കണ്ണൂർ: (KVARTHA) പയ്യാമ്പലം പള്ളിയാം മൂല ബീച്ച് റോഡിൽ ജീപ്പിടിച്ച് ആറ് വയസ്സുകാരൻ ദാരുണമായി മരിച്ചു. പൊതുവാച്ചേരി കണ്ണോത്തുംചിറയിലെ മുഹാദ് ആണ് മരിച്ചത്. ഞായറാഴ്ച വൈകീട്ട് നാല് മണിയോടെയാണ് അപകടം സംഭവിച്ചത്. ഉച്ചയോടെ ബന്ധുക്കളോടൊപ്പം പയ്യാമ്പലം ബീച്ചിൽ വിനോദത്തിന് എത്തിയതായിരുന്നു മുഹാദ്.

ബന്ധുക്കളോടൊപ്പം റോഡരികിൽ നിൽക്കുകയായിരുന്ന കുട്ടി അപ്രതീക്ഷിതമായി റോഡ് മുറിച്ചുകടക്കാൻ ശ്രമിച്ചപ്പോൾ പള്ളിയാം മൂലയിൽ നിന്ന് പയ്യാമ്പലം ഭാഗത്തേക്ക് വരികയായിരുന്ന KL 10 എൽ 5653 എന്ന നമ്പറിലുള്ള ജീപ്പ് ഇടിക്കുകയായിരുന്നു.

അപകടം നടന്ന ഉടൻതന്നെ മുഹാദിനെ കണ്ണൂരിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. കുട്ടിയുടെ മരണം നാടിനെ ദുഃഖത്തിലാഴ്ത്തി. പൊതുവാച്ചേരി ഖലീഫ മൻസിലിലെ വി.എൻ. മുഹമ്മദ് കുഞ്ഞിയുടെയും ഷരീഫയുടെയും ഏക മകനാണ് മുഹാദ്. മൃതദേഹം പോസ്റ്റ്‌മോർട്ടത്തിനായി കണ്ണൂർ ജില്ലാ ആശുപത്രി മോർച്ചറിയിലേക്ക് മാറ്റി.

അപകടത്തെക്കുറിച്ച് കണ്ണൂർ ടൗൺ പൊലിസ് കേസെടുത്ത് അന്വേഷണം ആരംഭിച്ചിട്ടുണ്ട്. ജീപ്പ് ഡ്രൈവറെ കസ്റ്റഡിയിലെടുത്തതായാണ് വിവരം. സംഭവസ്ഥലത്തുണ്ടായിരുന്നവരുടെയും ദൃക്‌സാക്ഷികളുടെയും മൊഴി പൊലിസ് രേഖപ്പെടുത്തി. കൂടുതൽ അന്വേഷണങ്ങൾക്ക് ശേഷമേ അപകടത്തിന്റെ യഥാർത്ഥ കാരണം വ്യക്തമാകൂ എന്ന് പൊലിസ് അറിയിച്ചു.

#KannurNews, #Accident, #ChildDeath, #Payyambalam, #JeepAccident, #KeralaNews