എടയന്നൂർ ശുഐബ് വധക്കേസ്: ആകാശ് തില്ലങ്കേരി ഉൾപ്പെടെ മുഴുവൻ പ്രതികളുടെയും ജാമ്യം റദ്ദാക്കി കോടതി

കണ്ണൂർ: (KVARTHA) യൂത്ത് കോൺഗ്രസ് എടയന്നൂർ മണ്ഡലം പ്രസിഡന്റായിരുന്ന ശുഐബിനെ വെട്ടിക്കൊലപ്പെടുത്തിയെന്ന കേസിൽ മുഴുവൻ പ്രതികളുടെയും ജാമ്യം കോടതി റദ്ദാക്കി. തലശ്ശേരി അഡീഷണൽ സെഷൻസ് കോടതിയുടേതാണ് ഈ നടപടി. ഇതോടെ കേസിലെ ഒന്നാം പ്രതിയായ ആകാശ് തില്ലങ്കേരി ഉൾപ്പെടെയുള്ള പ്രതികളെല്ലാം വീണ്ടും റിമാൻഡിലായി. ജാമ്യം റദ്ദാക്കിയ മുഴുവൻ പ്രതികളെയും റിമാൻഡ് ചെയ്യാൻ കോടതി നിർദേശിക്കുകയായിരുന്നു.

കേസിൻ്റെ വിചാരണ മറ്റൊരു കോടതിയിലേക്ക് മാറ്റണമെന്ന് പ്രതിഭാഗം കോടതിയോട് ആവശ്യപ്പെട്ടിരുന്നു. ഈ സാഹചര്യത്തിലാണ് നിലവിൽ അനുവദിച്ചിരുന്ന ജാമ്യം റദ്ദാക്കാൻ കോടതി തീരുമാനിച്ചത്. കഴിഞ്ഞയാഴ്ചയാണ് കേസിൽ വിചാരണ നടപടികൾ ആരംഭിച്ചത്. കുറ്റകൃത്യത്തിൽ നേരിട്ട് പങ്കെടുത്തുവെന്ന് പോലീസ് കുറ്റപത്രത്തിൽ പറയുന്ന ഒന്ന് മുതൽ അഞ്ച് വരെയുള്ള പ്രതികളെ സാക്ഷി ഇതിനകം കോടതിയിൽ തിരിച്ചറിഞ്ഞിട്ടുണ്ട്.

ആക്രമണ സമയത്ത് ശുഐബിനൊപ്പമുണ്ടായിരുന്ന, പരിക്കേറ്റ ഇ. റിയാസിനെയാണ് കോടതി വിസ്തരിച്ചത്. ആയുധങ്ങളുമായെത്തിയ സംഘം ശുഐബിനെ തുരുതുരാ വെട്ടിവീഴ്ത്തുകയായിരുന്നു എന്നാണ് റിയാസ് കോടതിയിൽ നൽകിയ മൊഴി. വിചാരണയുടെ ആദ്യ വേളയിൽ തന്നെ ആകാശ് തില്ലങ്കേരി ഉൾപ്പെടെയുള്ളവരെ സാക്ഷി തിരിച്ചറിഞ്ഞിരുന്നു. കേസിൻ്റെ സാക്ഷി വിസ്താരം ജൂൺ 14 വരെ തുടരും.

2018 ഫെബ്രുവരി 12-ന് രാത്രി പത്തരയോടെയാണ് കേസിനാസ്പദമായ സംഭവം നടന്നതെന്നാണ് പോലീസ് കേസ്. ഒന്നാം പ്രതി ആകാശ് തില്ലങ്കേരി ഉൾപ്പെടെയുള്ള സിപിഎം പ്രവർത്തകരും അനുഭാവികളുമായ 11 പേരായിരുന്നു ആദ്യ കുറ്റപത്രത്തിൽ ഉണ്ടായിരുന്നത്. പിന്നീട് തുടരന്വേഷണം നടത്തിയ അന്വേഷണസംഘം ആറ് പ്രതികളെ കൂടി കേസിൽ ഉൾപ്പെടുത്തി കോടതിയിൽ അധിക കുറ്റപത്രം സമർപ്പിക്കുകയായിരുന്നു.

ഈ വാർത്ത നിങ്ങളുടെ സുഹൃത്തുക്കൾക്കും ഗ്രൂപ്പുകൾക്കും ഷെയർ ചെയ്യുക. പുതിയ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. 

Article Summary: The Thalassery Additional Sessions Court has cancelled the bail of all accused, including Akash Thillankeri, in the Youth Congress leader Shuhaib murder case.

#ShuhaibMurderCase #AkashThillankeri #ThalasseryCourt #KannurNews #YouthCongress #KeralaPolitics