സംവിധായകൻ രഞ്ജിത്തിനെതിരായ ലൈംഗികാതിക്രമ കേസ് ഹൈകോടതി റദ്ദാക്കി

കൊച്ചി: (KVARTHA) പ്രശസ്ത സംവിധായകൻ രഞ്ജിത്തിനെതിരായ ബംഗാളി നടി നൽകിയ ലൈംഗികാതിക്രമ കേസ് ഹൈകോടതി റദ്ദാക്കി. കേസെടുക്കുന്നതിൽ വന്ന കാലതാമസം ചൂണ്ടിക്കാട്ടിയാണ് കോടതിയുടെ നിർണ്ണായക നടപടി. 

പതിനഞ്ച് വർഷത്തിലധികം വൈകി കേസെടുത്ത മജിസ്‌ട്രേറ്റ് കോടതിയുടെ നടപടി നിയമപരമായി നിലനിൽക്കില്ലെന്ന് ഹൈകോടതി വ്യക്തമാക്കി. നടിയുടെ വെളിപ്പെടുത്തലിന്റെ അടിസ്ഥാനത്തിൽ എടുത്ത കേസ് റദ്ദാക്കണമെന്ന് ആവശ്യപ്പെട്ട് രഞ്ജിത്ത് ഹൈക്കോടതിയെ സമീപിക്കുകയായിരുന്നു.

 തനിക്കെതിരായ ആരോപണങ്ങൾ നിലനിൽക്കില്ലെന്നും, 2009-ൽ നടന്നതായി പറയുന്ന സംഭവത്തിൽ 2024 ഓഗസ്റ്റ് 26-നാണ് നടി പരാതി നൽകിയതെന്നും രഞ്ജിത്ത് തന്റെ ഹർജിയിൽ ചൂണ്ടിക്കാട്ടിയിരുന്നു.

പാലേരി മാണിക്യം എന്ന സിനിമയുടെ ചിത്രീകരണ സമയത്ത് രഞ്ജിത്ത് മോശമായി പെരുമാറിയെന്നായിരുന്നു നടിയുടെ പ്രധാന വെളിപ്പെടുത്തൽ. പ്ലസ്ടുവിന് പഠിക്കുമ്പോൾ ‘ബാവൂട്ടിയുടെ നാമത്തിൽ’ എന്ന ചിത്രത്തിന്റെ ലൊക്കേഷനിൽ വെച്ചാണ് സംവിധായകനെ പരിചയപ്പെട്ടതെന്നും, പിന്നീട് ‘പാലേരി മാണിക്യം’ സിനിമയിൽ അഭിനയിക്കാൻ വിളിച്ചുവരുത്തി ഹോട്ടൽ മുറിയിൽ വെച്ച് പീഡിപ്പിച്ചു എന്നുമാണ് ബംഗാളി നടിയുടെ പരാതിയിൽ പറയുന്നത്.

സിനിമയുമായി ബന്ധപ്പെട്ട ചർച്ചകൾക്കായി രഞ്ജിത്ത് താമസിക്കുന്ന കൊച്ചി കടവന്ത്രയിലെ ഫ്ലാറ്റിലേക്ക് വിളിച്ചുവരുത്തിയെന്നും, ചർച്ചയ്ക്കിടെ രഞ്ജിത്ത് തന്റെ കയ്യിൽ കയറിപ്പിടിക്കുകയും പിന്നീട് ശരീരത്തിന്റെ മറ്റ് ഭാഗങ്ങളിൽ സ്പർശിക്കുകയും ചെയ്തുവെന്നും പരാതിയിൽ പറയുന്നു. ഇതിനെ തുടർന്ന് അവിടുന്ന് ഇറങ്ങിയ താൻ സിനിമയിൽ അഭിനയിക്കാതെ തിരിച്ചുപോവുകയായിരുന്നുവെന്നും നടി മൊഴി നൽകിയിരുന്നു.

ബംഗാളി നടി പരാതി ഉന്നയിച്ചതിന് പിന്നാലെ താൻ ഇരയാണെന്നായിരുന്നു സംവിധായകൻ രഞ്ജിത്തിന്റെ പ്രതികരണം. ഇതേത്തുടർന്ന് നടി നിയമപരമായ നടപടികളുമായി മുന്നോട്ടുപോവുകയായിരുന്നു. 

നടിയെ പിന്തുണച്ച് സംവിധായകൻ ജോഷിയും രംഗത്തെത്തിയിരുന്നു. ഈ വിവാദങ്ങളുടെ പശ്ചാത്തലത്തിൽ രഞ്ജിത്ത് ചലച്ചിത്ര അക്കാദമി ചെയർമാൻ സ്ഥാനം രാജിവെക്കാൻ നിർബന്ധിതനായിരുന്നു.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായം കമൻ്റ് ചെയ്യുക. 

Article Summary: Kerala High Court quashes assault case against director Ranjith.

#Ranjith #KeralaHighCourt #AssaultCase #Quashed #PaleriManikyam #BengaliActress