റസീനയുടെ ആത്മഹത്യ: ആൾക്കൂട്ട വിചാരണയ്ക്ക് തെളിവെന്ന് പോലീസ്

കണ്ണൂർ: (KVARTHA) കൂത്തുപറമ്പിനടുത്ത് കായലോട് പറമ്പായിലെ റസീന മൻസിലിൽ റസീന എന്ന യുവതി ആത്മഹത്യ ചെയ്തത് ആൾക്കൂട്ട വിചാരണയെ തുടർന്നാണെന്ന് വ്യക്തമായ തെളിവുകൾ ലഭിച്ചതായി കണ്ണൂർ സിറ്റി പോലീസ് കമ്മീഷണർ പി. നിധിൻ രാജ് അറിയിച്ചു. 

കണ്ണൂർ സിറ്റി പോലീസ് കമ്മീഷണർ ഓഫീസിൽ മാധ്യമപ്രവർത്തകരോട് സംസാരിക്കുകയായിരുന്നു അദ്ദേഹം. റസീനയുടെ മൃതദേഹത്തിൽ നിന്ന് ലഭിച്ച ആത്മഹത്യാക്കുറിപ്പിൽ ഈ വിവരങ്ങൾ വ്യക്തമായി രേഖപ്പെടുത്തിയിട്ടുണ്ട്. ആത്മഹത്യാക്കുറിപ്പിൽ പ്രതികളുടെ പേര് പരാമർശിച്ചതിനെ തുടർന്നാണ് അറസ്റ്റ് നടന്നത്.

യുവതിയുടെ ആൺസുഹൃത്തിന്റെ മൊബൈൽ ഫോൺ പ്രതികളുടെ കയ്യിൽ നിന്നാണ് പോലീസ് കണ്ടെടുത്തത്. എസ്.ഡി.പി.ഐ പ്രവർത്തകരായ പ്രതികൾ പറമ്പായിയിലെ എസ്.ഡി.പി.ഐ ഓഫീസിലെത്തിച്ച് യുവാവിനെ അഞ്ച് മണിക്കൂറോളം ചോദ്യം ചെയ്യുകയായിരുന്നു. 

മയ്യിൽ സ്വദേശിയായ ഈ ആൺസുഹൃത്ത് നിലവിൽ കേസിൽ പ്രതിയല്ല. ഇയാൾക്കെതിരെ ഇതുവരെ പരാതികളൊന്നും ലഭിച്ചിട്ടില്ലെന്നും, പരാതി ലഭിക്കുകയാണെങ്കിൽ അന്വേഷിക്കുമെന്നും കമ്മീഷണർ വ്യക്തമാക്കി. 

റസീനയുടെ മരണത്തിന് ഇടയാക്കിയ ആൾക്കൂട്ട വിചാരണയിൽ കൂടുതൽ പേർ പങ്കെടുത്തിരുന്നോ എന്ന് പിണറായി പോലീസ് അന്വേഷിച്ചുവരികയാണെന്നും സിറ്റി പോലീസ് കമ്മീഷണർ അറിയിച്ചു.

കഴിഞ്ഞ ചൊവ്വാഴ്ചയാണ് റസീനയെ വീടിനുള്ളിൽ തൂങ്ങിമരിച്ച നിലയിൽ കണ്ടെത്തിയത്. സംഭവത്തിൽ എസ്.ഡി.പി.ഐ പ്രവർത്തകരായ എംസി മൻസിലിൽ വി.സി. മുബഷീർ, കെ.എ. ഫൈസൽ, വി.കെ. റഫ്‌നാസ് എന്നിവരെ പിണറായി പോലീസ് അറസ്റ്റ് ചെയ്തിട്ടുണ്ട്. 

ആത്മഹത്യാ പ്രേരണാ കുറ്റമാണ് ഇവർക്കെതിരെ ചുമത്തിയിട്ടുള്ളത്. പ്രതികളെ തലശ്ശേരി കോടതിയിൽ ഹാജരാക്കിയ ശേഷം തലശ്ശേരി സബ് ജയിലിൽ റിമാൻഡ് ചെയ്തു.

ഈ വാർത്ത നിങ്ങളുടെ സുഹൃത്തുക്കളുമായി പങ്കുവെച്ച് ഈ വിഷയത്തിൽ നിങ്ങളുടെ അഭിപ്രായങ്ങൾ രേഖപ്പെടുത്തുക.

Article Summary: Rasina's death linked to mob trial; three SDPI activists arrested in Kannur.

#RasinaDeath #MobTrial #KannurCrime #SDPI #KeralaPolice #JusticeForRasina