ശ്രീകാര്യത്തെ 17-കാരൻ്റെ കൊലപാതകം; യഥാർഥ ലക്ഷ്യം അഭിരാമായിരുന്നില്ലെന്ന് പ്രതികളുടെ മൊഴി, കേസിൽ വഴിത്തിരിവ്; 3 പേർ കസ്റ്റഡിയിൽ
ADVERTISEMENT
● ‘പെൺകുട്ടിയെ ഇൻസ്റ്റഗ്രാമിൽ ശല്യപ്പെടുത്തിയ മറ്റൊരു സുഹൃത്തിനെ വിളിച്ചുവരുത്താൻ അഭിരാമിനെ ഉപയോഗിച്ചു’
● സുഹൃത്തിനെ വിളിക്കാൻ ആവശ്യപ്പെട്ടതിനെ തുടർന്നുള്ള തർക്കമാണ് കൊലപാതകത്തിൽ കലാശിച്ചതെന്നാണ് മൊഴി
● പ്രായപൂർത്തിയാകാത്ത ആൺകുട്ടിയും പെൺകുട്ടിയും ഉമർ എന്നയാളുമാണ് പൊലീസ് കസ്റ്റഡിയിലുള്ളത്
● മൊബൈൽ രേഖകൾ സൈബർ സെല്ലിൻ്റെ സഹായത്തോടെ പരിശോധിച്ച് പൊലീസ് വിവരങ്ങൾ സ്ഥിരീകരിക്കും
തിരുവനന്തപുരം: (KVARTHA) ശ്രീകാര്യത്ത് 17-കാരൻ അഭിരാമിൻ്റെ കൊലപാതകത്തിൽ വഴിത്തിരിവ്. കൊല ചെയ്യാനുദ്ദേശിച്ചത് അഭിരാമിനെ അല്ലെന്നാണ് പോലീസിന് ലഭിച്ചിട്ടുള്ള പ്രതിയുടെ പുതിയ മൊഴി. ലക്ഷ്യമിട്ടത് അഭിരാമിൻ്റെ മറ്റൊരു സുഹൃത്തിനെ ആയിരുന്നുവെന്നും, ആ സുഹൃത്തിനെ വിളിച്ചുവരുത്താൻ വേണ്ടി അഭിരാമിനെ ഉപയോഗിക്കാൻ തീരുമാനിച്ചെന്നുമാണ് പ്രതിയുടെ നിർണായക മൊഴി. ഇതിനിടയിലുണ്ടായ തർക്കത്തിനിടെയാണ് അപ്രതീക്ഷിതമായി കൊലപാതകം നടന്നതെന്ന മൊഴിയാണ് പുറത്തുവരുന്നത്.
ആദ്യ മൊഴി മാറ്റി പ്രതികൾ
അഭിരാം ഇൻസ്റ്റഗ്രാം വഴി നിരന്തരം മെസേജ് അയച്ച് ശല്യപ്പെടുത്തിയിരുന്നുവെന്നും, ഇക്കാര്യം ആൺസുഹൃത്തിനോട് പെൺകുട്ടി പരാതി പറഞ്ഞതായും തുടർന്ന് അഭിരാമിനെ വിളിച്ചുവരുത്തി കൊലപ്പെടുത്തി എന്നുമായിരുന്നു പ്രതികൾ ആദ്യം നൽകിയ മൊഴി. എന്നാൽ ഇപ്പോഴത്തെ പുതിയ മൊഴിപ്രകാരം, അഭിരാമല്ല മറിച്ച് അഭിരാമിൻ്റെ മറ്റൊരു സുഹൃത്താണ് പെൺകുട്ടിയോട് മോശമായി പെരുമാറിയത് എന്നാണ് പറയുന്നത്. അയാളെ വിളിച്ചുവരുത്താൻ വേണ്ടി അഭിരാമിനെ ഉപയോഗിക്കാനായിരുന്നു പ്രതികളുടെ തീരുമാനം. അതിനായിട്ടാണ് അഭിരാമിനെ ഇവർ വിളിച്ചു വരുത്തിയത്.
