കോഴിക്കോട്: (KVARTHA) കുന്നമംഗലം പൊലീസ് സ്റ്റേഷൻ പരിധിയിലെ ഹയർ സെക്കൻഡറി സ്കൂളിൽ വിദ്യാർഥിനികൾക്ക് നേരെ ലൈംഗികാതിക്രമം നടത്തിയെന്ന കേസിൽ അറസ്റ്റിലായ അധ്യാപകൻ എസ് ശ്രീനിജിനെതിരെ കൂടുതൽ ഗുരുതരമായ വിവരങ്ങൾ പുറത്ത്. ഇയാൾക്കെതിരെ രണ്ട് പോക്സോ കേസുകളാണ് രജിസ്റ്റർ ചെയ്തിരിക്കുന്നത്. പ്രതിയെ കോടതിയിൽ ഹാജരാക്കി റിമാൻഡ് ചെയ്തിട്ടുണ്ട്.

രണ്ട് വിദ്യാർഥിനികൾ നൽകിയ പരാതിയുടെ അടിസ്ഥാനത്തിലാണ് പൊലീസ് ശ്രീനിജിനെതിരെ രണ്ട് പോക്സോ കേസുകൾ രജിസ്റ്റർ ചെയ്തത്. ലൈംഗിക ഉദ്ദേശത്തോടെ അധ്യാപകൻ പെരുമാറിയതായി വിദ്യാർത്ഥികൾ ആദ്യം സ്കൂൾ പ്രഥമാധ്യാപകനോടാണ് പരാതിപ്പെട്ടത്. തുടർന്ന് പ്രഥമാധ്യാപകൻ പൊലീസിൽ വിവരമറിയിക്കുകയും പൊലീസ് വിശദമായ അന്വേഷണത്തിന് ശേഷം ശ്രീനിജിനെ കസ്റ്റഡിയിലെടുക്കുകയുമായിരുന്നു. 

കുന്നമംഗലം എസ്ഐ നിധിന്റെ നേതൃത്വത്തിലുള്ള സംഘമാണ് പ്രതിയെ പിടികൂടിയത്. ശ്രീനിജിനെതിരെ ഇതിനുമുമ്പും നിരവധി കേസുകൾ നിലവിലുണ്ട് എന്ന് പൊലീസ് അറിയിച്ചു. ഒരു വിദ്യാർത്ഥിയെ മർദിച്ചതിന് ജുവനൈൽ ആക്ട് പ്രകാരമുള്ള കേസും, സഹപ്രവർത്തകരായ അധ്യാപകരെ അസഭ്യം പറയുകയും ഭീഷണിപ്പെടുത്തുകയും ചെയ്തതിന് ഉൾപ്പെടെ ഏകദേശം ആറ് കേസുകൾ നിലവിലുണ്ട്. 

കൂടാതെ, വിദ്യാർത്ഥികളുടെ മാതാപിതാക്കൾ പരാതി നൽകാൻ സ്കൂളിലെത്തിയപ്പോൾ അവരെ മർദിക്കാൻ ശ്രമിച്ചതായും പരാതിയുണ്ട്. മുൻപ് വിദ്യാഭ്യാസ ഓഫീസിലെ സൂപ്രണ്ടിനോട് മോശമായി പെരുമാറിയെന്നും ഇയാൾക്കെതിരെ പരാതി ഉയർന്നിരുന്നു. സ്കൂളിലെ ക്ലർക്കിനെ മർദിച്ചതിനെ തുടർന്ന് അന്വേഷണ വിധേയമായി ഇയാളെ സസ്പെൻഡ് ചെയ്യുകയും പിന്നീട് തിരിച്ചെടുക്കുകയും ചെയ്തിട്ടുണ്ട്.

ഇതിനിടെയാണ് പോക്സോ കേസിൽ കൂടി പ്രതിയായിരിക്കുന്നത്. ഇയാളുടെ ഭാഗത്തുനിന്നും ഇങ്ങനെയുള്ള പെരുമാറ്റങ്ങൾ മുൻപും ഉണ്ടായിട്ടും അധികൃതർ വേണ്ട നടപടികൾ സ്വീകരിക്കാത്തതിനെക്കുറിച്ചും ആക്ഷേപങ്ങൾ ഉയരുന്നുണ്ട്. ഒരു അധ്യാപകൻ എന്ന നിലയിൽ വിദ്യാർഥികളെ നേർവഴിക്ക് നയിക്കേണ്ട ശ്രീനിജൻ തന്നെ സ്ഥിരം കുറ്റകൃത്യങ്ങളിൽ ഏർപ്പെടുന്നത് അങ്ങേയറ്റം അപലപനീയമാണെന്ന് രക്ഷിതാക്കൾ പറയുന്നു.

#SreenijArrested #POCSOCases #Harassment #KeralaNews #TeacherArrested #EducationNews