തളിപ്പറമ്പ്: (KVARTHA) കോടികളുടെ നിക്ഷേപ തട്ടിപ്പ് കേസിൽ എട്ട് വർഷമായി ഒളിവിൽ കഴിഞ്ഞിരുന്ന പ്രതി വൃന്ദാ രാജേഷിനെ പോലീസ് റിമാൻഡ് ചെയ്തു. കോട്ടയം കുടമാളൂർ സ്വദേശിനിയാണ് ഇവർ. ജുഡീഷ്യൽ കസ്റ്റഡിയിൽ നിന്നും ഇവരെ വാങ്ങി വിശദമായി ചോദ്യം ചെയ്യുമെന്ന് പോലീസ് അറിയിച്ചു.

തളിപ്പറമ്പ് ആസ്ഥാനമായി പ്രവർത്തിച്ചിരുന്ന സിഗ്‌സ്ടെക് എന്ന സ്ഥാപനം നടത്തിയ നിക്ഷേപ തട്ടിപ്പുമായി ബന്ധപ്പെട്ടാണ് കേസ്. ഈ സ്ഥാപനത്തിലൂടെ വൃന്ദാ രാജേഷും ഭർത്താവ് രാജേഷും ചേർന്ന് ആയിരക്കണക്കിന് നിക്ഷേപകരിൽ നിന്ന് കോടികൾ തട്ടിയെടുത്തെന്നാണ് പരാതി. സ്ഥാപനത്തിന്റെ ഉടമ രാജേഷ് ആണെങ്കിലും തട്ടിപ്പിന്റെ സൂത്രധാരൻ വൃന്ദയായിരുന്നുവെന്ന് പോലീസ് സംശയിക്കുന്നു. 2017 ലാണ് സിഗ്‌സ്ടെക് അടച്ചുപൂട്ടിയത്.

കഴിഞ്ഞ ദിവസം പോലീസിനെ വെട്ടിച്ച് കീഴടങ്ങിയ വൃന്ദയെ റിമാൻഡ് ചെയ്യുകയായിരുന്നു. അന്വേഷണത്തിൻ്റെ ഭാഗമായി ഇവരെ ജുഡീഷ്യൽ കസ്റ്റഡിയിൽ നിന്നും വാങ്ങി തളിപ്പറമ്പിലും കണ്ണൂർ ജില്ലയിലെ മറ്റ് സ്ഥലങ്ങളിലും കൊണ്ടുപോയി തെളിവെടുപ്പ് നടത്തും.

സ്വർണ്ണ പണയമായിരുന്നു സിഗ്‌സ്ടെക്കിൻ്റെ പ്രധാന ഇടപാട്. സ്ഥാപനം പൂട്ടി പോകുന്നതിന് മുമ്പ് പണയം വെച്ചവരുടെ സ്വർണം മുഴുവൻ ഇവർ കൈക്കലാക്കിയതായും പരാതിയുണ്ട്.

വൃന്ദാ രാജേഷിനെതിരെ കോട്ടയത്ത് നൂറിലധികം കേസുകളും കണ്ണൂരിൽ 10, തളിപ്പറമ്പിൽ 16, പയ്യന്നൂരിൽ 15, തലശ്ശേരിയിൽ 10, കാസർകോട് 60, കാഞ്ഞങ്ങാട് 20, വടകരയിൽ 15 എന്നിങ്ങനെ നിരവധി കേസുകൾ നിലവിലുണ്ട്.

ഈ കേസിൽ സ്ഥാപനത്തിലെ ജീവനക്കാരടക്കം നിരവധി പേർ അറസ്റ്റിലാവുകയും ജയിലിൽ പോകുകയും ചെയ്തിരുന്നു. എന്നാൽ മുഖ്യ പ്രതിയായ വൃന്ദാ രാജേഷ് എട്ട് വർഷത്തോളം ഒളിവിൽ കഴിയുകയായിരുന്നു. മറ്റ് പ്രതികളുടെ അഭിഭാഷകർ ഇത് സംബന്ധിച്ച് പയ്യന്നൂർ മജിസ്ട്രേറ്റ് കോടതിയിൽ ചൂണ്ടിക്കാട്ടിയതിനെ തുടർന്ന് ഇവരെ പിടികൂടാൻ കോടതി പോലീസിന് നിർദ്ദേശം നൽകിയിരുന്നു.

ഈ വാർത്ത പങ്കുവെക്കുകയും  അഭിപ്രായങ്ങൾ രേഖപ്പെടുത്തുകയും ചെയ്യുക.

Vrinda Rajesh, the main accused in a multi-crore investment fraud case involving Sigztech in Taliparamba, has been remanded after being on the run for eight years. Police will take her into custody for questioning and evidence collection in Taliparamba and other areas. She faces numerous cases across Kerala, including allegations of embezzling pledged gold.

#InvestmentFraud #VrindaRajesh #Taliparamba #KeralaPolice #Arrest #FinancialCrime