കള്ളക്കേസെന്ന് ആരോപിച്ചുള്ള പ്രതിഷേധം; തളിപ്പറമ്പ് പൊലീസ് വീണ്ടും കേസെടുത്തു

കണ്ണൂർ: (KVARTHA) കള്ളക്കേസെടുക്കുന്നുവെന്ന് ആരോപിച്ച് തളിപ്പറമ്പ് പൊലീസ് സ്റ്റേഷൻ മാർച്ചും പ്രതിഷേധ ധർണയും നടത്തിയതിന് സി പി ഐ കണ്ണൂർ ജില്ലാ കൗൺസിൽ അംഗവും മാന്തംകുണ്ട് റസിഡൻസ് അസോസിയേഷൻ രക്ഷാധികാരിയുമായ കോമത്ത് മുരളീധരനും മറ്റ് 39 പേർക്കുമെതിരെ തളിപ്പറമ്പ് പൊലീസ് കേസെടുത്തു.

റോഡ് ഗതാഗതം തടസ്സപ്പെടുത്തി നഗരത്തിൽ പ്രതിഷേധ മാർച്ച് നടത്തിയതിനും പൊലീസ് സ്റ്റേഷന് മുന്നിൽ പൊതുജനങ്ങൾക്ക് ശല്യമുണ്ടാകുന്ന വിധത്തിൽ ധർണ സംഘടിപ്പിച്ചതിനുമാണ് നടപടി. തിങ്കളാഴ്ച രാവിലെയാണ് കോമത്ത് മുരളീധരന്റെ നേതൃത്വത്തിൽ മാന്തംകുണ്ട് റസിഡൻസ് അസോസിയേഷൻ ഭാരവാഹികളും പ്രവർത്തകരും തളിപ്പറമ്പ് പൊലീസ് സ്റ്റേഷനിലേക്ക് പ്രതിഷേധ മാർച്ച് നടത്തിയത്.

കോമത്ത് മുരളീധരൻ, എം വിജേഷ്, ബിജു, മുരളീധരൻ കാവുംചാൽ, ശശിധരൻ, പി സി രഘു, ശ്രീനിവാസൻ, പി പി വിജയൻ, സ്മിത അജിത്ത് കുമാർ എന്നിവർക്കും കണ്ടാലറിയാവുന്ന മറ്റ് 30 പേർക്കുമെതിരെയാണ് കേസ് രജിസ്റ്റർ ചെയ്തത്.

പുതുവത്സരാഘോഷത്തിന്റെ ഭാഗമായി മാന്തംകുണ്ട് റസിഡൻസ് അസോസിയേഷൻ പരിപാടികൾ നടത്തുന്നതിനിടെ പൊതുജനശല്യമുണ്ടാക്കുന്നു എന്ന പരാതിയിൽ ചിലരെ തളിപ്പറമ്പ് പൊലീസ് അറസ്റ്റ് ചെയ്തിരുന്നു. ഇതിൽ പ്രതിഷേധിച്ചാണ് തിങ്കളാഴ്ച രാവിലെ പത്തര മുതൽ പന്ത്രണ്ട് വരെ തളിപ്പറമ്പ് ഹൈവേ പ്ലാസ മുതൽ പൊലീസ് സ്റ്റേഷൻ വരെയുള്ള പൊതുറോഡിലൂടെ നൂറോളം പേർ പ്രതിഷേധ മാർച്ച് നടത്തിയത്. സ്ത്രീകൾ ഉൾപ്പെടെയുള്ളവർ മാർച്ചിൽ പങ്കെടുത്തു.

മാർച്ചിന് ശേഷം സ്റ്റേഷന് മുന്നിൽ പ്രതിഷേധ ധർണയും സംഘടിപ്പിച്ചു. സി പി ഐ കണ്ണൂർ ജില്ലാ എക്സിക്യൂട്ടീവ് അംഗം അഡ്വ. എം അജയകുമാറാണ് ധർണ ഉദ്ഘാടനം ചെയ്തത്. പൊലീസിനെതിരെ ന്യായവിരുദ്ധമായി സംഘടിച്ച് മുദ്രാവാക്യം വിളിച്ചു, നിയമപരമായ ഉത്തരവ് ലംഘിച്ചു, യാത്രക്കാർക്കും വാഹനങ്ങൾക്കും തടസ്സം സൃഷ്ടിച്ചു തുടങ്ങിയ കുറ്റങ്ങളാണ് പ്രതിഷേധക്കാർക്കെതിരെ ചുമത്തിയിട്ടുള്ളത്.

തളിപ്പറമ്പിലെ രാഷ്ട്രീയ പ്രതിഷേധത്തെക്കുറിച്ചുള്ള ഈ വാർത്ത ഷെയർ ചെയ്യൂ. നിങ്ങളുടെ അഭിപ്രായം താഴെ കമന്റ് ചെയ്യുക. 

Article Summary: Police booked CPI leader and 39 others for Taliparamba station march.

#Taliparamba #KannurNews #CPI #PoliceCase #KeralaPolitics #Protest