വീടിന് സമീപം കളിക്കുകയായിരുന്ന മൂന്ന് വയസുകാരിയുടെ ചെവി തെരുവുനായ കടിച്ചെടുത്തു; കുട്ടിയെ വിദഗ്ധ ചികിത്സയ്ക്കായി എറണാകുളത്തേക്ക് മാറ്റി

എറണാകുളം: (KVARTHA) എറണാകുളത്ത് തെരുവുനായയുടെ ആക്രമണത്തിന് ഇരയായ മൂന്ന് വയസുകാരി സ്വകാര്യ ആശുപത്രിയിൽ ചികിത്സയിൽ തുടരുകയാണ്. വടക്കൻ പറവൂർ നീണ്ടൂൽ സ്വദേശിയായ മിറാഷിന്റെ മകൾ നിഹാരയ്ക്കാണ് നായയുടെ കടിയേറ്റത്. കുട്ടിയുടെ ചെവി തെരുവുനായ കടിച്ചെടുത്തതായി പരാതിയിൽ പറയുന്നു.

പേവിഷബാധ സംശയിക്കുന്നതിനാലാണ് കുട്ടിയെ കളമശേരി മെഡിക്കൽ കോളേജിൽ നിന്നും എറണാകുളം സ്പെഷ്യാലിറ്റി ആശുപത്രിയിലേക്ക് മാറ്റിയതെന്ന് ആശുപത്രി അധികൃതർ അറിയിച്ചു. കുട്ടിക്ക് വിദഗ്ധ ചികിത്സ ആവശ്യമുണ്ടെന്നാണ് നിലവിൽ ലഭിക്കുന്ന വിവരം.

ഞായറാഴ്ച വൈകുന്നേരം നാല് മണിയോടെ വീടിനോട് ചേർന്നുള്ള അമ്പലത്തിന്റെ പരിസരത്ത് വെച്ചാണ് കുട്ടിയെ തെരുവുനായ ആക്രമിച്ചതെന്ന് നാട്ടുകാർ പരാതിപ്പെട്ടു. ഉടൻ തന്നെ കുട്ടിയെ ആശുപത്രിയിലെത്തിക്കുകയും പേവിഷ പ്രതിരോധ കുത്തിവെപ്പ് നൽകുകയും ചെയ്തു. നായക്ക് പേവിഷ ബാധ ഉണ്ടോയെന്ന് പരിശോധന നടത്തുമെന്നും അധികൃതർ അറിയിച്ചു.

സംഭവ സ്ഥലത്ത് തെരുവുനായ ശല്യം രൂക്ഷമാണെന്ന് നാട്ടുകാരനായ വിപിൻ പരാതിപ്പെട്ടു. ഈ പ്രശ്നത്തിന് ശാശ്വതമായ ഒരു പരിഹാരം ഉണ്ടായില്ലെങ്കിൽ പ്രതിഷേധവുമായി രം​ഗത്തിറങ്ങുമെന്നാണ് നാട്ടുകാർ അധികൃതരെ അറിയിച്ചത്.

ഈ വാർത്തയെക്കുറിച്ച് നിങ്ങളുടെ അഭിപ്രായം പങ്കുവെക്കൂ. തെരുവുനായ ആക്രമണങ്ങൾ തടയാൻ എന്ത് ചെയ്യണം? കമൻ്റ് ചെയ്യുക

Article Summary: 3-year-old attacked by stray dog in Ernakulam

#KeralaNews #StrayDogAttack #Ernakulam #ChildSafety #PublicHealth #AnimalControl