അരിയിൽ അബ്ദുൽ ഷുക്കൂർ വധക്കേസിൽ 13 പേരെ ശിക്ഷിക്കുകയും 18 പേരെ കുറ്റവിമുക്തരാക്കുകയും ചെയ്ത സിബിഐ കോടതി വിധിക്ക് പിന്നാലെ അപ്പീൽ നീക്കങ്ങളുമായി കുടുംബവും സിപിഎമ്മും

 
Ariyil Shukkoor Murder Case: CBI Court Acquits 18 Including P Jayarajan, Convicts 13; Mother Vows to Appeal

Photo Credit: Special Arrangement enhanced by Chat GPT

ADVERTISEMENT

● ഒന്നാം പ്രതി കെ വി സുമേഷ് അടക്കം 13 പ്രതികൾ കുറ്റക്കാരാണെന്ന് കോടതി കണ്ടെത്തി; സുമേഷിനെതിരെ കൊലപാതകക്കുറ്റം നിലനിൽക്കും.
● തങ്ങൾക്ക് ലഭിച്ചത് ഭാഗിക നീതി മാത്രമാണെന്നും വിധിക്കെതിരെ അപ്പീൽ നൽകുമെന്നും മാതാവ് പി ആത്തിക്കയും കുടുംബവും പ്രതികരിച്ചു.
● 2012 ഫെബ്രുവരി 20-നാണ് കണ്ണപുരത്തിനടുത്ത് കീഴറ വള്ളുവൻ കടവ് ചുള്ളിയോട് വയലിൽ ഷുക്കൂർ കൊല്ലപ്പെട്ടത്.
● തളിപ്പറമ്പ് സഹകരണ ആശുപത്രിയിലെ ഗൂഢാലോചന, പാർട്ടി കോടതി ചേർന്ന് വധിക്കൽ തുടങ്ങിയ ആരോപണങ്ങൾ കോടതിയിൽ തെളിയിക്കാനായില്ല.

കണ്ണൂർ: (KVARTHA) രാഷ്ട്രീയ കൊലപാതകത്തിൻ്റെ ഇരയായ അരിയിൽ അബ്ദുൽ ഷുക്കൂറിൻ്റെ (19) വധക്കേസിൽ 14 വർഷം നീണ്ട നിയമപോരാട്ടത്തിനൊടുവിൽ സി.ബി.ഐ. പ്രത്യേക കോടതി (3) വിധി പുറപ്പെടുവിച്ചു. കേസിലെ ഗൂഢാലോചനക്കാരെന്ന് കുടുംബം ആരോപിച്ച സി.പി.എം. സംസ്ഥാന സെക്രട്ടേറിയറ്റ് അംഗം പി. ജയരാജൻ, സംസ്ഥാന കമ്മിറ്റി അംഗം ടി.വി. രാജേഷ്, പാർട്ടി സംസ്ഥാന സെക്രട്ടറി എം.വി. ഗോവിന്ദൻ്റെ മകൻ ശ്യാംജിത്ത് എന്നിവർ ഉൾപ്പെടെ 18 പ്രതികളെ കോടതി കുറ്റവിമുക്തരാക്കി. അതേസമയം, ഒന്നാം പ്രതി കെ.വി. സുമേഷ് അടക്കം 13 പ്രതികൾ കുറ്റക്കാരാണെന്ന് കോടതി കണ്ടെത്തി.

Aster_MIMS

തങ്ങൾക്ക് ലഭിച്ചത് ഭാഗികമായ നീതി മാത്രമാണെന്നും പൂർണമായ നീതി കിട്ടിയില്ലെന്നുമാണ് ഷുക്കൂറിൻ്റെ കുടുംബത്തിൻ്റെ പ്രതികരണം. ഷുക്കൂറിൻ്റെ ഉമ്മ പി. ആത്തിക്കയും സഹോദരൻ ദാവൂദും മുസ്‌ലിം ലീഗിൻ്റെ സഹായത്തോടെയാണ് 14 വർഷമായി നിയമപോരാട്ടം നടത്തിയത്. കോടതിയിൽ നിന്നും പ്രതീക്ഷിച്ചത്ര നീതി ലഭിച്ചിട്ടില്ലെങ്കിലും വിധിക്കെതിരെ അപ്പീൽ നൽകി നിയമപോരാട്ടം തുടരാനാണ് മാതാവ് ആത്തിക്കയുടെയും ബന്ധുക്കളുടെയും തീരുമാനം.

