(KVARTHA) പുലിപ്പല്ല് മാല ധരിച്ച കേസിൽ റാപ്പർ വേടന് പെരുമ്പാവൂർ കോടതി ജാമ്യം അനുവദിച്ചു. ജാമ്യ വ്യവസ്ഥകൾ എന്തൊക്കെയാണെന്ന് വ്യക്തമായിട്ടില്ല. അന്വേഷണവുമായി വേടൻ പൂർണ്ണമായി സഹകരിക്കുന്നുണ്ടെന്ന വനംവകുപ്പ് ഉദ്യോഗസ്ഥരുടെ നിലപാട് കോടതി പരിഗണിച്ചു. 

ഒപ്പം, താൻ ധരിച്ചിരുന്നത് യഥാർത്ഥ പുലിപ്പല്ലാണെന്ന് അറിയില്ലായിരുന്നു എന്ന വേടന്റെ മൊഴിയും ജാമ്യം അനുവദിക്കുന്നതിൽ നിർണായകമായി. മൃഗവേട്ട ഉൾപ്പെടെയുള്ള വകുപ്പുകളാണ് വേടനെതിരെ ചുമത്തിയിരുന്നത്.

'വേടൻ' എന്നറിയപ്പെടുന്ന തൃശ്ശൂർ മുളങ്കുന്നത്തുകാവ് വടക്കേപുരയിൽ വി.എം. ഹിരൺദാസിനെ ഏതാനും ദിവസങ്ങൾക്ക് മുൻപ് കഞ്ചാവുമായി പൊലീസ് പിടികൂടിയിരുന്നു. തൃപ്പൂണിത്തുറയ്ക്ക് സമീപം എരൂർ കണിയാമ്പുഴയിലെ ഫ്ലാറ്റിൽ ഹിൽപാലസ് പൊലീസ് നടത്തിയ റെയ്ഡിൽ ആറ് ഗ്രാം കഞ്ചാവ് കണ്ടെത്തി. 

ഇതിനെത്തുടർന്നുള്ള ചോദ്യം ചെയ്യലിലാണ് വേടന്റെ കഴുത്തിൽ പുലിപ്പല്ലിന്റെ ലോക്കറ്റുള്ള മാല ശ്രദ്ധയിൽപ്പെട്ടത്. തുടർന്ന് വനംവകുപ്പ് ഉദ്യോഗസ്ഥർ അദ്ദേഹത്തെ അറസ്റ്റ് ചെയ്യുകയായിരുന്നു.

പിടിച്ചെടുത്ത കഞ്ചാവിന്റെ അളവ് കുറവായതിനാൽ വേടനും ഒപ്പമുണ്ടായിരുന്ന ഒമ്പത് പേർക്കും സ്റ്റേഷൻ ജാമ്യം ലഭിച്ചിരുന്നു. ഇതിന് പിന്നാലെയാണ് വനംവകുപ്പ് ഉദ്യോഗസ്ഥർ വേടനെ കസ്റ്റഡിയിലെടുത്തത്. പുലിപ്പല്ല് തമിഴ്നാട്ടിൽ നിന്നുള്ള ഒരു ആരാധകൻ സമ്മാനിച്ചതാണെന്നാണ് വേടൻ നൽകിയ വിശദീകരണം. 

സംഭവത്തിൽ കൂടുതൽ തെളിവെടുപ്പ് നടത്തുന്നതിനായി വേടനെ കോടനാട് റേഞ്ച് ഓഫീസ് പരിധിയിലെ മേയ്ക്കപ്പാല സ്റ്റേഷനിലേക്ക് കൊണ്ടുപോയിരുന്നു. പുലിപ്പല്ല് നൽകിയ രഞ്ജിത് കുമ്പിടിയെ തനിക്കറിയില്ലെന്നും വേടൻ മാധ്യമങ്ങളോട് പ്രതികരിച്ചു.

ഈ വാർത്തയെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കൂ! ഷെയർ ചെയ്യുക 

Summary: Rapper Vedan received bail from Perumbavoor court in the tiger nail necklace case. The court considered his cooperation with the investigation and his statement that he was unaware it was a real tiger nail. He was previously arrested in a drug case.

#VedanBail, #TigerNailCase, #KeralaNews, #PerumbavoorCourt, #ForestDepartment, #Rapper