ട്രെയിൻ യാത്രയ്ക്കിടയിൽ പി കെ ശ്രീമതിയുടെ ബാഗ് കവർന്നു; 40,000 രൂപയും ആഭരണങ്ങളും നഷ്ടപ്പെട്ടതായി പരാതി

തിരുവനന്തപുരം: (KVARTHA) ട്രെയിൻ യാത്രയ്ക്കിടയിൽ പി കെ ശ്രീമതിയുടെ ബാഗ് കവർന്നതായി പരാതി. 40,000 രൂപയും സ്വർണാഭരണങ്ങളും മൊബൈൽ ഫോണും പ്രധാന രേഖകളും ഉൾപ്പെടെയുള്ളവയാണ് നഷ്ടപ്പെട്ടത്. മഹിളാ അസോസിയേഷൻ ബിഹാർ സംസ്ഥാന സമ്മേളനം ഉദ്ഘാടനം ചെയ്യുന്നതിനായി കൊൽക്കത്തയിൽ നിന്ന് സമസ്തിപൂരിലേക്ക് ട്രെയിനിൽ യാത്ര ചെയ്യുന്നതിനിടെയാണ് സംഭവം നടന്നതെന്ന് പി കെ ശ്രീമതി അറിയിച്ചു.

ട്രെയിനിൽ ഉറങ്ങുന്ന സമയത്ത് തലയ്ക്കടുത്തായി വെച്ചിരുന്ന ബാഗാണ് കവർച്ച ചെയ്യപ്പെട്ടത്. ഉറക്കമുണർന്നു നോക്കിയപ്പോഴാണ് ബാഗ് നഷ്ടപ്പെട്ട വിവരം ശ്രദ്ധയിൽപ്പെട്ടതെന്ന് പി കെ ശ്രീമതി പറഞ്ഞു. ബോഗിയിൽ യാത്ര ചെയ്തിരുന്ന മറ്റ് ചില യാത്രക്കാരുടെ പേഴ്സുകളും കവർച്ച ചെയ്യപ്പെട്ടതായാണ് വിവരം. ട്രെയിനിൽ വെച്ച് വളരെ ഞെട്ടിപ്പിക്കുന്ന അനുഭവമാണുണ്ടായതെന്നും അവർ വ്യക്തമാക്കി.

കവർച്ച ശ്രദ്ധയിൽപ്പെട്ട ഉടൻ ട്രെയിനിലെ ചങ്ങല വലിച്ചെങ്കിലും റെയിൽവേ ജീവനക്കാരോ മറ്റോ സ്ഥലത്തെത്തി പരിശോധിക്കാനോ ഇടപെടാനോ തയ്യാറായില്ലെന്ന് പി കെ ശ്രീമതി ആരോപിച്ചു. ടിടിയെ അന്വേഷിച്ചെങ്കിലും കണ്ടെത്താനായില്ല. തുടർന്ന് ഒരു പൊലീസുകാരനോട് വിവരം അറിയിച്ചെങ്കിലും വളരെ നിസ്സംഗതയോടെയാണ് അദ്ദേഹം പ്രതികരിച്ചതെന്നും ആക്ഷേപമുണ്ട്.

സംഭവത്തിന് പിന്നാലെ കേരള മുഖ്യമന്ത്രിയുടെ ഓഫീസുമായി ബന്ധപ്പെടുകയും ഡിജിപിയെ വിവരം അറിയിക്കുകയും ചെയ്തു. ഇതിനെ തുടർന്ന് ഡിജിപി ഉൾപ്പെടെയുള്ളവർ വിഷയത്തിൽ ഇടപെട്ടു. ട്രെയിൻ യാത്ര അവസാനിച്ച ശേഷമാണ് ഔദ്യോഗികമായി പരാതി നൽകിയതെന്ന് പി കെ ശ്രീമതി അറിയിച്ചു. സംഭവത്തിൽ റെയിൽവേ പൊലീസ് അന്വേഷണം ആരംഭിച്ചിട്ടുണ്ട്.

ഈ വാർത്ത ഷെയർ ചെയ്ത് മറ്റുള്ളവരിലേക്ക് എത്തിക്കൂ. നിങ്ങളുടെ അഭിപ്രായം പങ്കുവെക്കൂ. 

Article Summary: Former MP P K Sreemathi's bag stolen during a train journey to Bihar.

#PKSreemathi #TrainTheft #RailwaySafety #KeralaNews #CrimeNews #IndianRailways