മാനേജർക്ക് നിർദേശം നൽകാനും കാസർകോട് ഡിഡിഇയെ ചുമതലപ്പെടുത്തിയിട്ടുണ്ട്. വിഷയത്തിൽ വിശദമായ അന്വേഷണം നടത്തി അടിയന്തരമായി നടപടി റിപ്പോർട്ട് സമർപ്പിക്കാനും ഡിജിഇയുടെ ഉത്തരവിലൂടെ നിർദേശിച്ചിട്ടുണ്ട്.

സംഭവം ശ്രദ്ധയിൽപ്പെട്ടതിനെ തുടർന്ന് വിദ്യാഭ്യാസ വകുപ്പ് മന്ത്രി എൻ ഷംസുദ്ദീൻ്റെ ഭാഗത്തുനിന്നും അടിയന്തര ഇടപെടലുണ്ടാകുകയായിരുന്നു. ചരിത്രത്തെ വളച്ചൊടിച്ച് തെറ്റായ സന്ദേശങ്ങൾ കുട്ടികളുടെ മനസ്സിലേക്ക് എത്തിക്കുന്നത് അംഗീകരിക്കാനാവില്ലെന്ന നിലപാടാണ് മന്ത്രിയുടെ ഓഫീസ് സ്വീകരിച്ചത്. 

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. ഏറ്റവും പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം.

Article Summary: The DGE suspended teacher Guru Prasad for including distorted questions praising VD Savarkar and Nathuram Godse in a Kasaragod school quiz.

#KasaragodNews #SchoolQuizControversy #VDSavarkar #KeralaEducation #DGEOrder #KallatraMahinMLA #AmmuNews