ലക്നൗ: (KVARTHA) സംഭാലിലെ ഷാഹി മസ്‌ജിദില്‍ സര്‍വേയ്‌ക്കിടെയുണ്ടായ സംഘര്‍ഷവുമായി ബന്ധപ്പെട്ട് പൊലീസിനെതിരെ ആരോപണം ഉന്നയിച്ചതിന് പിന്നാലെ പ്രമുഖ അഭിഭാഷകനും സംഭാലിലെ ഷാഹി ജുമാ മസ്ജിദ് കമ്മിറ്റി ചെയർമാനുമായ സഫർ അലിയെ പൊലീസ് കസ്റ്റഡിയിലെടുത്തതായി റിപ്പോർട്ട്. തിങ്കളാഴ്ച വൈകുന്നേരമാണ് സഫർ അലിയെ പൊലീസ് കസ്റ്റഡിയിലെടുത്തത്. 

അഞ്ച് പേരുടെ മരണത്തിലേക്ക് നയിച്ച സംഭവങ്ങളെക്കുറിച്ച് വാർത്താസമ്മേളനത്തിൽ സംസാരിച്ച സഫർ അലി ഗുരുതരമായ ആരോപണങ്ങൾ ഉന്നയിച്ചിരുന്നു. ഡെപ്യൂട്ടി ഇൻസ്‌പെക്ടർ ജനറൽ (ഡിഐജി), പൊലീസ് സൂപ്രണ്ട് (എസ്‌പി), ജില്ലാ മജിസ്‌ട്രേറ്റ് (ഡിഎം) എന്നിവർ പ്രതിഷേധക്കാർക്കെതിരെ വെടിവയ്‌പ്പ് ഉത്തരവുകൾ പുറപ്പെടുവിക്കുന്നതിനെക്കുറിച്ച് ചർച്ച ചെയ്യുന്നത് താൻ കണ്ടതായി അദ്ദേഹം ആരോപിച്ചിരുന്നു.

വുദു ഖാനയിലെ വെള്ളം വറ്റിച്ചതോടെയാണ് പ്രശ്‌നങ്ങൾ തുടങ്ങിയതെന്ന് അദ്ദേഹം പറഞ്ഞു. വെള്ളം വറ്റിച്ചതോടെ നോട്ടീസ് നൽകാതെ പള്ളിയിൽ ഖനനം നടക്കുന്നു എന്ന തെറ്റിദ്ധാരണ ജനങ്ങളിൽ സൃഷ്ടിച്ചു. ആഴം വിലയിരുത്താൻ വടി ഉപയോഗിച്ചാൽ മതിയെന്ന എസ്‌പിയുടെയും ഡിസ്ട്രിക്ട് മജിസ്ട്രേറ്റിന്റെയും നിർദേശത്തെ അവഗണിച്ച് എസ്‌ഡിഎം വെള്ളം വറ്റിക്കാൻ നിർബന്ധം പിടിച്ചു.

ജനങ്ങളുടെ പ്രതിഷേധം ശക്തമായതോടെ ഖനനം നടക്കുന്നില്ലെന്ന് അധികൃതർ മൈക്കിലൂടെ പ്രഖ്യാപിച്ചു. എന്നാൽ, സംഭവത്തിന്റെ പശ്ചാത്തലത്തെക്കുറിച്ച് ചോദിച്ച ജനങ്ങളെ സർക്കിൾ ഓഫീസർ അധിക്ഷേപിച്ചു. അദ്ദേഹം ലാത്തിച്ചാർജിന് ഉത്തരവിട്ടു, ചോദ്യം ചോദിക്കുന്നവരെ വെടിവെച്ചുകൊല്ലുമെന്നും ഭീഷണിപ്പെടുത്തി. എസ്‌ഡിഎമ്മും സർക്കിൾ ഓഫീസറുമാണ് അന്തരീക്ഷം വഷളാക്കിയത്. 

ഖനനം നടക്കുന്നുവെന്ന തെറ്റായ വിവരം പ്രചരിപ്പിച്ചതിനാലാണ് ജനങ്ങൾ പ്രകോപിതരായത്. എന്നാൽ, ഉദ്യോഗസ്ഥർ സത്യാവസ്ഥ വിശദീകരിക്കാൻ തയ്യാറായില്ല. സമാധാനം പാലിക്കാൻ ആളുകളോട് അഭ്യർഥിച്ചെങ്കിലും, അവരെ നിയന്ത്രിക്കാൻ ജില്ലാ മജിസ്ട്രേറ്റും എസ്‌പിയും തന്നെ ആവശ്യപ്പെട്ടുവെന്നും അദ്ദേഹം കൂട്ടിച്ചേർത്തു.

അതിനിടെ കൊല്ലപ്പെട്ടവരുടെ എണ്ണം അഞ്ചായി. നഈം (28), മുഹമ്മദ് ബിലാൽ അൻസാരി (25), നുഅമാൻ, അയാൻ, മുഹമ്മദ് കൈഫ് (17) എന്നിവരാണ് കൊല്ലപ്പെട്ടത്. സംഭവത്തിൽ ഉത്തർപ്രദേശ് പൊലീസ് ഏഴ് എഫ്ഐആറുകൾ രജിസ്റ്റർ ചെയ്തിട്ടുണ്ട്. എസ്പി എംപി സിയാ ഉർ റഹ്മാൻ ബാർഖ്, പ്രാദേശിക എസ്പി എംഎൽഎ ഇഖ്ബാൽ മഹമൂദിൻ്റെ മകൻ സുഹൈൽ ഇഖ്ബാൽ എന്നിവരടക്കം 400 പേരെ പ്രതികളാക്കിയാണ് കേസെടുത്തിരിക്കുന്നത്. പലരെയും അറസ്റ്റ് ചെയ്തിട്ടുമുണ്ട്.

#SambhalProtests, #PoliceCustody, #ReligiousClashes, #IndiaNews, #DeathToll, #UttarPradesh