ഒന്നാം പ്രതി കെ.വി. സുമേഷ്, മൂന്നാം പ്രതി അനൂപ്, ഏഴാം പ്രതി പവിത്രൻ, ഒമ്പതാം പ്രതി മനോഹരൻ, 10-ാം പ്രതി ദിനേശൻ, 12-ാം പ്രതി ബിജുമോൻ, 14-ാം പ്രതി ഇ.പി. രാധാകൃഷ്ണൻ, 15-ാം പ്രതി ഷിജിൻ മോഹൻ, 16-ാം പ്രതി കെ.വി. സജിത്ത്, 25-ാം പ്രതി വി.വി. മോഹനൻ, 26-ാം പ്രതി പുരുഷോത്തമൻ, 27-ാം പ്രതി അജിത് കുമാർ, 28-ാം പ്രതി പി.പി. സുരേശ എന്നിവരാണ് കുറ്റക്കാരെന്ന് കോടതി കണ്ടെത്തിയ 13 പേർ. ഇതിൽ കെ.വി. സുമേഷിനെതിരെ കൊലപാതകക്കുറ്റം നിലനിൽക്കും.

2012-ലെ കൊലപാതകവും സി.ബി.ഐ. അന്വേഷണവും

2012 ഫെബ്രുവരി 20-നാണ് കണ്ണൂർ ജില്ലയിലെ കണ്ണപുരത്തിനടുത്ത് കീഴറ വള്ളുവൻ കടവ് ചുള്ളിയോട് വയലിൽ എം.എസ്.എഫ്. പ്രവർത്തകനായ അരിയിൽ അബ്ദുൽ ഷുക്കൂർ കൊല്ലപ്പെടുന്നത്. 2012 ഫെബ്രുവരി 19-ന് വൈകിട്ട് അരിയിൽ പ്രദേശത്ത് മുസ്‌ലിം ലീഗും സി.പി.എമ്മും തമ്മിൽ സംഘർഷമുണ്ടായിരുന്നു. 

ഇതിൻ്റെ തുടർച്ചയായി ഫെബ്രുവരി 20-ന് രാവിലെ 11.30-ന് ശേഷം പ്രദേശം സന്ദർശിക്കാനെത്തിയ അന്നത്തെ സി.പി.എം. കണ്ണൂർ ജില്ലാ സെക്രട്ടറി പി. ജയരാജൻ്റെയും കല്ല്യാശ്ശേരി എം.എൽ.എ. ടി.വി. രാജേഷിൻ്റെയും വാഹനവ്യൂഹം അരിയിൽ മുസ്‌ലിം ലീഗ് ഓഫീസിന് സമീപം ഒരു സംഘം തടഞ്ഞിരുന്നു.

ഇതിനിടെ, കോതായി എന്ന സ്ഥലത്ത് ക്രിക്കറ്റ് കളിക്കുന്നതിനിടെ പരിക്കേറ്റ സുഹൃത്ത് അയ്യൂബിനെ ആശുപത്രിയിൽ കാണിക്കാനായി ഷുക്കൂറും സുഹൃത്തുക്കളും വീട്ടിനു മുന്നിലെ പുഴയിലൂടെ തോണിയിൽ ചെറുകുന്ന് മിഷൻ ആശുപത്രിയിലേക്ക് പുറപ്പെട്ടു. കീഴറ വള്ളുവൻ കടവിൽവെച്ച് സി.പി.എം. പ്രവർത്തകർ ഇവരെ പിന്തുടർന്നുവെന്നും സമീപത്തെ മുഹമ്മദ് കുഞ്ഞിയുടെ വീട്ടിൽ അഭയം തേടിയപ്പോൾ തടഞ്ഞുവെച്ചുവെന്നുമാണ് അന്വേഷണത്തിൽ ഉയർന്ന ആരോപണം. 

ഈ സമയത്ത് തളിപ്പറമ്പ് സഹകരണ ആശുപത്രിയിൽ ചികിത്സയിലായിരുന്ന പി. ജയരാജനുമായും ടി.വി. രാജേഷുമായും കീഴറയിൽനിന്നുള്ള പ്രവർത്തകർ ബന്ധപ്പെട്ട് ഗൂഢാലോചന നടത്തിയശേഷമാണ് ഷുക്കൂറിനെ വയലിൽവെച്ച് കുത്തിക്കൊലപ്പെടുത്തിയതെന്നായിരുന്നു സി.ബി.ഐ.യുടെ കുറ്റപത്രം.

ഷുക്കൂറിനൊപ്പം അവസാനംവരെ ഉണ്ടായിരുന്ന സക്കരിയയ്ക്ക് വെട്ടേറ്റെങ്കിലും കണ്ണപുരം പൊലീസ് രക്ഷപ്പെടുത്തി ചെറുകുന്ന് മിഷൻ ആശുപത്രിയിൽ പ്രവേശിപ്പിച്ചതിനാൽ ജീവൻ രക്ഷപ്പെട്ടു. പി.വി. അയ്യൂബ്, ഹാരിസ് എം.കെ., പി. അബ്ദുൽ സലാം എന്നിവരും ആക്രമണത്തിൽനിന്ന് രക്ഷപ്പെട്ടിരുന്നു.