തുടർന്ന് ഇവർ തമ്മിലുണ്ടായ തർക്കം കൊലപാതകത്തിലെത്തിയെന്നാണ് പ്രതി അന്വേഷണ ഉദ്യോഗസ്ഥരോട് പറയുന്നത്. എന്നാൽ പ്രതികളുടെ ഈ പുതിയ മൊഴി വിശദമായി പരിശോധിക്കുമെന്നാണ് പോലീസിൻ്റെ പ്രതികരണം. കൊലപാതകം ആസൂത്രിതമാണോ അതോ പെട്ടെന്നുണ്ടായ പ്രകോപനമാണോ എന്ന് ശാസ്ത്രീയമായി തെളിയിക്കാൻ പ്രതികളുടെ മൊബൈൽ ഫോൺ രേഖകൾ സൈബർ സെല്ലിൻ്റെ സഹായത്തോടെ പോലീസ് പരിശോധിച്ചുവരികയാണ്.
ചാക്കിൽ കെട്ടിയ നിലയിൽ മൃതദേഹം
ശ്രീകാര്യം പോലീസ് സ്റ്റേഷനിൽ വെച്ച് സിറ്റി കമ്മീഷണറുടെ നേതൃത്വത്തിൽ നടത്തിയ ചോദ്യം ചെയ്യലിലാണ് കേസിൽ ഈ ട്വിസ്റ്റുണ്ടായിരിക്കുന്നത്. നവംബർ 1 ഞായറാഴ്ച വൈകിട്ട് പ്രതിയെ പോലീസ് പിടികൂടിയെങ്കിലും പ്രാഥമികമായി ചോദ്യം ചെയ്ത് അച്ഛനൊപ്പം വിട്ടയച്ചിരുന്നു. തുടർന്ന് നവംബർ 2 തിങ്കളാഴ്ച ഉച്ചയ്ക്ക് വീണ്ടും വിളിച്ചുവരുത്തി ചോദ്യം ചെയ്തപ്പോഴാണ് താൻ കൊലപാതകം നടത്തിയെന്നും മൃതദേഹം പറമ്പിൽ ഉപേക്ഷിച്ചെന്നും പ്രതി പോലീസിന് മൊഴി നൽകിയത്.
തുടർന്ന് വൈകുന്നേരത്തോടെയാണ് അഭിരാമിൻ്റെ മൃതദേഹം ചാക്കിൽ കെട്ടിയ നിലയിൽ പോലീസ് കണ്ടെത്തുന്നത്. ഇതിന് പിന്നാലെ പ്രതിയെ സംഭവസ്ഥലത്ത് നേരിട്ടെത്തിച്ച് പോലീസ് തെളിവെടുക്കുകയും ചെയ്തു. ഈ കേസിൽ നിലവിൽ മൂന്ന് പേരാണ് പോലീസ് കസ്റ്റഡിയിലുള്ളത്. പ്രായപൂർത്തിയാകാത്ത ആൺകുട്ടിയും പെൺകുട്ടിയും ഉമർ എന്നയാളുമാണ് കസ്റ്റഡിയിലുള്ളത്. പ്രായപൂർത്തിയാകാത്ത പ്രതികൾ ഉൾപ്പെട്ട കേസായതിനാൽ ജുവനൈൽ ജസ്റ്റിസ് ബോർഡിൻ്റെ കർശന മാർഗനിർദേശങ്ങൾ പൂർണമായും പാലിച്ചാണ് പോലീസ് തുടർനടപടികൾ സ്വീകരിക്കുന്നത്.
കൂടുതല്‍ വാർത്തകളും വിശേഷങ്ങളും അറിയാന്‍ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് കമൻ്റായി രേഖപ്പെടുത്തുക.
Article Summary: Three in police custody as Sreekariyam Abhiram murder case takes a new turn.
#SreekariyamMurder #TrivandrumNews #KeralaPolice #CrimeNewsMalayalam #AbhiramMurderCase #KeralaNews #SobhaNews
