പോക്സോ കേസിൽ ശിക്ഷിക്കപ്പെട്ട ബിജെപി നേതാവായ അധ്യാപകൻ കെ പത്മരാജനെ സർവീസിൽ നിന്ന് നീക്കം ചെയ്യാൻ ഉത്തരവ്

കണ്ണൂർ: (KVARTHA) പാനൂർ പാലത്തായിയിൽ വിദ്യാർഥിനിയെ പീഡിപ്പിച്ച പോക്സോ കേസിൽ ശിക്ഷിക്കപ്പെട്ട ബിജെപി നേതാവും അധ്യാപകനുമായ കെ പത്മരാജനെ സർവീസിൽ നിന്നും നീക്കം ചെയ്യാൻ പൊതുവിദ്യാഭ്യാസ ഡയറക്ടർ കണ്ണൂർ വിദ്യാഭ്യാസ ഉപഡയറക്ടർക്ക് നിർദേശം നൽകി. കേരള വിദ്യാഭ്യാസ ചട്ടങ്ങളിലെ (കെ ഇ ആർ) 14-എ, 77-എ വകുപ്പുകൾ പ്രകാരം നടപടി സ്വീകരിക്കാനാണ് നിർദേശം.

സ്കൂൾ മാനേജർക്കാണ് കണ്ണൂർ വിദ്യാഭ്യാസ ഉപഡയറക്ടർ ഉത്തരവ് നൽകേണ്ടത്. ഈ വിഷയത്തിൽ മാനേജർ സ്വീകരിച്ച നടപടികൾ അടിയന്തിരമായി റിപ്പോർട്ട് ചെയ്യാനും പൊതുവിദ്യാഭ്യാസ ഡയറക്ടർ നിർദേശം നൽകിയിട്ടുണ്ട്. ബിജെപി തൃപ്പങ്ങോട്ടൂർ മുൻ പഞ്ചായത്ത് പ്രസിഡന്റ് കൂടിയാണ് കെ പത്മരാജൻ.

ക്രൂരകൃത്യത്തിന് മരണം വരെ ജീവപര്യന്തം

പത്ത് വയസ്സുകാരിയെ സ്കൂളിലെ ശുചിമുറിയിൽ വെച്ച് പീഡിപ്പിച്ച കേസിൽ രണ്ട് പോക്സോ വകുപ്പുകളിലായി 40 വർഷം തടവുശിക്ഷയും മരണം വരെ ജീവപര്യന്തവുമാണ് കെ പത്മരാജൻ അനുഭവിക്കേണ്ടത്. തലശ്ശേരി അതിവേഗ കോടതിയാണ് ശിക്ഷ വിധിച്ചത്. കൂടാതെ, പ്രതി രണ്ട് ലക്ഷം രൂപ പിഴയടയ്ക്കാനും കോടതി ഉത്തരവിട്ടിരുന്നു.

വിദ്യാർത്ഥിനിക്ക് സംരക്ഷകനാകേണ്ട അധ്യാപകൻ നടത്തിയ ക്രൂരകൃത്യമായാണ് കോടതി ഇതിനെ കണ്ടത്. നാലാം ക്ലാസ്സുകാരിയെ സ്കൂളിലെ ശുചിമുറിയിൽ വെച്ച് മൂന്ന് ദിവസങ്ങളിലായി ലൈംഗികമായി പീഡിപ്പിച്ച കേസിലാണ് അഞ്ച് വർഷം നീണ്ട നിയമ നടപടികൾക്ക് ശേഷം വിധി വന്നത്. 

അന്നത്തെ ഡിവൈഎസ്പി ആയിരുന്ന ടി കെ രത്നകുമാറിന്റെ നേതൃത്വത്തിലുള്ള അന്വേഷണ സംഘം സമർപ്പിച്ച ശാസ്ത്രീയ തെളിവുകൾ കേസിന് ബലം നൽകി. പത്ത് വയസ്സുകാരിയെ അഞ്ച് ദിവസം കോടതി മുറിയിൽ വിസ്തരിക്കേണ്ടി വന്നതിന്റെ വേദന പങ്കുവെക്കുമ്പോഴും വിധിയിലെ ആശ്വാസമാണ് പ്രോസിക്യൂഷൻ കാണുന്നത്.

കുടുംബ പശ്ചാത്തലം കണക്കിലെടുത്ത് ശിക്ഷയിൽ ഇളവ് വേണമെന്നായിരുന്നു പ്രതി കോടതിയിൽ ആവശ്യപ്പെട്ടത്. എന്നാൽ, 12 വയസ്സിന് താഴെയുള്ള പെൺകുട്ടിയെ സ്കൂളിൽ വെച്ച് പീഡിപ്പിച്ച ക്രൂരകൃത്യത്തിൽ പോക്സോ നിയമത്തിലെ രണ്ട് വകുപ്പുകൾ ചേർത്താണ് 40 വർഷം തടവ് ശിക്ഷിച്ചത്. പ്രായപൂർത്തിയാകാത്ത പെൺകുട്ടിയെ പീഡിപ്പിച്ചതിന് ഇന്ത്യൻ ശിക്ഷാ നിയമത്തിലെ വകുപ്പുകൾ ചേർത്താണ് മരണം വരെ ജീവപര്യന്തം ശിക്ഷ വിധിച്ചത്.

ബിജെപി നിലപാട്

കേസ് രാഷ്ട്രീയമാണെന്നും ഹൈകോടതിയിൽ അപ്പീൽ പോകുമെന്നും പ്രതിഭാഗം അഭിഭാഷകൻ അറിയിച്ചു. കേസ് കെട്ടിച്ചമച്ചതിന് പിന്നിൽ എസ്ഡിപിഐ ആണെന്നാണ് ബിജെപിയുടെ ആരോപണം. ഇതിനെതിരെ ഹൈകോടതിയെ സമീപിക്കുമെന്ന് ബിജെപി കണ്ണൂർ ജില്ലാ നേതൃത്വം അറിയിച്ചു.

ഈ വാർത്ത പങ്കുവെക്കൂ. നിങ്ങളുടെ അഭിപ്രായം കമൻ്റ് ചെയ്യുക. 

Article Summary: Order issued to dismiss convicted BJP leader and teacher K Padmarajan from service in a PoCSO case.

#PoCSO #KeralaEducation #KannurNews #TeacherDismissal #JusticeForVictim #BJPLeader