ആത്തിക്ക നൽകിയ ആദ്യമൊഴിയുടെ അടിസ്ഥാനത്തിൽ കണ്ണപുരം പൊലീസ് കേസെടുത്ത് വളപട്ടണം സി.ഐ. യു. പ്രേമൻ അന്വേഷണം ആരംഭിച്ചു. പിന്നീട് ഇടതു സർക്കാർ സി.ബി.ഐ. അന്വേഷണത്തെ എതിർത്തിട്ടും ആത്തിക്ക ഹൈകോടതിയിൽ നടത്തിയ പോരാട്ടത്തിനൊടുവിൽ 2016 ഫെബ്രുവരിയിൽ കേസ് സി.ബി.ഐ.ക്ക് കൈമാറി. 

മൂന്ന് വർഷത്തിന് ശേഷം 2019 ഫെബ്രുവരി 11-നാണ് 81 സാക്ഷികളെ ഉൾപ്പെടുത്തി സി.ബി.ഐ. കുറ്റപത്രം സമർപ്പിച്ചത്. എന്നാൽ തളിപ്പറമ്പ് സഹകരണ ആശുപത്രിയിലെ അടച്ചിട്ട മുറിയിലെ ഗൂഢാലോചന, ചുള്ളിയോട് വയലിൽ പാർട്ടി കോടതി ചേർന്ന് വധിക്കൽ തുടങ്ങിയ ആരോപണങ്ങൾ കോടതിയിൽ തെളിയിക്കാനായില്ല. 

പഴുതുകളുള്ള കുറ്റപത്രവും പ്രോസിക്യൂഷൻ വീഴ്ചയുമാണ് ഇതിന് കാരണമെന്ന ആരോപണം ഉയർന്നിട്ടുണ്ട്. നേതാക്കൾ കുറ്റവിമുക്തരായത് മുസ്‌ലിം ലീഗിനും തിരിച്ചടിയായിട്ടുണ്ട്. തുടക്കത്തിൽ പാർട്ടി ഗൗരവത്തോടെയല്ല കേസ് കണ്ടതെന്ന വിമർശനവും വിവിധ കോണുകളിൽ നിന്നും ഉയർന്നിരുന്നു.

പാർട്ടി കോടതിയെന്ന ആരോപണം പൊളിഞ്ഞു: കെ.കെ. രാഗേഷ്

അരിയിൽ ഷുക്കൂർ വധക്കേസിൽ പാർട്ടി കോടതിയും പരസ്യ വിചാരണയുമെന്ന 14 വർഷമായി കെട്ടിപ്പൊക്കിയ പെരുംനുണക്കഥ പൊളിഞ്ഞെന്ന് സി.പി.എം. നേതാവ് കെ.കെ. രാഗേഷ് കണ്ണൂരിൽ മാധ്യമങ്ങളോട് പ്രതികരിച്ചു. പാർട്ടി ഗൂഢാലോചനയെന്ന നുണ വേവിച്ചെടുത്തു വിളമ്പുകയായിരുന്നുവെന്നും 14 വർഷം നേതാക്കളെ വേട്ടയാടിയെന്നും അദ്ദേഹം പറഞ്ഞു. 

യുക്തിക്ക് നിരക്കാത്ത ആരോപണമാണ് ഉയർത്തിയത്. കെട്ടിപ്പൊക്കിയ നുണ തകർന്നുവെന്ന് മാധ്യമങ്ങൾ ഇനിയെങ്കിലും സമ്മതിക്കണമെന്ന് ആവശ്യപ്പെട്ട അദ്ദേഹം, കുറ്റക്കാരെന്ന് കണ്ടെത്തിയവരുടെ നിരപരാധിത്വം തെളിയിക്കാൻ അവസരമുണ്ടെന്നും അതിനായി മേൽക്കോടതിയിൽ അപ്പീൽ പോകുമെന്നും അറിയിച്ചു.

നേതാക്കളെ വേട്ടയാടാൻ രാഷ്ട്രീയ ഗൂഢാലോചന നടന്നു: എം.വി. ജയരാജൻ

യൂത്ത് ലീഗ് പ്രവർത്തകൻ അരിയിൽ ഷുക്കൂർ വധക്കേസിൽ സി.പി.എം. നേതാക്കളെ പ്രതികളാക്കാൻ അന്നത്തെ യു.ഡി.എഫ്. സർക്കാർ കള്ളസാക്ഷികളെയും വ്യാജ തെളിവുകളെയും ഉപയോഗിച്ചെന്ന് സി.പി.എം. സംസ്ഥാന സെക്രട്ടേറിയറ്റ് അംഗം എം.വി. ജയരാജൻ ആരോപിച്ചു. 

കോടതി വിധിക്ക് ശേഷം കണ്ണൂരിൽ മാധ്യമങ്ങളോട് പ്രതികരിക്കുകയായിരുന്നു അദ്ദേഹം. കേസിൽ സി.പി.എം. നേതൃത്വത്തിനെതിരെ നടന്നത് വലിയ രാഷ്ട്രീയ ഗൂഢാലോചനയായിരുന്നുവെന്നും, ഗൂഢാലോചന തെളിയിക്കാൻ പ്രോസിക്യൂഷന് കഴിഞ്ഞില്ലെന്ന് കോടതി വ്യക്തമാക്കിയതോടെ യു.ഡി.എഫിൻ്റെ രാഷ്ട്രീയ പ്രേരിത നടപടികൾക്ക് തിരിച്ചടിയേറ്റെന്നും അദ്ദേഹം പറഞ്ഞു.

ലീഗ് പ്രവർത്തകർ കട കത്തിക്കുകയും ദേശാഭിമാനി ഏജൻ്റിനെ മർദിക്കുകയും ചെയ്ത സ്ഥലം സന്ദർശിക്കാനെത്തിയ പി. ജയരാജനെയും ടി.വി. രാജേഷ് എം.എൽ.എ.യെയും ആക്രമിച്ചതോടെയാണ് തുടർസംഭവങ്ങൾ ഉണ്ടായതെന്ന് എം.വി. ജയരാജൻ പറഞ്ഞു. അന്നത്തെ ഭരണനേതൃത്വം ലീഗ് പ്രവർത്തകരുടെ സ്ഥാപനങ്ങളിൽ ജോലി ചെയ്യുന്നവരെ ഭീഷണിപ്പെടുത്തിയാണ് സാക്ഷികളാക്കിയത്. 

വിചാരണയ്ക്കിടെ ഭൂരിഭാഗം പ്രോസിക്യൂഷൻ സാക്ഷികളെയും വിസ്തരിക്കാതെ പ്രോസിക്യൂഷൻ തന്നെ ഒഴിവാക്കിയത് കള്ളസാക്ഷികളെയും കൃത്രിമ തെളിവുകളെയും ഉപയോഗിച്ചാണ് കേസ് കെട്ടിച്ചമച്ചതെന്നതിൻ്റെ തെളിവാണെന്നും അദ്ദേഹം ആരോപിച്ചു. 2012-ൽ നടന്ന സംഭവത്തിൽ അന്നത്തെ യു.ഡി.എഫ്. സർക്കാരും കേന്ദ്രത്തിലെ യു.പി.എ. സർക്കാരും ചേർന്നാണ് സി.പി.എം. നേതൃത്വത്തെ രാഷ്ട്രീയമായി വേട്ടയാടുക എന്ന ലക്ഷ്യത്തോടെ കേസ് സി.ബി.ഐ.ക്ക് കൈമാറിയതെന്നും എം.വി. ജയരാജൻ കൂട്ടിച്ചേർത്തു.

ഈ കോടതി വിധിയും പ്രതികരണങ്ങളും നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും പങ്കുവെക്കുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം

Article Summary: After a 14-year legal battle, the CBI Special Court (3) acquitted 18 accused, including CPM leaders P. Jayarajan, T.V. Rajesh, and Shyamjith, in the 2012 Ariyil Shukkoor murder case, while convicting 13 others including prime accused K.V. Sumesh. Calling it partial justice, Shukkoor's mother Athikka announced plans to appeal. 

#Kvartha #ShukkoorMurderCase #KannurNews #CBICourtVerdict #PJayarajan #CPMKerala #MuslimLeague #KeralaPolitics #MalayalamNews #AmmuNews

നിങ്ങളുടെ അഭിപ്രായങ്ങൾ കെവാർത്തയുടെ ഫെയ്‌സ്‌ബുക്ക് പേജിൽ പങ്കുവെക്കാം. അസഭ്യവും അശ്ലീലവും വിദ്വേഷം വളർത്തുന്നതുമായ കമന്റുകൾ പാടില്ല. നിയമവിരുദ്ധമായ ഇത്തരം പരാമർശങ്ങൾ നടത്തുന്നത് ഐടി ആക്ട് പ്രകാരം കുറ്റകരമാണ്. കർശന നിയമനടപടികൾ നേരിടേണ്ടിവന്നേക്കാം.
John Varghese
John Varghese

302 Articles

Tags

Share this story

wellfitindia